Napakaliit na tao, pero napakadaming kailangan! Mag-impake para kay baby, narito ang mga dapat dalhin kapag aalis kasama si baby—out of town man o sa ibang bansa—kasama ang inyong baby o toddler.
May mga bagay sa listahang ito na maaaring wala sa pupuntahan o kung mayroon man, ay maaaring mahal. Hindi naman kailangang dalhin lahat ng ito. Mas mainam pa rin na suriin kung ano lang ang talagang kakailanganin batay sa destinasyon at panahon ng inyong biyahe.
Kapag kumpleto ang dala-dala, mas makakapag-enjoy ang lahat dahil komportable at masaya si baby. Gayunpaman, iwasang magdala ng sobrang dami ng bagahe na hindi naman kinakailangan.
Kung magbibiyahe sa eroplano, siguraduhing alam ang baggage limit ng checked-in bags at carry-on. Kung maglalakbay gamit ang kotse o van, estimahin ang espasyo sa compartment at tiyaking kasya ang lahat ng bagahe.
Pangunahing kailangan
Isang maliit na bag para sa pagpapalit habang nasa biyahe
- lampin – tela at disposable
- diaper pad o mat
- plastik bag para sa gamit na diaper
- wipes
- diaper o nappy cream
- maliit na bote ng disinfecting hand gel, baby wash, at baby lotion
- tissues
Isang maliit na bag para sa biyahe (nakahanda): (Ihanda ang mga ito sa kaniya-
kaniyang ziplock bags para madaling hugutin sa byahe)
- isa hanggang 3 pacifiers (kung gumagamit si baby)
- mga laruan na paborito ni baby
- isa hanggang 2 set ng damit, medyas, sapatos, at sumbrero
- bibs
- feeding set kasama ang utensils at baby food
- formula milk o expressed milk ni Nanay
- tubig na nakalagay sa bote ni baby (kapag nasa tamang edad na si baby)
- juice, kung mahilig si baby dito
- paboritong meryenda ni baby na hindi makalat at madaling kainin
- magazine o coloring book kasama na ang crayons
Sa travel bag ni baby
- mga bote, tsupon, sippy cups
- paboritong pagkain ni baby
- breast pump (kung gumagamit)
- nightlight, para sa gabi
- First-aid kit
- pang-sanggol o pambatang pain reliever
- baby sling o front carrier
- kumot (3 hanggang 5, depende kung gaano katagal ang bakasyon)
- unan (if nasa tamang edad na si baby para gumamit nito, tulad ng 2 years old pataas)
- lip balm
- sunscreen
- moisturizer
- bedding o bed sheet
- kumot
- lotion panlaban sa lamok o insekto
Larawan mula sa Freepik
Damit
Siguraduhing bagay sa klima o panahon ng pupuntahang lugar. Pumili ng mga kulay na maaaring pagbagay-bagayin at pagpalit palitin na hindi magmumukhang pare-pareho ang suot sa iba’t ibang araw. Magplano din ng mga “outfit” para sa mga espesyal na pupuntahan, kung mayroon man.
Sapatos
Siguraduhing nasukat na ni baby at kasya sa kaniya ang dalang sapatos at medyas. Iwasan magdala ng bagong sapatos na hindi pa nasusukat man lang, at baka masakit ito sa paa o hindi kasya. Ibagay din sa lugar na pupuntahan ang sapatos na dadalhin (tsinelas kung beach, boots kung malamig, atbp.)
Sumbrero at Sunglasses
Ang sumbrero ay pangunahing kailangan para kay baby. Ang sunglasses ay hindi naman gaanong ka-importante, pero kung mayron ka para kay baby, makakatulong ito.
Gamot
Kasama na ang mga bitamina ng anak, pagsamasamahin sa isang maliit na bag, at ilagay sa lalagyan na madaling abutin o kunin kung nasa eroplano kayo o nasa sasakyan.
Toiletries
Mag-impake para kay baby ng sapat sa kung ilang araw ang biyahe. Kung alam na may mabibili sa pupuntahan na hindi mahal, huwag nang magdala ng napakarami.
Kailangan sa paliligo (Ilagay ito sa kaniya-kaniyang ziplock bags para maiwasan ang pagtulo o leak)
- shampoo at conditioner
- toothpaste
- hair brush
- nail cutter
- bulak
- face towel
- alcohol
- cologne
- lotion at cream
- tuwalya
Malalaking gamit
- car seat
- collapsible stroller
- portable crib o play yard
- inflatable baby bathtub
- baby monitor
Iba pang kailangan para sa buong pamilya
-
2 hanggang 3 kopya ng Travel Documents: Passports, visas, itineraries, tickets, mapa, at prescription para sa gamot kung mayroon. Mahalaga ito lalo na kapag kailangang mag-impake para kay baby, upang matiyak na may mga backup na dokumento sa kaso ng emergency. Magdala rin ng e-copy o kopya ng mga ito sa cellphone o laptop.
-
International SIM Card o gawing roaming ang linya na gamit upang manatiling konektado kahit nasa ibang bansa.
-
Converters. Hindi ko rin alam kung gaano ito kahalaga noon, pero kung may dala kang charger ng cellphone at camera batteries, ngunit hindi naman compatible sa saksakan sa pupuntahang lugar, magiging problema ito. Magdala ng 3-prong, 2-prong, flat, at pabilog para siguradong may magagamit.
-
Camera (Video at Still), kasama ang lahat ng baterya, charger, memory card, at kable para sa paglipat ng files sa laptop.
-
Cash. Alamin ang currency ng destinasyon at maghanda na ng perang ito bago umalis. Kadalasan, US dollars pa rin ang universal currency, kaya’t makabubuting magdala kahit kaunti. Kung sa loob ng bansa lang maglalakbay, siguraduhing may sapat na cash para sa emergency. Ilagay ito sa isang ligtas na lalagyan na maaaring isukbit sa leeg o katawan upang hindi mawala.
-
Inflatable Travel Pillow para sa mga magulang at bata, lalo na kung mahaba ang biyahe.
Larawan mula sa Freepik
Pahabol na tips
Ihanda ang bag ilang araw bago ang biyahe, at maghanda ng checklist para dito. Mas maiging alam mo na ang laman at lahat ng naihanda na, at para malaman agad kung ano pa ang kailangan. Gumamit ng diaper o baby bag na waterproof ang lining at may shoulder strap para madaling bitbitin.
Ang maliit na bag na nabanggit sa itaas ay para dalhin sa byahe, na nakatabi sa iyo o kay baby. Mahirap kung kakalkalin mo pa ang kailangan ni baby sa mga malaking bag na nakaimpake, lalo’t nasa eroplano o nasa likod ito ng kotse. Magdala din ng kahit isang extra na t-shirt o pantaas para sa ‘yo at kay Tatay, sakali mang masukahan o madumihan ni baby ang suot ninyo.
Ilista sa isang papel ang pangalan, phone number at address o pangalan ng clinic o ospital ng doktor ni baby, pati ang OB-Gyne ni nanay, at ilagay ito sa bag. Ilista din ito sa cell phone. Para ito sa mga hindi inaasahang emergency, o kung mayroong mga pagkakataon na kakailanganin ng payo ng doktor tungkol sa kalusugan ni baby.
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
