Aktres na si Sherilyn Reyes Tan at kaniyang pamilya napilitang lumipat ng bahay dahil sa nakakatakot na karanasan sa “imaginary friend” ng 10-anyos na anak.
Mababasa sa artikulong ito:
- Kababalaghang nagaganap sa dating bahay nila Sherilyn Reyes Tan.
- Anak ni Sherilyn na babae mayroong imaginary friend.
Kababalaghan sa dating bahay ng aktres na si Sherilyn Reyes Tan
Kamakailan lang ay muling nakita ng kaniyang mga fans on national TV ang aktres na si Sherilyn Reyes. Ito ay nang mag-guest siya sa talk show program na Mars Pa More sa GMA na kung saan sina Iya Villania at Camille Pratts ang host ng programa.
Sa naturang programa ay ibinahagi ni Sherilyn ang nakakatakot na naging karanasan ng kaniyang pamilya sa dati nilang bahay. Ayon kay Sherilyn, higit sa sampung taon sila doon namalagi ng kanilang pamilya.
Marami mang mga memories doon na nabuo at pinagkakaingatan ang mga pamilya niya ay kinailangan nilang lisanin ito. Dahil ayon kay Sherilyn, mayroon umanong ibang entity ang nakatira dito.
Sa katunayan, sa loob ng sampung taon ay nakasanayan na nila ito at hindi nagdudulot sa kanila ng takot at pag-aalala. Hanggang sa isang araw ay may nalaman silang nagpatindig ng mga balahibo nila. Lalo na sa kaniya na isang ina na hinding-hindi papayag na mawala sa kaniya ang anak niya.
Kuwento ni Sherilyn, ayon sa bisita nilang may 3rd eye ng makita ang anak niyang babae, ito umano ay may kasamang dalawang bata. Ang mga bata umano na kasama nito ay may marka na mga numero na 9 at 13. Habang ang anak niya ay may marka ring numero na 14.
Image from Sherilyn Reyes Tan's Facebook account
Anak ni Sherilyn bigla na lang mawawala sa 14th birthday niya
Maliban sa dalawang bata na nakita ng kanilang bisita na hindi nila nakikita, mas kinatakot ni Sherilyn ang kahulugan ng numerong 14 na iminarka sa anak niya.
“Iyong bahay namin before, we lived there for more than 10 years. Tapos meron talagang ibang entity na parang nakasanayan na namin.
Then there was a time na nagkaroon kami ng bisita na medyo malakas siguro yung 3rd eye niya. Nakita niya 'yong daughter ko pagbaba ng hagdanan. Tapos sabi niya alam mo minarkahan siya.
May kasama siyang dalawang bata, 9 and 13, tapos minarkahan daw ng 14 sa likod. Meaning on or before her 14th birthday, matutulog na lang siya, hindi na siya gigising.”
Ito umano ang sabi ng kaniyang bisita na kahulugan ng nakitang numero sa likod ng anak niya.
Ayon sa anak ni Sherilyn siya ay may playmate na siya lang ang nakakakita
Image from Sherilyn Reyes Tan's Facebook account
Kaugnay nito ay nagsabi rin daw ang anak niya sa naturang bisita na bumalik ang dati niyang playmate o imaginary friend. Nakiusap umano ito na huwag sasabihin sa kanila na mga magulang niya ang tungkol dito.
Dito mas lalong tumindig ang balahibo nila Sherilyn. Kaya naman totoo o hindi nag-desisyon silang umalis sa dati nilang bahay at lumipat nalang sa iba.
“So alam mo 'yon, whether or not na totoo parang alis na tayo dito.”
Ito nalang daw ang nasabi ni Sherilyn sa kaniyang asawa at mga anak nila.
BASAHIN:
Is having imaginary friends normal or dangerous? Experts weigh in on the issue
Madali naman umano nakahanap ng bagong bahay na lilipatan sina Sherilyn. Pero hindi naging madali ang paglipat nila. Dahil sa pagtaka pa lamang nilang pag-alis ay may mga kababalaghan pang naranasan ang kaniyang pamilya.
“Nakakita kami ng bahay na lilipat. Then noong time na pinakita namin sa mga bata, that was the first time she saw it. Pag-uwing pag-uwi namin naubo lang 'yong husband ko and then nagyaya na siya sa ospital.”
Ang nakakagulat umano higit sa isang linggo sa ospital ang asawa niya. At ang simpleng pag-ubo nito ay nakitang dahil umano sa lacerations sa kidney niya.
Dahil sa nangyari halos 3 buwan umano hindi makagalaw at makakilos ng maayos ang asawa niya. Ayon sa may 3rd eye na nakakita ng kababalaghan sa bahay nila, ito umano ay nangyayari dahil sa pinipigilan silang umalis ng masamang elementong nakatira sa dating bahay nila.
Image from Sherilyn Reyes Tan's Facebook account
Para makalipat ng maayos ay nagsagawa pa sila ng ritwal
Para masigurong makakalipat sila ng maayos ay nagsagawa ng ritwal sila Sherilyn sa bago nilang bahay. Pero hanggang doon ay hindi natapos ang kababalaghan na nararanasan nila.
“Paglipat pa namin may ritwal pa kaming ginawa, ganoon din. Umpisa palang ng ritwal nabasag na yung bowl of salt na dala ng isang anak ko.”
Noon umano ay nataranta sila at hindi alam ang gagawin. Pero ginawa nila ang lahat para matapos ang ritwal. Sa awa ng Diyos ay nagawa nila ito ng maayos at natapos. At ngayon ay tahimik at masaya na ang kaniyang pamilya sa bagong bahay nila.