Aceite de manzanilla for baby at iba pang liniment na ipinapahid sa katawan ng sanggol, maari daw pagsimulan ng pneumonia. Ito ang impormasyong ibinahagi ng isang mommy netizen na ayon umano sa isang 20 years in service ng pediatric pulmonologist.
Image from Unsplash
Aceite de manzanilla for baby and pneumonia
Sa isang Facebook post ay ibinahagi ng isang mommy netizen ang kaalamang natutunan niya sa pedia ng anak niya. Na ayon pa sa kaniya ay may dalawang dekada ng eksperto pagdating sa kalusugan ng mga bata.
Pahayag ng mommy netizen, ayon umano sa pediatrician ng anak niyang pinangalan niyang si Dr. Bibiano Reyes, ang mga liniment tulad ng aceite de manzanilla for baby ay maari daw pagsimulan ng pneumonia sa mga sanggol. Ito daw ang itinuturong dahilan ng 90% cases ng pneumonia na nararanasan ng mga baby ngayon.
“Last mos may monthly check up si baby ko(3mos old now) she has colds and cough but thanks God ok and need lang ng nasal spray,si pedia every check-up may lecture sameng magasawa. He asked us (BTW he is a 2decade pedia na) if we’re using BABY OIL and manzanilla,and we said YES, we used manzanilla if my baby has a colic or kabag.. And baby oil para di daw pasukin ng lamig. He said its a BIG NO. Baby oil and manzanilla can cause PNEUMONIA. most babies (90%)as of today ang sakit is pneumonia.”
Ito ang nakasaad sa post ng mommy netizen.
Paliwanag umano ng senior pediatrician, ito ay dahil naiiwan ang oil sa katawan ng sanggol na maaring pagdikitan ng germs. Ito ay kaniyang malalanghap na pagsisimulan na ng life-threatening na sakit na pneumonia.
Sanhi ng pneumonia
Sinuportahan naman ang pahayag na ito ni Dr. Nikki James Francisco, isang Aklan-based pediatrician. Ayon kay Dr. Francisco, hindi lang maaring kapitan ng germs at microbes ang mga liniment na ipinapahid kay baby. Maari rin ma-absorb ng balat ni baby ang mga liniments na ito. Na kung minsan ay nagtataglay ng harmful ingredients na makakasama sa kalusugan ng sanggol.
“The simplest siguro na masasabi ko apart from the attachment of microbe part is, whatever you apply kasi on baby’s skin gets absorbed as it is very thin. There are some liniments that contain harmful ingredients (ie methylsalicylate) which can also damage the liver.”
Ito ang pahayag ni Dr. Francisco. Dagdag pa niya, walang kaugnayan ang oras ng pagpapaligo kay baby at paliligo ng buntis sa pagkakaroon ng pneumonia. Ang pinakamagandang paraan daw para maiwasan ito ay ang mabawasan ang tiyansa ng pag-aacquire ng mga microbe na nagdudulot nito. At siyempre ang pagpapanatili ng kalinisan, maayos na kalusugan at higit sa lahat ang pagpapabakuna.
“There’s no relationship with the time of bath and pneumonia. You only clean the skin. Contrary to the belief of olds, ligo sa hapon, madaling araw, even yung natutuyuan ng pawis, nakatutok sa fan ang baby—NEVER cause pneumonia.”
“If they want to prevent pneumonia, they really have to lessen the risk to acquire it in the first place. Pneumonia is caused by different microbes – viruses, bacteria, sometimes even fungi – are found essentially everywhere. Hygiene, proper nutrition and vaccination are paramount to prevention of this potentially life-threatening disease.”
Ito ang dagdag pang pahayag ni Dr. Francisco.
Paano makakaiwas sa pneumonia
Samantala, dagdag na payo naman ng pediatrician ng mommy netizen, imbis na aceite de manzanilla for baby ang gamitin kapag may kabag ang sanggol mas mabuti daw na i-hot compress nalang ang tiyan nito. Iwasan na rin daw ilabas si baby bago mag-alas singko ng hapon. Dahil ito ang oras na kung saan pababa sa lupa ang mga polusyon.
Kung hindi ito maiiwasan ay takpan hindi lamang ulo ng sanggol kung hindi pati ang ilong at bibig nito na daan upang makalanghap siya ng polusyon o bacteria. Iwasan din daw dapat na dalhin ang sanggol sa mga matatao at air conditioned na lugar tulad ng mall. Ito ay dahil mas matagal na nanatili ang mga bacteria sa mga enclosed at cold spaces kumpara sa mga lugar na open area.
Walang masama sa pagsunod sa mga nakasanayan o pinapayo ng mga matatanda. Lalong wala ring masama kung susunod sa payo ng mga doktor na ang iniisip lang ay pagpapanatili ng malakas at malusog na pangangatawan hindi lang ng mga bata kung hindi pati narin ng mga may edad na.
Basahin: Anti-pneumonia vaccine: Important information for Pinoy parents