Baby hiccups: Ano ang solusyon?

Share this article with other moms

Mga simpleng paraan para tumigil ang pagsinok ni baby

Pagsinok lamang ito, pero kapag pinapanood ang iyong munting sanggol na nahihirapan, labis na rin ang pag-aalala. Kung tayo ngang matatanda na ay naiinis kapag sinisinok tayo, paano pa kaya si baby?

Sadyang prone ang mga sanggol sa pagsinok, kahit nasa loob pa lamang ng sinapupunan. Ang totoo, ayon sa journal na isinulat ni John Cunha, DO, FACOEP, U.S. board-certified Emergency Medicine Physician, hindi naman talaga apektado ang mga sanggol sa pagsinok nila. Ang totoo nga ay nakakatulog pa sila ng mahimbing kahit sinisinok na. Hindi rin ito nakakaabala sa paghinga.

Normal at natural lamang ang pagsinok at hindi dapat ikabahala. Kadalasan, dahil din ito sa pagiging excited ni baby. Habang lumalaki, mababawasan ang dalas ng pagsinok.

Bakit sinisinok ang mga baby?

Ayon sa mga doktor, ang baby hiccups ay sanhi ng contraction ng diaphragm at mabilis na pagsara ng vocal cords. Sabi ng ibang pediatrician, minsan ito ay sanhi ng pagpapakain, o di kaya’y paglamig ng temperatura. Pero hindi dapat ikabahala. Ang mga sanggol na may gastroesophageal reflux disease (GERD) ay mas madalas na sinisinok din, dahil sa kondisyon nila.

Kung nais matigil ang pagsinok ng sanggol, subukan ang mga sumusunod:

1. Padighayin si baby

Ang pag-burp ay nakakatulong na maalis ang labis na gas sa tiyan, na maaari ring nakakadagdag sa pagsinok. Kung nasa upright position ang sanggol, mas maginhawa ang paghinga. Makakatulong kung padidighayin si baby pagkatapos uminom ng gatas sa bote man o kay Nanay. Itapat ang ulo ng sanggol sa balikat at tapikin ng mahina ang likod niya.

2. Bigyan ng pacifier

Kung ang pagsinok ay hindi naman pagkatapos ng pagkain o hindi nangyari pagkatapos kumain, bigyan lamang ng pacifier upang ma-relax ang kaniyang diaphragm. (Ito ay kung kumportable ka at si baby sa paggamit nito.)

photo: shutterstock

3. Painumin ng tubig

Kung anim na buwan o mahigit na si baby, maaari na siya bigyan ng tubig. May mga sumusubok ng tubig, habang ang iba ay pinapainom ng gripe water. Ang gripe water ay kombinasyon ng herbs at water na sinasabing nakakatulong sa colic at ilang pagsakit ng tiyan. Ito ay may ginger, fennel, chamomile, at cinnamon, at mas karaniwan sa Amerika. Kadalasan, regular na tubig lang ay ayos na. Katulad ng epekto ng pacifier, na-rerelax ng pag-inom ang diaphragm.

Itanong sa iyong pediatrician bago bigyan ang bata ng gripe water. At kahit pa nireseta na ng doktor, palaging basahin ang ingredients list bago ipainom kay baby para masigurong walang allergen ito.

4. Hayaan na lang tumigil ng natural

Madalas kasi, tumitigil na ito ng walang kailangang gawin. Kung hindi naman ito nakakairita para kay baby, hayaan na lang. Kung masyado nang matagal at may paglungad o pagsuka na, ikunsulta sa doktor, para lang makasiguro.

Paano mapipigilan ito?

Walang siguradong paraan para mapigilan ang pagsinok, ngunit may mga maaaring subukan. Siguraduhing kalmado ang sanggol habang umiinom ng gatas. Huwag hintaying umiyak pa ng sobra bago painumin ng gatas. Pagkakain, iwasan ang aktibong paglalaro tulad ng pagtalon. Buhatin ng patayo ang bata pagkakain.

Kailan dapat tawagin si Dok?

Kailan nga ba dapat mag-alala sa pagsinok? Sinasabing normal ito para sa mga batang wala pang isang taon. Kung napapansin na masyadong madalas at naiirita o umiiyak si baby sa tuwing sinisinok, mabuti nang ikunsulta sa doktor. Bihira man, maaaring hudyat ito ng isang kondisyong medikal o ibang sakit.

Kaugaliang Pinoy

Isa na ako sa sumunod sa mga payo ng matatanda na maglagay ng basang sinulid o bulak sa noo ng bata. Walang paliwanag, wala rin akong alam na pinagmulan ng kaugaliang ito, pero naisip ko noon, wala namang panganib ito, kaya sinunod ko. Lahat talaga gagawin ni Nanay para lang matulungan ang anak. Pero tulad ng sinabi ko, wala itong basehang medikal.

Ang iba naman, ginugulat daw ang sinisinok. Ito ang medyo nakakabahala dahil hindi mabuti para sa isang sanggol ang magulat. Kaya’t huwag nang gawin. Mabuti pang sundin na lang ang mga payong may paliwanag ng Siyensiya, kaysa sabi-sabi.

source: The Cause and Treatment of Infant Hiccups in Babies and Newborns, ColicCalm.com

ALAMIN: Mga kailangang bakuna sa unang taon ni baby

Baby Health Baby Ages + Stages Baby Care Baby Concerns