Nakadadagdag ba sa stress niyo ang anak na parating galit? Napapansin mo bang mas marami nang panahon na siya ay naiinis kaysa sa nasisiyahan? Alamin sa ilang paraan para malaman kung anxiety na ba ito.
Mga mababasa sa artikulong ito:
- Ano ang anxiety?
- 4 na paraan para malaman kung anxiety sa bata ang nararanasan ng anak mo kapag galit siya
- 5 mga tips kung paano iha-handle ang anxiety sa bata
Ano ang anxiety?
Ang anxiety ay ang normal na reaksyon ng ating katawan at utak kung makatatagpo ng problem o stress. Mayroong mahalagang papel ito sa buhay natin.
Kung nakaka-detect ang utak ng panganib, tinutulungan tayo nito maghanda at mag-focus sa panganib na iyon. Ibig sabihin isa parte ito ng three fundamental ways kung paano nagre-respond ang utak sa mga stress: fight, flight, and freeze.
Ano naman ang anxiety disorder? Ito naman ay kung hyper-attuned na ang threat-detection monitors. Kumbaga ay parati nang naka-alert ang isip at katawan para sa panganib na paparating.
Halimbawa ang mga bagay na hindi naman talaga dapat katakutan ay kinatatakutan na rin, kaya naman nauuwi ang isip at katawan sa fight, flight, at freeze mode. Dito hindi na nagiging normal ang anxiety response at parte na ng mental health problems.
4 na paraan para malaman kung anxiety sa bata ang nararanasan ng anak mo kapag galit siya
Larawan mula sa Pexels
Posible nang makaranas kaagad ang bata ng anxiety disorder sa murang edad nila. Mas mahirap nga lang malaman dahil hirap sa pag-e-express o pagpapaliwanag ng kanilang nararamdaman ang mga bata.
Kung napapansin mong parati nang nagta-tantrums o kaya ay galit, maaaring i-consider ang pagkakaroon nila ng anxiety disorder. Ito ang ilang senyales:
1. Obserbahan ang level of anxiety ng anak
Pwedeng simulan sa pag-oobserba kung paano ba ang level ng anxiety ng iyong anak. Maaaring pakinggan kung paano siya nakikipag-usap.
Tignan din kung paano siya nakikipaglaro sa kanyang mga kaibigan. Pana-panahong obserbahan kung paano ba ang behavior ng bata. Ito ba ay naiiba sa iba’t ibang taong nakakasalmuha niya o kaya ay pareho lang sa lahat ng tao.
2. Tignan kung nakararanas ba siya ng extreme meltdowns
Nagmumula ang extreme meltdowns sa labis na anxiety dala ng life and death na pangyayari. Maaaring makita na ang anak ay parang ibang tao na. Kung minsan sila ay magmumura, manununtok, mananadyak at iba pang bayolenteng pagtugon sa mga nangyayari
3. Pansinin kung paano sila magsabi ng kanilang mga kinatatakutan
Ang unang lalapitan ng bata ay kung saan sila nakararamdam na sila ay ligtas, madalas sa mga magulang. Pansinin kung paano nila sinasabi ang mga kinatatakutan nila. Alamin kung saan ito nanggagaling at kung labis-labis na ba ang anxiety na kanilang nararamdaman.
4. Kumonsulta sa mga eksperto
Ang mga naunang paraan ay maaaring subukan sa inisyal na obserbasyon. Kung napapansin nang dumadalas ang sobra-sobrang galit at tantrums ng anak, mabuting kumonsulta na sa eksperto.
Simulan sa kanilang pediatrician para malaman kaagad kung bakit ganito ang kinikilos ng iyong anak. Siya na rin ang magsasabi kung kinakailangan na ba ni baby ng psychiatric evaluation.
BASAHIN:
Pagyakap sa unan nakatutulong sa anxiety ayon sa mga experts
Mga hakbang upang mabawasan ang stress at anxiety ng iyong anak
5 mga tips kung paano iha-handle ang anxiety sa bata
Ang mga magulang ang unang makatutulong sa mga bata to overcome their fears. Para malaman ang ilang tips kung paano iha-handle ang anxiety ng iyong anak, inilista namin ang ilan dito:
1. Alamin kaagad ang nakapagpapatrigger ng kanilang stress
Mas mainam kung nalalaman kaagad ang stress ng bata sa lalong madaling panahon. Dapat ay mapagmatyag sa kanilang kinikilos. Sa ganitong paraan, nakikita kaagad kung alin sa mga bagay sa paligid ang nakakapagtrigger sa kanilang anxiety disorder.
2. Iwasang mag-utos
Bagaman gusto ng mga magulang na kumalma kaagad ang mga anak, ang pag-uutos sa kanila ay maling paraan. Hindi nakatutulong ang pagsasabi ng, “Tumahimik ka na at kumalma.”
Mas nakakadagdag lamang ito ng takot sa kanila. Dapat ay tanungin sila kung ano ang pwedeng gawin upang kumalma ang kanilang pakiramdam.
3. Bigyan sila ng oras at panahon para mag-recover
Hindi instant ang pagbabalik ng kanilang sigla. Gaya ng tip no. 2, hindi dapat minamadali ang mga bagay dahil lalo lang nila itong ikatatakot. Bigyan ang mga anak ng oras at panahon para manumbalik sa normal nilang kundisyon.
4. Patibayin ang koneksyon sa anak
Mas magiging komportable ang iyong anak kung may matibay na bonding sa isa’t isa. Dito siya kasi mararamdaman na ligtas siyang magsabi ng kanyang mga nararamdaman.
5. Ituro ang ilang mga calming skills
Maaaring mag-research o magtanong sa eksperto kung ano-ano ang pwedeng iturong calming skills sa anak. Isa na diyan ang counting breaths.
Ilan lamang ito sa mga dapat nating malaman, tandaan na mahalagang i-acknowledge ang nararamdaman ng ating anak at intindihin sila. Sapagkat kahit bata pa sila ay maaari na silang makaranas ng anxiety.