Isang kaawa-awang bata ang nalamang biktima ng child abuse matapos ilantad ng kaniyang mga kapatid ang ginagawang pagmamalatrato ng ina.
Sa sobrang tindi ng abuso na ginawa sa bata, muntik na raw itong mamatay sa gutom, ngunit sinagip siya ng kaniyang mga kapatid na patago siyang pinapakain.
5-taong gulang, biktima ng child abuse
Nalaman ng mga awtoridad ang tungkol sa pang-aabuso noong 2014, nang i-report ng isang kapatid ng batang si Jordan ang pagmamaltrato ng kanilang ina.
Ayon sa magkapatid na Cody at Allison, na 16 at 14 noong nangyari ang insidente, kapatid raw nila sa ama ang noong 5-taong gulang na si Jordan. At hindi na raw nila lubos akalain kung gaano katindi ang sinapit ng bata.
Nagulat na lamang daw si Cody nang isang beses ay silipin niya si Jordan sa kwarto nito, at nakitang buto’t-balat na ang kaniyang kapatid. Dahil dito, patago nilang pinapakain si Jordan upang hindi mamatay sa gutom.
Halos hindi raw siya pinapakain ng kanilang ina, at kinulong pa sa isang maliit na aparador na tinawag na “Harry Potter” room. Bukod dito, pinagsuot lang ng diaper ang bata upang dito dumumi.
Dagdag pa ni Cody na nakalubog raw ang mga pisngi ni Jordan. Napakarami raw niyang pasa at sugat sa kaniyang katawan, at bumubula rin daw ang kaniyang bibig.
Ang kalunos-lunos na kalagayan ni Jordan matapos ma-rescue ng mga pulis. | Source: Daily Mail
Hindi rin daw pinapayagang kumain sa hapag-kainan si Jordan. Binibigyan lang daw siya ng isang pirasong tinapay kada araw, at kapag hindi niya ito nakain agad ay binabawi ito ng kanilang mga magulang.
Bukod dito, ginagamitan din daw ng drugs si Jordan kapag mayroong mga bisita, upang mukhang natutulog lang ito. Pinaniniwalaan din ng kaniyang mga kapatid na kinukuryente siya at binubugbog ng kanilang mga magulang.
Nagdesisyon ang magkapatid na magsumbong sa pulis
Dahil sa kalunos-lunos na kalagayan ng bata, nagdesisyon ang magkapatid na Cody at Allison na magsumbong sa pulis.
Binigay raw ni Cody si Jordan sa kapatid na si Allison upang alagaan ito, at sabi ni Allison na nagulat siya sa timbang ng kapatid. Parang wala raw siyang binubuhat dahil sa gaan ng bata.
Dahil sa nangyaring pang-aabuso, nakulong ng halos 30 taon ang kanilang ina, at nakulong naman ng 15 taon ang kanilang ama.
Sa ngayon, 9-taong gulang na si Jordan at isa nang malusog na bata. Naibalik na rin siya sa kaniyang biological na ina kung saan nabibigyan siya ng sapat na pag-aalaga at pag-aaruga.
Source: Independent
Basahin: 4-Year-old girl severely abused by her own father: Child abuse must stop