Kakaibang summer activities para sa inyong mga anak!

Iwasan ang tambay ngayong bakasyon. Narito ang ilang makabuluhang summer activities para sa mga bata na mapagkakaabalahan nila.

Napakaraming pwedeng gawin ngayong bakasyon—lalo na para sa mga batang walang pasok sa eskwela. Kesa naman manuod lang ng TV o maglaro ng video games maghapon at magdamag, bigyan ang mga bata ng maraming summer activities na sunod sa hilig o interes nila.

Ang lahat ng bata ay may angking hilig sa pagdiskubre, sa paggalaw, paglikha at pagkatuto. Ito ang dapat nating pagtuunan ng pansin para maging mas makabuluhan ang bakasyon nila—ang matuto sila sa labas ng classroom. Hindi naman kailangang maging istrikto at walang laro. Ang sikreto ay ang pagbibigay ng mga gawain na nakakatuwa at laro pa rin, pero may matututunan pa rin sila, at kikilitiin pa rin ang pag-iisip at talino ng bawat bata.

Paano magiging masaya pero productive ang bakasyong ito? Subukan ang mga summer activities na ito:

  1. Turuan silang magluto o maghanda ng meryenda nila. Mula sa simpleng pritong itlog, pancake, toasted bread, hanggang sa halo halo, fruit salad, fruit skewers, at bonggang pizza, brownies, banana bread, pies at cake. Kung di ka marunong, ito na rin ang pagkakataon na matuto kayo ng sabay. Madami nang DIY videos online na nagtuturo ng madaling paggawa ng iba’t ibang recipe, na kid-friendly pa. Kapag mas sanay na sila sa kusina, pwede na rin silang tumulong sa paghahanda ng pananghalian at hapunan, hindi ba?
  2. Magtanim ng gulay at ibang halaman. Kung lay lugar kayo sa labas, magandang turuan ang mga batang mag-alaga ng iba’t ibang halaman, herbs, at gulay.  Kung wala naman, magtalaga lang ng isang lugar na malapit sa bintana sa loob ng bahay at maghanay ng mga maliliit na paso. Magsaliksik ng mga paraan para mapayabong ang maliit na hardin nang magkasama. Turuan silang magdilig araw araw at pagmasdan ang pagusbong at paglaki ng mga halaman. Kung mamumunga agad, maipapakita pa sa kanila na ang mga bungang kamatis, talong, o gulay tulad ng pechay ay siyang kakainin sa hapunan.
  3. Turuan silang mag-aral o maglaro ng outdoor activities. Ito ang tamang panahon para mag-aral magmaneho ng bisikleta o scooter, lumangoy sa pool, o di kaya’y mag-backyard camping. Bakit hindi maglaro ng mga larong Filipino tulad ng tumbang preso, patintero, o di kaya naman ay mag-jogging o brisk-walking sa hapon o umaga. Ang paglalaro sa labas ay makakapagbigay ng napakaraming benepisyo sa iba’t ibang areas ng development ng mga bata, lalo sa pisikal at socio-emotional.
  4. Mag-aral at maglaro ng sports. May mga libreng sports program sa mga barangay minsan, o di kaya ay mga murang sports program sa eskwelahan nila o mga sports center tulad ng Milo Best. Alamin sa inyong community kung ano ang mga programang pwedeng kunin ng mga bata na sakto sa edad nila.
  5. Mag-aral at maglaro ng instrumento. Ito rin ang magandang panahon na turuan silang kumilala ng iba’t ibang musical instruments, at mag-aral din na maglaro ng kahit isang instrumento. Kakailanganin ng isang propesyonal na magtuturo, pero may mga natututo rin ng sa sarili nila, tulad ng pagtugtog ng gitara, kahit sa simula pa lang.  
  6. Bumisita sa mga museum at zoo. Pumasyal sa mga ito kahit isa o dalawang beses sa isang buwan. Magtanong din kung may mga summer program sila para sa mga bata.
  7. Tulungan silang mag-volunteer. Sa bawat community, may mga organisasyon na naghahanap ng mga volunteer. Magtanong sa simbahan o sa eskwelahan ng inyong mga anak kung mayron silang Social Action activities na pwedeng salihan ng mga bata. Hindi naman ito araw araw o buong summer. Pero mabuting makatulong sila kahit ilang araw o ilang linggo para maranasan nila ang makapag-volunteer at tumulong sa kapwa nang walang kapalit na pera.
  8. Magtalaga ng iba’t ibang gawain para sa mga bata sa araw-araw. Para sa mga araw na nasa bahay sila, gumawa ng schedule ng iba’t ibang gawain para sa buong pamilya, o para gawin ng kaniya-kaniya, sakaling gusto din nilang mapag-isa minsan. Nariyan ang board games. Panigurado naaalala mo pa nung panahong di pa naiimbento ang video consoles, board games ang kinagigiliwan ng mga bata at pamilya, tulad na rin ng Scrabble, Snakes and Ladders, Monopoly, Life, Clue, at marami pang iba. Sa gabi o hapon, magkaron ng Movie Date at manuod ng isang lumang pelikula na di pa nila napapanuod. Gumawa ng meryenda tulad ng popcorn para masaya habang nanunuod. Maghanda rin ng mga coloring book, crayons, paint at hayaan silang lumikha ng kani-kaniyang art. Gumawa ng homemade play dough para may malalaro sila anumang oras na mabagot sila. Maghanda rin ng mga libro, puzzles, at ibang laruan na makakatulong sa skills nila tulad ng blocks at card games. Kung sinisipag pa, mag-treasure hunt at maghanda ng premyo para sa kanila.
  9. Mag-imbita ng ibang bata at magkaron ng play dates. Kailangan ng mga batang makakita at makapaglaro kasama ang ibang batang ka-edad nila, kundi ay magsasawa sila sa mga magulang nila, o mga kapatid. Mag-imbita ng mga pinsan, kapitbahay, o dating kaklase na kaibigan ng mga bata at maghanda ng mga activity na nabanggit na rin sa listahang ito. Magluto ng meryenda kasama ang mga bata at bisita, maglaro sa labas, o magsimula ng art session. Isa-alang alang ang interes ng mga bata at dito malalaman kung ano ang pwedeng gawin.

Ano pa ang pwedeng gawin ng mga bata?

May mga gawain din sa labas ng bahay na maaaring pagdalhan sa mga bata, na makapagtuturo sa kanila ng iba’t ibang bagay para sa kanilang pisikal, intelektuwal, at socio-emotional na pag-unlad. Maraming summer camps para sa mga bata na may iba’t ibang gawain na nagtuturo ng life skills at values sa mga bata.

Ayon kay Camp Director Joji Reynes-Santos, ang camp ay nagbibigay ng mga  structured at unstructured activities para sa mga bata, sa masaya at malikhaing paraan. “Camps provide control and opportunities to make decisions based on the child’s interests and areas of strengths,” paliwanag ni Teacher Joji. Kailangan din daw kasi ng mga bata ng structure para magkaron ng gabay at boundaries, na makapagtuturo ng responsibilidad at self-regulation, habang natututong mag-desisyon para sa sarili, at mag-isip gamit ang critical judgement at mahusay na problem-solving skills. Nahahasa ang pagharap ng mga sa mga pagsubok, at dahil wala ang mga magulang, nagagawa nila ito ng independent at may autonomy.

 

Music Camp ng Manila Symphony Orchestra sa Ilocos Sur

Ayon sa Project Coordinator ng MSO na si Jedi Villar, ito ay isang 5-day Music Camp sa Candon City, Ilocos Sur. Nakipag-isa ang MSO sa Candon City Youth Orchestra and Choir para maisakatuparan ang camp na ito. Bukas ito sa mga beginners hanggang advance level, mula 8 taong gulang pataas. May mga group classes, individual lessons, music theory, orchestra classes para sa violin, viola, cello, piano, guitar at voice.

Manila Symphony Orchestra

835-7414, 0927 839 6764
[email protected]

 

Summer Workshop sa Creative Explorers School for Children, Quezon City

Para sa mga bata mula 4 hanggang 10 taong gulang, may iba’t ibang activities at workshop na makakatulong sa pag-unlad ng self-awareness, creativity, at focus sa pamamagitan ng movement o paggalaw. Ang Progressie Hub Manila ay  magtuturo ng kanilang pinaka-unang MIND AND BODY MOVEMENT WORKSHOP sa Creative Explorers School for Children, Quezon City mula April 17 hanggang May 2018.

May mga nakahanda ring Play Group para sa mga 2 hanggang 3 taong gulang, dagdag ni Executive Director Giselle Elgincolin, na isang Summer Preschool na maghahanda para sa mga unang beses na papasok sa eskwelahan sa susunod na Academic Year. Tatlong beses lamang ito kada linggo, Para naman sa mga batang 4 hanggang 5 taong gulang, mayrong Literacy at Math Games Playshop. Ang dalawang ito ay magsisimula sa April 16 hanggang May 11, 2018.

Creative Explorers School for Children

47 Visayas Avenue, Quezon City, Philippines

+63 2 924 0904

https://www.facebook.com/pg/creativeexplorersschool/about/?ref=page_internal

 

Camp L.I.F.E. 2018 sa Talisay, Batangas

Ang limang araw na summer camp na ito ay pinamumunuan ng Candent Learning Haus, at para sa mga batang mula 8 taong gulang pataas. Sa loob ng halos dalawang dekada, patuloy na gumagabay sa pag-unlad ng mga bata at teenagers ang Candent sa pamamagitan ng Camp LIFE. Maraming iba’t ibang gawain sa camp na nagtuturong maging independent, creative, at critical thinkers ang mga campers.

Ayon kay Camp Director Joji Reynes-Santos, may parent workshop din sa unang araw ng camp, gayundin ang siblings support workshop sa loob ng limang araw. Ngayong taong ito, mayron silang Smart Quest, na hahasain ang talino at kakayahan ng mga campers sa pagiging resourceful, creative, at critical thinking. Mayron din silang  Tobi or not Tobi leadership training, at Oishi Cookfest para sa pagsasanay ng culinary skills ng mga bata. Ang camp ay mula May 1 to May 5, 2018, sa Club Balai Isabel, Talisay, Batangas.

CAMP LIFE - Candent Learning Haus

859 D Tropical Ave.

BF Homes Las Piñas, Las Piñas City 1740

825-8757,  0917 538 7033 •  email: [email protected]

https://candentlearninghaus.wordpress.com/

 

Summer sa Community of Learners sa San Juan City

Ang COL ay may mga nakahandang ilang day camp para sa mga gustong matuto at mahasa ang galing sa iba’t ibang kakayahan at talino. Mayrong Dance and Fitness, Robotics, Basketball Clinic, Literacy at Language Enrichment, Aikido, Guitar, Ukelele,  Keyboards, Comics Art, Kidi Yoga, at Math Enrichment para sa mga batang mula 6 taong gulang hanggang high school, at Day Camp para sa mga batang mula 5 hanggang 9 taong gulang. May mga magsisimula sa April 23 hanggang May 14, 2018, at may mga magsisimula sa May 2 hanggang May 15.

Community of Learners

1-C Montessori Lane, Bgy Addition Hills, San Juan del Monte

https://www.facebook.com/pg/ColfMdf2012/about/?ref=page_internal

721-0987; 998-2271   email: [email protected]

Ang mga camp at summer enrichment program ay nakakatulong hindi lang sa pagkatuto ng bagong kakayahan, kundi natuturuan ang mga batang makihalubilo at makibagay sa ibang batang kaedad nila, mas bata o mas matanda. Ang social skills na ay importanteng mapayabong, lalo sa panahon na wala sa pormal na eskwela ang  mga bata.

 

Playworks Playschool Programs

Ang Playworks ay isang preschool para sa mga batang may edad na 6 buwan hanggang 5 taong gulang, sa Salcedo Village, Makati at SM Aura, BGC. Mayron silang Playcare Program para sa mga pamilyang may day care needs. Ang mga klase nila ay nakatuon sa music & movement, cooking, art at marami pang ibang bagay sa edad na ito. Ang mga Summer Program nila ay playschool at enrichment classes para sa mga bata. Mayrong Music, Ballet, Indoor Football, Art, Muay Thai, Cooking, Smart Money, pati na rin ang Galileo Enrichment Classes para sa Math at English.

 

Playworks
Makati Campus • [email protected]
816-3273 • 0920 950 0078

 

SM Aura Campus • [email protected]
772 3471
www.playworks.com.ph

 

MCDONALD'S KIDDIE CREW 2018

Taon-taon, mayron 5-day workshop ang McDonald’s, kung saan ang mga bata ay magiging “crew” ng fastfood restaurant. Mararanasan nilang tumulong sa kusina, sa cashier, at on-floor, kasama na ang mga masayang group activities. Naranasan ito ng mga anak ko nuong 7 at 8 taong gulang sila, at talagang nag-enjoy sila.

Maaaring magtanong sa mga participating McDondald's branches, at sila ang magsasabi kung kailan ang simula. Mayrong registration fee (Php695), kasama na ang araw araw na meryenda ng mga bata, Kiddie Crew Tshirt, Kiddie Crew Bag, Kiddie Crew Cap, Kiddie Crew ID, Kiddie Crew Apron at Chef's Hat, at Kiddie Crew Scrapbook.

 

PETA WORKSHOP EXPRESS

Ang Philippine Educational Theater Association ay may mga nakahandang programa taon taon para sa mga kabataang mahillig sa teatro. Ang kanilang Creative Musical Theater for Children, Musical Theater for Young People at Creative Musical Theater for Adults ay isinasagawa ng mga pioneer at haligi na ng teatro sa Pilipinas. Simula ng workshop sa April 9, 2018.

The PETA Theater Center
No.5 Eymard Drive, New Manila Quezon City, Metro Manila

www.bit.ly/PETAWorkshops • 0905-369-6003

 

TRUMPETS PLAYSHOP

Mayroong Children's Theater, Children's Musical Theater, Musical Theater for Kids at Adults, Streetdance for Kids at Adults, Modeling, Public Speaking at Hosting, Sing and Dance, Star Power, at Playhous para sa mga kabataan. Marami nang mga kabataan ang dumaan sa iba’t ibang workshops nila, na nagpatuloy sa larangan ng pag-arte at pagsasayaw, telebisyon, teatro at pelikula ngayon. May Playshop Studio sa Alabang Town Center at The Podium, Ortigas.

Email: [email protected]

Landline: 901-4364 and 818-1111 loc 235.

Cell Phone Number: 0917-5864177

Website: trumpetsplayshop.com/ or email [email protected].