Pokwang nagkuwento tungkol sa naging karanasan sa relasyon nila ni Lee OBrian. Mensahe ni Pokwang sa mga taong patuloy na hinuhusgasahan siya, “hindi ninyo alam ang totoo”.
Mababasa dito ang sumusunod:
Pagkukuwento ni Pokwang sa relasyon nila ni Lee OBrian
Sa isang panayam ay nagkuwento ang komedyanteng si Pokwang tungkol sa tunay na nangyari sa relasyon nila ni Lee OBrian. Ayon kay Pokwang, maraming beses niyang pinagtakpan si Lee. Kahit na alam niyang paulit-ulit siyang niloloko nito.
“Naglalakad siya sa BGC may kasama siyang babae pino-forward sakin. Lahat ng pagtatakip sa kaniya ginagawa ko. Huhusgahan nyo ko? Hindi nyo pa po alam lahat, marami pa kayong hindi alam.”
Ito ang kuwento ni Pokwang na may pasaring rin sa mga netizens na patuloy siyang hinuhusgahan.
Pagpapatuloy pa ni Pokwang, maliban sa unfaithfulness ni Lee sa relasyon nila ay tutol daw ito noon sa pagbubuntis kay Malia.
“Nung nalaman niyang buntis ako, ayaw niya di ba? Galit na galit na siya. Kulang na nga lang dukutin niya yan. Kasi nga ayaw niya sa responsibilidad.”
“Nung pinakita ko sa kaniya yung pregnancy test napatayo sa kama. Akala ko matutuwa, galit na galit.”
Ito ang kuwento pa ni Pokwang na ilang beses daw muntik ng makunan sa anak na si Malia dahil sa stress noon na nararanasan niya.
Larawan mula sa Facebook
Anak ni Pokwang hindi daw hinahanap ang kaniyang amang si Lee
Akala ni Pokwang magbabago si Lee pag naipanganak niya na si Malia, pero ang nakakalungkot daw sa mga dumaan na birthdays ng anak ay hindi man lang ito nakaalala. Habang sa ibang bata ay may regalo ito o nagpupunta sa birthday celebrations nila.
“Dumaan ang pasko wala kang regalo, dumaan ka sa birthday ng anak mo wala kang regalo. Nakikita ko sa anak ng kaibigan mo may regalo ka, pero sa anak mo wala.”
“Hindi ako nag-aano ng materyal na bagay. Kaya ko nga bilhan ng toy store yung anak ko pag gusto ko e. Ang sinasabi ko, kahit maliit na bagay naalala mo yung anak mo, masayang-masaya na yan.”
Ito ang sabi pa Pokwang.
Kuwento pa ng komedyante ngayon na na-deport na si Lee ay hindi naman daw ito hinahanap ng anak nilang si Malia. Dahil sabi pa niya, noong nandito daw si Lee sa Pilipinas ay hindi man lang ito nag-effort na makasama ang anak.
“Wala siyang na-invest na emosyon sa anak niya kaya bakit siya hahanapin. Walang natatandaan yung bata, bakit siya hahanapin.”
Ito ang matapang na pagkukuwento pa ni Pokwang.
Larawan mula sa Instagram account ni Lee O’Brian
Ayon pa kay Pokwang, pagdating sa pagiging ama sa anak na si Malia ay hindi niya daw sinisiraan si Lee. Pero hindi niya daw itatago sa anak ang naging karanasan niya sa ama nito.
“Hindi ko siya sisiraan sa anak niya, pero sasabihin ko sa anak ko yung totoo. Hindi ako magdadagdag ng kuwento, sasabihin ko yung totoo.”
Ito ang malungkot pang pahayag ni Pokwang tungkol sa dating karelasyon na si Lee OBrian.
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
