Angelica Yulo humingi ng patawad sa anak at Olympic gold medalist na si Carlos Yulo. Alamin dito ang mensahe niya para sa anak.
Mababasa dito ang sumusunod:
- Mensahe ni Angelica Yulo sa anak na si Carlos Yulo.
- Paghingi ng tawad ni Angelica sa anak na si Carlos.
- Mensahe ni Carlos sa kaniyang ina.
Mensahe ni Angelica Yulo sa anak na si Carlos Yulo
Sa gitna ng kinakaharap na intriga at mainit na usap-usapan sa kanilang pamilya ay nagpa-press conference ang ina ni Carlos Yulo na si Angelica Yulo. Doon ay nagbigay ng mensahe si Angelica sa anak na si Carlos. Ipinahayag niya sa anak ang nararamdaman niya sa kanilang sitwasyon ngayon. At ang hangarin niya dito bilang isang ina.
“Hindi ako perpektong ina at alam ng Diyos na hindi ka rin perpektong anak at walang perketong pamilya. Walang ibang hangad ang isang ina kung hindi ang ikabubuti ng kaniyang anak at sa bawat miyembro ng pamilya.”
Ito ang bahagi ng pahayag ni Angelica.
Paghingi ng tawad ni Angelica sa anak na si Carlos
Pagpapatuloy pa niya, wala siyang masamang intensyon sa anak. Ang gusto niya lang ay magabayan ito bilang isang magulang at humingi ito ng tawad sa naging reaksyon niya.
“Ako ay isang inang nasaktan dahil ang mabait na anak na pinalaki ko nang maayos at mabuting tao ay hindi na nakikinig sa mga paggabay ng magulang. Kung mali man ang mga naging pagpuna ko sa nobya mo, humihingi ako ng patawad dahil nanay lang ako na nag-aalala,”
Ito ang sabi pa ni Angelica.
Larawan mula sa Facebook
Ipinarating niya rin sa anak na sa kamay na nito ang pagdedesisyon para sa kaniyang sarili. Pero magkaano pa man, sinabi niya na bilang ina ay laging bukas ang pinto ng bahay nila at puso niya para dito.
“Matanda ka na at kaya mo nang magdesisyon para sa sarili mo. Bukas ang aming pintuan sa tahanan may pera ka o wala kung nanaisin mong bumalik sa amin.”
Umaasa rin siya na sana ang initiative ng pag-aayos sa kanilang pamilya ay magmula kay Carlos at girlfriend nitong si Chloe Anjeleigh San Jose.
“Gusto ko manggaling sa kanila mismo yung initiative kung papaano sila, kung papaano ma-e-ease yung pain, kung paano sila lalapit. Gusto ko sa kanila mismo manggaling.”
Ito ang sabi pa ni Angelica.
Larawan mula sa Facebook
Naging madamdamin din ang tagpo sa naging press conference ng ina ni Carlos. Sapagkat naroon rin ang kaniyang ama at kapatid. Ang ama niya ngang si Mark Andrew Yulo nagbigay ng pahayag sa nangyayari sa kanilang pamilya. Nilinaw niya na hindi pera ang ugat ng hindi pagkakaintindihan ng mag-ina. At umaasa siya na magkakaayos na nga ang kanilang pamilya.
“Sanay naman kami walang pera e. Gusto ko sana yung masaya lang kami. Gusto ko nga sana mabalik yung dati. Kasi magulo pala pag ganito, pag marami kang pera.”
Ito ang sabi pa ng ama ni Carlos Yulo tungkol sa kontrobersyang kinasasangkutan ngayon ng kanilang pamilya.
Mensahe ni Carlos sa kaniyang ina
Samantala, sa TikTok ay nagbigay rin ng mensahe si Carlos sa ina na matagal niya na daw napatawad.
“My message to you now is to heal, move on, and you know, I’ve forgiven you a long time ago already… I pray that you are safe and in good condition over there. Let’s stop this and celebrate the sacrifices, achievements and hard work of every Filipino athlete here in the Olympics.”
Ito ang mensahe ni Carlos para sa inang si Angelica Yulo.
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
