Kulani sa leeg: Sintomas nga ba ng mas malalang sakit?

Karaniwang makakapa ang namamagang kulani sa leeg, na makikita sa ilalim ng panga, o di kaya kulani sa kili kili o singit.

Paliwanag ni Dr. Regent Andre Piedad, MD, ang lymph nodes o kulani ay innate o bahagi ng sistema ng ating katawan na nagsisilbing proteksiyon at pansala (filter) ng dugo laban sa mga impurities tulad ng mga impeksyon.

Makikita, makakapa o mararamdaman ito sa iba’t ibang bahagi ng katawan, pero mapapansing mas malaki at namamaga ito kapag may aktibong bacterial o viral infection sa partikular na bahagi ng katawan.

Ang kulani ay parang buto ng santol, na bahagyang gumagalaw kapag inibo. May kaunting pananakit din na mararamdaman.

Dito sa theAsianparent Philippines ay mahalaga sa amin ang makapagbigay ng impormasyon na wasto, makabuluhan, at napapanahon, ngunit, hindi ito dapat gawing pamalit sa payo ng doktor, o kaya sa medical treatment. Walang pinanghahawakang responsibilidad ang theAsianparent Philippines sa mga nagnanais na uminom ng gamot base sa impormasyon sa aming website. Kung mayroong agam-agam, ay nirerekomenda naming magpakonsulta sa doktor upang makakuha ng mas malinaw na impormasyon.

Delikado ba ito?

Ang namamagang kulani ay hindi delikado, ayon kay Dr. Piedad, bagkus ay senyales pa nga na protektado ang ating katawan. Ito ang unang pang-depensa ng katawan laban sa mga impeksiyon.

Sa madaling salita, sa unang senyales ng bacteria o virus sa katawan, hinaharang at kinukulong kaagad ito ng lymph nodes kaya’t namamaga ito, dagdag na paliwanag ni Apple Tagatha, RN, isang registered school nurse.

Kapag namaga ang isa o ilan dito, ibig sabihin ay may karamdaman ang katawan o may virus, tulad ng sipon o common cold, o kaya ay may impeksiyon sa ngipin o gums.

Kulani sa leeg

Ang pamamaga o enlargement of the lymph nodes sa bandang leeg, sa may ilalim ng panga, ay tinatawag na cervical lymphadenopathy, paliwanag ni Dr. Piedad. Karaniwang mas malaki ang lymph node sa bahaging ito ng katawan sa pagkabata hanggang adolescence.

“Pero kapag mas malaki o maga ang mga ito ng higit sa karaniwan, na may kasamang pananakit o ‘tenderness’ na parang malambot at gumagalaw nang bahagya, maaaring sintomas ito ng impeksiyon sa lalamunan, o di kaya ay upper respiratory tracts tulad ng sipon, tonsillitis, o ear infection,” dagdag ni Dr. Piedad.

Ang ibang sintomas tulad ng sipon, lagnat, sore throat, minsan ay ubo, isa o mas marami pang namamagang kulani sa iba’t ibang bahagi ng katawan, pagpapawis sa gabi, ay naglalabasan dahil nga may impeksiyon ang katawan.

Kulani sa leeg: Sintomas ng mga karaniwang impeksiyon

• Strep throat/tonsillitis
• Measles
• Ear infection
• Ngipin na may nana (abscessed)
• Mononucleosis
• Sugat na naimpeksiyon

Kung karaniwang impeksiyon lamang, pero nakakaramdam ng sakit sa namamagang kulani sa leeg, makakatulong ang pagdampi ng warm compress o mainit na tuwalya o bote na may maligamgam na tubig.

May mga gamot o pain reliever tulad ng aspirin, ibuprofen, naproxen o acetaminophen na puwedeng mabili sa botika nang walang reseta. Siguraduhin na walang allergy sa mga gamot na ito bago inumin. Iwasan lang ang pagbibigay ng aspirin sa mga bata at teenagers dahil ito ay dapat aprubado ng doktor.

Higit sa lahat, kailangang magpahinga, payo ni nurse Apple. Dahil nga may karamdaman, dapat ay sapat na pahinga ang unahin para mas mabilis maka-recover ang katawan.

Kulani sa leeg: Dapat bang ikabahala ito?

Kusang nawawala o umiimpis ang pamamaga ng kulani sa leeg kapag minor infection lang ito.

Kung ang kulani sa leeg ay patuloy na namamaga, at lumalaki pa, tumagal na ng hanggang 6 na buwan, at may kasama nang mataas na lagnat at mabilis na pagbaba ng timbang, dapat nang ikonsulta sa doktor. Sintomas ito ng pulmonary tuberculosis, ani Dr. Piedad.

Kapag ang impeksiyon na sanhi ng kulani sa leeg o sa ibang parte ng katawan ay hindi nagamot agad, maaaring magkaro'n ng komplikasyon tulad ng pagkakaro'n ng nana o abscess, at pagkakaron ng impeksiyon sa dugo (bacteremia). Kapag kumalat ang bacterial infection sa katawan, maaaring maging sepsis ito, na nakamamatay. Antibiotic ang pangunahing gamot para sa impeksiyon.

Para hindi mabahala, magpatingin kaagad sa doktor sa unang senyales ng mga sintomas na nabanggit sa itaas. Tandaan na kapag may kulani sa leeg, may impeksiyon. Kung nasaan ito, iyon ang dapat alamin, at makakatulong ang doktor para matukoy ito at mabigyan ng tamang lunas, para mapahupa ang pamamaga.

Kung ito ay dahil sa mas malubhang karamdaman tulad ng kanser, mas mabuting nalaman nang maaga kaysa mahuli ang lahat.

Ang sikreto para maiwasan ang anumang komplikasyon ay ang pagkain ng masustansiyang pagkain at balanced diet para maging matibay ang immune system.

SOURCES: Regent Andre Piedad, MD, Apple Tagatha, RN, healthline.com, WebMD, MayoClinic

Basahin: Ano nga ba ang tinatawag na kulani?