Kamakailan lang ay naibalita na nilinis na ng ating gobyerno ang tambak-tambak na basura sa Manila Bay. Mabilis na nag-viral ang balita, at ilang araw lang ay dinadagsa na ng mga tao ang Manila Bay. At kahit na mahigpit na ipinagbabawal ang paglangoy dito, mayroon pa ring ilang mga mamamayan na lumalangoy sa dagat. Kabilang na rito ang isang 11-taong gulang na batang babae, na nalunod at muntik nang mamatay habang lumalangoy.
Batang babae, nalunod sa Manila Bay
Ayon sa ina ng batang si Rhianne Janiel Soriano, isang grade-6 student, nag-aya raw ang mga kaibigan ng kaniyang anak na lumangoy sa bagong linis na Manila Bay. Hinayaan lang ng ina ang kaniyang anak na lumakad ang mga kabarkada, ngunit hindi niya lubos akalain ang sakunang mangyayari sa anak.
Mga bandang alas-singko raw ng hapon ay lumalangoy ang mga magkakaibigan sa dagat. Ngunit sa kasamaang palad, nalunod daw si Rhianne at nakalunok ng maraming tubig-dagat. Sa kabutihang palad, agad namang nai-rescue ang bata ng tauhan ng MMDA. Ngunit nang mailabas raw ito sa dagat ay nagsimula raw itong magsuka, at nanigas ang kaniyang katawan. Ang mga tauhan rin ng MMDA ang nagdala ng bata sa ospital.
Bagama’t nailigtas ang bata, naka-confine pa rin ito sa ICU at inoobserbahan ang kaniyang kalagayan. Umaasa naman ang kaniyang ina na gagaling si Rhianne, at sana raw ay may tumulong sa kanila ukol sa pagpapagamot ng kaniyang anak.
Hindi pa rin ligtas lumangoy sa Manila Bay
Bukod sa posibilidad ng pagkalunod, maraming panganib ang kinakaharap ng mga taong lumalangoy sa Manila Bay. Ito ay dahil bagama’t nilinis na ang dalampasigan, madumi pa rin ang tubig na nasa Manila Bay.
Mataas ang levels nito ng coliform at iba pang mga bacteria na puwedeng maging sanhi ng sakit sa tao. Puwede itong magdulot ng iba’t-ibang mga impeksyon at sakit sa balat, pati na rin ang pananakit ng tiyan, pagsusuka, at pagtatae.
Kaya nga hinihikayat ng lokal na pamahalaan ng Maynila na huwag lumangoy ang mga tao sa Manila Bay. Nagpaplano na silang maglagay ng harang at mga babala upang umiwas ang mga tao sa paglangoy dito.
Paano makakaiwas sa pagkalunod
Kapag nagbabakasyon ang mga pamilya, normal na ang pumupunta sa beach o kaya sa swimming pool. Bagama’t masaya ang lumangoy at magtampisaw sa tubig, mahalaga pa rin na mag-ingat ang mga bata upang hindi sila malunod habang lumalangoy.
Kahit nga ang mga taong marunong lumangoy ay posible pa ring malunod, kaya importante ang pag-iingat. Heto ang ilang mga tips para maging safe habang lumalangoy.
- Huwag lumangoy sa malalim, o kaya sa mga lugar kung saan kakaunti lamang ang mga tao
- Magsuot ng salbabida o kaya floaters kapag hindi sanay lumangoy
- Wag masyadong lumangoy sa malayo, dahil kung ikaw ay malunod, mahirap ang magiging pag-rescue
- Turuan ang mga bata na sa dalampasigan lang maglaro, at umiwas na pumunta sa malalalim na bahagi ng dagat
- Bago lumangoy, alamin muna kung gaano kalalim ang dagat o pool upang masiguradong ligtas lumangoy dito
- Hangga’t-maaari lumangoy lamang sa mga lugar kung saan mayroong lifeguard na puwedeng magligtas sa mga nalulunod
Source: Radyo Inquirer