Mababang matris o uterine prolapse: Sanhi, sintomas, at lunas

Mababang matris o uterine prolapse: Sanhi, sintomas, at lunas

Mga sintomas, sanhi, pag-gamot pati ehersisyo para sa mga may prolapsed uterus.

Nagkakaroon ng uterine prolapse o mababa ang matris kapag ang pelvic floor muscles at ligaments ay nababanat at nanghihina, kaya’t di na kayang suportahan ang matris. Ang matris ay patuloy na bababa at minsan pa nga ay luluwa sa bukana ng vagina.

Ano ang uterine prolapse?

Nangyayari ito sa mga babae may mataas na body mass index (BMI), pero higit sa mga nasa edad 55 pataas, o mga babaing postmenopausal na nakapanganak na ng normal vaginal delivery, ayon sa artikulo ni Lori Smith, BSN MSN CRNP, sa Medical News Today.

Karaniwang hindi naman ito delikado, kaya’t hindi dapat ikabahala. May mga pagkakataon lang na nagkakaro'n din ng komplikasyon, tulad ng pagkapunit ng exposed tissue at pagbaba ng iba pang pelvic organs tulad ng bladder at rectum.

May mga risk factors din, na nakakapagpalaki ng posibilidad ng pagbaba ng matris, tulad ng:

  • pagbubuntis, at mga komplikasyon at trauma sa pagpapanganak (may malaking bata, at maraming bilang ng vaginal delivery)
  • edad, lalo na kapag menopausal na, dahil mababa na ang lebel ng estrogen
  • madalas na pagbubuhat ng mabigat
    kapag madalas na madiin ang pag-iri kapag dumudumi (sanhi ng constipation)
  • pag-ubo ng madalas, at malakas
  • sumailalim sa pelvic surgery
  • minsan ay nasa genes din, lalo na kung may history ng mahinang connective tissue
  • mataas na post-pregnancy BMI

Sintomas ng mababa ang matris

Dahil nasa loob at hindi kaagad nakikita, hindi madaling mapansin ng mga kababaihan na mababa ang matris. Narito ang mga tipikal na sintomas ng mababa ang matris, ayon sa librong Pelvic Organ Prolapse: The Silent Epidemic ni Sherrie J. Palm.

  • Tumatagas ang ihi nang hindi nararamdaman
  • Hirap sa pag-ihi at pagdumi
  • Masakit ang pelvic area at likuran
  • Mabigat na pakiramdam sa puwerta, na para bang may lalabas na bola
  • May nakakapang (body) tissue na nakaluwa sa bukana ng vagina
  • Masakit kapag nakikipagtalik
  • Hirap maglakad
  • Vaginal bleeding o malakas na pagdurugo

Mapapansin din na madalas ay mas matindi ang mga sintomas kapag patapos na ang araw, o sa hapon o gabi.

Ang pag-gamot para sa mababa ang matris ay depende sa kung malubha na ang kondisyon o hindi.

Kuwento ni Hilda Dualan, edad 38 at may 2 anak, nalaman niyang mababa ang matris niya nang magbuntis na siya. Dalaga pa lang daw siya ay hirap na siya kapag may buwanang dalaw dahil sa abdominal cramps at heavy flow.

Nang magbuntis siya, naramdaman niyang mabigat ang bandang puson at bukana ng ari, na parang may nakaharang o lalabas na bagay mula dito. Ayon sa kaniyang OB GYN, mayro'n siyang mababang matris.

Mula noon, hanggang siya ay manganak, may masahe na ginagawa ang doktor para matulungan siyang mapataas ng unti unti ang matris niya, kasama ng ilang gamot para mapakapit ang sanggol sa sinapupunan at hindi malaglag o lumabas nang wala sa oras. Kinailangang nga lang na ma-CS o Caesarean Delivery siya para hindi mapuwersa pang lalo ang matris niya.

Dahil sa regular na pagmamasahe at ehersisyo na itinuro sa kaniya ng kaniyang OB GYN, hindi na siya nakaramdam ng anumang sintomas mula pagkapanganak.

Ehersisyo para sa mababang matris

Kapag malala na ang uterine prolapse, o lumabas na ito sa vaginal opening, kailangan nang sumailalim sa operasyon ang pasyente. Kung ito ay mild form lamang, kakayanin pa ng ehersisyo, tulad ng Kegel exercises.

May wastong paraan ng Kegel exercise para sa matagumpay na paggamot. Kahit saan, kahit anong oras, puwedeng gawin ito para tuluyang mapatibay ang muscles ng pelvic floor.

Magtanong sa iyong health care provider o physical therapist tungkol dito.

Ang pinakasimpleng paliwanag ng Kegel exercise ay ang pag-contract ng vagina o ari, na parang nagpipigil kang umuihi. Gawin ito ng 5 segundo kada ilang minuto. Kahit ilang ulit gawin ay pwede. Karaniwang tig-limang segundo ang contraction at pahinga, nang hanggang 10 beses o higit pa sa isang araw. Habang nasasanay, puwedeng tagalan ng hanggang 10 segundo.

Makakatulong din ang regular na pag-eehersisyo at healthy diet para mapanatili ang tamang timbang na dapat sa katawan.

Ayon kay Smith, ang paggamot o pagsupil ng mga sintomas, tulad ng constipation at ubo, ay makakatulong sa pasyente.

Iwasan din ang mga risk factors, hangga’t maaari, tulad ng pag-iwas sa pagbubuhat ng mabibigat, halimbawa.

Ang mga babaing menopause na ay maaaring humingi ng payo tungkol sa nababagay na estrogen replacement therapy mula sa OB GYN.

 

SOURCES:

Pelvic Organ Prolapse: The Silent Epidemic ni Sherrie J. Palm

Uterine Prolapse, Medical News Today ni Lori Smith, BSN MSN CRNP

healthline.com

Basahin: Kegel Exercise and the Pregnant Woman: 5 easy steps to working the pelvic muscles!

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner