Maraming buntis ang nag-alala nang mag simula ang pandemya noong nakaraang taon. Iba’t ibang preparasyon at paraan ng pag-iingat ang ginagawa ng bawat pamilya. Bukod dito, marami ding nagbago pagdating sa sistema ng pagtanggap ng pasyente sa mga klinika at laboratoryo ng hospital.
Pagbubuntis ngayong pandemic
Sabik kaming mag-asawa sa bawat check up at ultrasound. Ngunit dahil sa tinayong sistema upang mapanatiling limitado at kontrolado ang taong pumapasok sa bawat kwarto ng doktor at laboratory.
Hindi basta basta pinapapasok ang mga kasama ng pasyente sa loob ng clinic. Siguradong karamihan ng mister ay ganito ang naranasan ngayon. Talagang ibang-iba sa nakasanayan.
Larawan mula sa Baby photo created by prostooleh – www.freepik.com
Kalimitan, sa unang trimester nagiging maselan ang pagbubuntis. Kaya naman binantayan namin maigi ang bawat pagkain na aming ihahain para makasiguro na tama ang sustansya at dami ng aking kakainin.
Ito rin ay para maiwasang tumaas ang aking blood sugar at hindi magresulta ng Gestational Diabetes in Pregnancy. Maliban dito, naging normal at maayos ang kabubuan ng aking pagbubuntis hanggang sa ako ay mag-labor; isa sa pinaka-inaabangan at kinatatakutan ng mga nagdadalang tao.
Ika-36 na linggo ng pagbubuntis ko
Nasa ika-36 na linggo kami ng aming pagbubuntis nuong nakaramdam ako ng palagiang pag-hilab ng tyan. Dahil unang beses ko itong naramdaman, hindi ako sigurado kung ito na nga ang pinakahihintay naming “hilab” na nagsisilbing senyales na malapit ng manganak ang isang babae.
Para makasiguro, kumonsulta kami kaagad sa aking doktor at dito na nagsimulang bantayan ang bawat galaw at hilab ng aking tyan.
Larawan mula sa iStock
Dito na rin ako binigyan ng ilang gamot na makakatulong sa kalusugan ng sanggol kung sakaling lumabas ito ng mas maaga sa aking tiyan.
Mas napa-aga rin ang pag-swab test namin ng aking asawa. Isa ito sa protocol ng mga ospital para makasiguro sa tamang paggamot ng pasyente kung sakaling sila ay may COVID o wala bago ang operasyon.
“After 3 days ng labor, CS din pala ang ending!”
Gayunpaman, sinigurado pa rin ng aming doktor na makaabot sa ika-37 linggo ang sanggol sa aking tiyan kaya pinayuhan niya kaming mag bed-rest.
Sumunod na naramdaman ko ang palagiang pag-hilab ng tiyan tatlong araw bago ako nanganak at dito na din ako inadmit sa ospital. Ang akala naming maagang panganganak, inabot pa rin ng tatlong araw sa pag-labor!
Larawan mula sa iStock
Ang pagsuot ng face mask at face shield habang nagle-labor ay kasama sa patakaran sa loob ng ospital. Bukod dito, isa pang epekto ng pandemya ang mag-isang pagle-labor ng karamihan sa mga manganganak.
Hindi naging madali para sa akin ang pag labor dahil mababa ang aking pain tolerance. Naalala ko pa nuong nakiusap ako kung pwedeng itigil muna pansamantala ang pangpa-hilab ng tyan dahil sa sobrang sakit.
BASAHIN:
#AskDok: 13 bagay na dapat mong malaman tungkol sa panganganak ng cesarean delivery
3rd ng labor ko
Sa pangatlong araw ng aking pagle-labor, ang aking cervix ay nasa 4cm dilation pa rin. Bukod sa sakit ng hilab ng tyan, dito na nagsimulang mag-iba ang aking pakiramdam.
Nakaramdam ako ng hirap sa paghinga at pagbaba ng oxygen level sa dugo — ilan sa mga sintomas ng COVID-19. Bilang protocol ng ospital, maraming test ang ginawa na kalaunang napag alamang mayroon akong pneumonia.
Dahil rito, madalian akong inilipat sa ibang kuwarto habang nasa kalagitnaan ng pagle-labor. Naging iba ang epekto nito sa akin. Mas lalong naging masakit ang hilab ng aking tyan at hindi na ako mapanatag.
Nagdulot din ito ng stress sa baby kaya napag desisyunan na mag-emergency c section delivery na at sa araw na ring yun, nailabas ang aking baby boy.
Dahil sa naging sitwasyon, hindi ko agad nahawakan at nakita ang aking anak. Inihiwalay din sya sa ibang sanggol habang hinihintay pa ang resulta ng aking pangalawang swab test.
Pagkatapos ng operasyon, sa “isolated area” ako pinagpagaling ng mag-isa at tanging cellphone lang gamit pang communicate sa aking asawa.
Nagtagal ako duon ng panibagong 3 araw hanggang sa makumpirma na negative pa rin ang resulta ng aking panibagong swab test.
Ang pag-upo, pag-lakad at iba pang kadalasang binabantayan sa bagong panganak lalo na kung c section delivery ay ginawa ko ng mag-isa dahil naka-isolate ako.
Mga napagtanto ko sa panganganak ng c section delivery at pagbubuntis sa panahon ng pandemic
Totoo na ang pagle-labor at panganganak ang isa sa mga hindi malilimutang parte ng pagbubuntis. Kahit gaano ka katakot, may mga pangyayari na hindi mo aakalaing kakayanin mo pala.
Hindi lang pisikal ngunit pati emosyonal na nakakaapekto ang kasalukuyang sitwasyon sa mga nagbubuntis dala ng pandemya. Hindi man sa lahat, ngunit ang pagkakaroon ng kasama at karamay sa sitwasyon na ito ay importante para sa isang nagdadalang tao.
Anxiety, stress, depression dahil sa quarantine at iba pang emosyonal na resulta ang kalimitang nagiging epekto ng pagkabahala sa COVID at naranasan ko rin ang mga ito.