theAsianparent Logo

Co-sleeping kasama si baby: Mga magandang naidudulot nito

"To sleep or not to sleep with you," ‘yan ang tanong kapag nais mo ng simulan ang co-sleeping kasama si baby. Nakaugalian na nating mga Pilipino ang matulog kasama ang mga anak natin, lalo na mga sanggol pa lamang. Wala naman tayong ibang alam na paraan kundi ang patulugin ang mga bata sa tabi natin dahil ayaw nating mawalay sila lalo’t napakabata pa.

Paano kung may mangyari sa gitna ng gabi, hindi ba? ‘Yon din ang ginawa ko sa panganay kong anak, dahil ‘yon ang kinagisnan ko at nakita ko sa nanay at ate ko.

Pagkatapos ng dalawa pang anak at taon ng pagsasaliksik at pag-aaral tungkol sa epektibong parenting, natutunan ko na mahalaga pala ang makahanap ng istilo ng pagpapatulog na aangkop sa magulang at anak, at kailangang maintindihan din ang pros and cons ng bawat istilo bago tuluyang pumili ng para sa inyo.

Ano ang Attachment Parenting (or AP)?

Ayon kay Dr. William Sears, ito ay isang parenting approach na nagpapatibay ng bond ng isang magulang sa anak niya. Sabi ng mga naniniwala dito, ang attachment parenting ay magbibigay ng isang solid emotional foundation sa isang bata, na makakatulong sa pagkakaroon ng healthy at emotionally fulfilling relationships sa kaniyang buhay paglaki ng bata.

Ang attachment ay nangangailangan ng balanse ng security at support, confidence at freedom. Ayon kay Kim West, isang licensed Clinical Social Worker, child at family therapist at may akda ng librong The Sleep Lady's Good Night Sleep Tight, at 52 Sleep Secrets for Babies, kailangang hayaan ang bata na mailabas ang mga emosyong nararamdaman niya: galit, frustration, at excitement.

Kasama dito ang pagtulong na matutunan niya ang mga bagay na kailangang niyang matutunan sa sarili, tulad ng pagtulog nang mag-isa. Hindi nila kasi ito matutunan mag-isa; kailangan nila ng tulong ng mga magulang, sa konteksto ng isang ligtas at mapagmahal na kapaligiran at pamilya.

baby sleep strategies

The struggle is real

Dapat bang patulugin si baby sa tabi namin, sa kama namin? Ito pa rin ang tanong ng maraming magulang. Ang mga hindi sang-ayon sa attachment parenting ay nagsasabing nilalagay mo sa panganib ang iyong sanggol kung itinatabi mo siya sa pagtulog sa iyong kama. Sa kabilang panig, ang mga proponents ng “co-sleeping” ay nagsasabing, “Exaggerated lang ang iba diyan.” Ang siste, wala naman daw kasing masama kung gusto mong makasama ang iyong anak sa gabi. Bagkus nakakapagpatibay pa ito ng bond ng magulang at anak. Ang attachment parenting ay hindi na bago; matagal na itong ginagawa ng marami mula pa noong unang panahon.

Naniniwala ang mga sang-ayon sa co-sleeping na:

  • Si baby ay nasa tabi mo lang, kaya’t mabilis mong matutugunan ang pangangailangan niya kahit gitna ng gabi, at sa buong magdamag.
  • Kung nagpapasuso ka, mas convenient at hindi masyadong nakakaabala sa mag-ina. Mapapasuso pa si baby nang mas matagal, dahil komportable si Nanay at hindi na babangon pa.
  • Mas nakakatulog nang mahimbing si baby at hindi nagigising ng matagal o paulit-ulit dahil madaling natatapik ni Nanay, o naaaruga.
  • Parehong nakakatulog nang mahimbing ang mag-ina (pati na si Tatay), ramdam ang init ng haplos, yakap, at dampi man lang ng katawan ng isa’t isa. Nagiging in-sync din ang sleep cycle ninyo.
  • Kung nagtatrabaho ang mga magulang, sa bahay o sa opisina, maghapon kang walay kay baby. Gabi lang ang pagkakataon na magkasama kayo.
  • Ang mga proponents ng attachment parenting ay nagsasabing ito ay hindi puro mahigpit at istriktong rules, kundi mga rekomendasyon para sa magulang, para mahanap kung ano ang babagay at makakatulong sa mag-ina.

Ayon sa mga hindi naniniwala sa co-sleeping:

  • Maraming panganib at risk: may mga batang nadaganan na ng mga magulang na pagod sa trabaho kaya’t bagsak kapag nakatulog. May mga naging biktima na rin ng SIDS (Sudden Infant Death Syndrome) dahil na rin dito. Paano din kung mahulog ang bata sa kama nang hindi mo namamalayan?
  • Maraming batang ayaw nang umalis o hirap nang lumipat sa sariling kuwarto o kama paglaki. Ayon sa mga sleep experts, ang ganitong sleeping arrangement ay nakakaantala sa pag-develop ng independence ng bata.
  • Maraming nagsasabi na hindi ka makakatulog ng mahimbing o ng tamang oras dahil nga sa tuwing ingit ni baby, gigising ka, kahit hindi naman kailangan. Hindi tuloy nakakapahinga nang tuloy-tuloy ang magulang.
  • Ang attachment parenting ay “work-intensive” para kay Nanay at Tatay, lalo kung hindi lubusang pinag-aralan lahat ng impormasyon tungkol dito.
  • Para naman kay Nanay at Tatay, natural lang na wala na silang oras para sa isa’t isa, lalo sa kama, dahil nga nakagitna si baby. Lahat ng atensiyon at oras ay mabubuhos lang sa bata. Di ba’t kailangan ding magkaron ng “alone time” ang mag-asawa?

Marami pang potensiyal na problema ang madudulot nito. Ayon sa mga eksperto, ang co-sleeping o pagtulog nang magkasama ay nagtuturo ng independence sa bata dahil nagiging mas secure ang bata sa katagalan. Ang iba naman ay nagsasabing pinipigil nito ang kagustuhan ng batang maging assertive.

Ang magkaibang pananaw na ito ay patuloy pa rin. Sa huli, walang iisang pagsasaliksik at pag-aaral na nagsasabing ang isa ay mas mabuti kaysa sa isa. maliban sa mga naging karanasan ng mga magulang sa istilong napili nila.

Ang American Academy of Pediatrics' (AAP) ay nagsasabing ang mga sanggol ay dapat na natutulog kasama ang mga magulang, ngunit hindi sa iisang kama. Maaaring maglagay ng crib o tulugan ni baby na malapit sa mga magulang.

Ayon sa mga pag-aaral tungkol sa epekto ng paggising sa gitna ng gabi sa kaligayahan o pagiging masaya ng mga magulang, walang pagkakaiba ang ito sa mga nagpapatulog ng magkasama at sa hindi. Sa madaling salita, walang kongkretong pag-aaral na nagsasabing mas mabuti ang sleep attachment o mas mabuti ang natutulog nang magkahiwalay.

Maaari nga bang magkasundo ang dalawang panig?

Sabi ni Kim West sa kaniyang libro, hindi imposibleng magkasundo at gamitin ang dalawang magkaibang paniniwala para sa ikabubuti ng bata. Kailangang turuan ang mga bata na matulog nang kanila, nang hindi hinehele. Kakailanganin nila ito para sa habambuhay nila. Hindi pwedeng palagi na lang tinatapik o hinehele—o pinapatulog ni Nanay at Tatay, Lola o Yaya. Tulog nga si baby, pagod naman lahat ng tao sa paligid niya.

Sa madaling salita, maaari mong simulang patulugin si baby, sa piling mo, pero unti-unting turuan siyang makatulog nang sarili niya, para maihanda siya sa paglaki. Ang gentle sleep coaching at attachment parenting ay maaaring pagsamahin. Mahalagang tandaan na sinisimulan ito para sa mga sanggol na hindi bababa sa 6 na buwan ang gulang, dahil mas mahaba na ang tulog ni baby sa ganitong edad.

Ayon sa Attachment Parenting International, ang AP ay base sa walong core principles:

Mahalagang malaman ang pangunahing paniniwala at principles ng AP, kahit anupaman ang magiging desisyon ng mga magulang.

  • Paghahanda para sa pagbubuntis, panganganak at pagiging magulang
  • Pagpapakain kay baby nang may pagmamahal at respeto
  • Pagiging sensitibo sa pag-aaruga at pagtugon sa pangangailangan
  • Paggamit ng mapag-aruga at mapagmahal na haplos (skin-to-skin contact at babywearing)
  • Pagsiguro sa ligtas na pagtulog (pangunahin na ang co-sleeping), sa aspetong pisikal at emosyonal
  • Patuloy at walang humpay na pagmamahal at pag-aaruga
  • Paggamit ng positibong disiplina
  • Pagbabalanse ng personal at buhay pampamilya

Ayon kay Dr. Sears: “AP is an approach, rather than a strict set of rules. It’s actually the style that many parents use instinctively. Parenting is too individual and too complex for there to be only one way.”

Tanging ang magulang ang may huling desisyon sa kung ano ang epektibo para sa kanilang mag-ina at para sa pamilya. Kung ano ang importante para sa inyo, ang nararapat na gawin.

Kung ang desisyon ay ang co-sleeping, tandaan ang mga sumusunod:

  • Ayusing mabuti ang tulugan. Siguraduhing hindi mahuhulog ang bata sa kahit anong bahagi ng kama. Ang ginagawa ng iba ay ibinababa ang kama at may malambot na nakapaligid sa kama, kaya’t sakaling mahulog nga ang bata, hindi ito masasaktan. Siguraduhing walang mga espasyo o puwang kung saan maiipit ang sanggol tulad ng headboard, o sa dingding, sakaling nakasandal sa isang dingding ang kama ninyo.
  • Huwag iiwan ang bata sa kama ng mag-isa.
sources: Attachment Parenting: Instinctive Care for Your Baby and Young Child nina Katie Allison Granju, Betsy Kennedy, William Sears, The Sleep Lady's Good Night Sleep Tight ni Kim West

BASAHIN: May Colic si baby: Mga dapat malaman ni mommy at daddy