Usong-uso ngayon ang mga trick or treat sa mga bata. At siyempre, kung talagang seseryosohin mo ang costume ng iyong anak, kailangang gumamit ng face paint para buo ang kanilang costume.
Ngunit alam niyo ba na posibleng magkaroon ng masamang epekto ito sa balat ng iyong anak? Paano nga ba malalaman kung ligtas ang binili ninyong pintura? At ano ang dapat gawin kapag nagkaron ng rashes o allergic reaction ang iyong anak?
Heto ang payo ni Dr Alan Levy, mula sa Levy Dermatology sa Memphis, Tennessee.
Face paint ng bata, dapat siguraduhing safe
Lubhang sensitibo ang balat ng mga bata, kaya importanteng metikuloso pagdating sa mga produktong nilalagay sa balat nila, lalong lalo na sa mukha.
Kahit nga ang mga ‘safe’ na face paint ay posibleng maging sanhi ng rashes kung hindi sila hiyang dito. Ngunit paano ba malalaman ng mga magulang kung ligtas bang gamitin ang mga pinturang ito sa balat ng anak nila?
Basahing mabuti ang ingredients
Dahil cosmetic products ang mga pintura sa mukha, hindi kasinghigpit ang mga standards nito kumpara sa pagkain. Ibig sabihin, may ilang mga brands na mayroong mas matataas na lebel ng lead, paraben, formaldehyde, at mercury. Ang mga mineral na ito ay madalas ginagamit upang magbigay ng kulay sa paint.
Hanapin ang mga face paints na may natural pigments na galing sa mga prutas at halaman. Siguradong mas organic ang mga ito at hindi magiging sanhi ng rashes, allergy, at iba pang sakit sa balat para sa iyong anak.
Huwag bumili ng pintura sa kung saan-saan
Hindi na kami magpapatumpik-tumpik pa. Mahal talaga ang mga face paint para sa mga bata, lalong-lalo na yung mga brand na organic at natural.
Ang mga nabibili mong mga mumurahing pintura sa tabi-tabi ay hindi sulit dahil baka mapagastos ka pa lalo sa pagpapagamot ng iyong anak. At siyempre sino bang magulang ang gustong magkasakit ang kanilang anak dahil lamang sa pagtitipid?
Kaya’t pumili ng mga mas mamahaling pero mas katiwa-tiwalang mga brand ng face paints. Iwasang bilhin ang mga nakikita lang sa tabi-tabi o yung mga may hindi katiwa-tiwalang brand. Iwasan din ang mga face paints na hindi nakasulat ng malinaw kung ano ang mga ingredient.
I-test muna sa ibang bahagi ng katawan
Bago ilagay sa mukha ng iyong anak, kumuha muna ng kaunting face paint at ipahid sa ilalim ng braso. Takpan ito ng band-aid, at maghintay ng 24 hanggang 96 na oras. Ito ay dahil may mga kemikal na natatagalan bago magkaroon ng masamang epekto
Kapag nagkaroon ng pamumula o pangangati, huwag nang gamitin ang iyong nabiling pintura, dahil posibleng may allergy dito ang iyong anak.
Huwag ding pakadamihan ang ilalagay na pintura sa iyong anak, lalong-lalo na sa bandang mata. Ito ay dahil sensitibo ang bahaging ito ng mukha, at posibleng maging iba ang reaksyon nito sa pintura.
Tanggalin ito agad!
Kahit gustong-gusto ng iyong anak ang inilagay mo na face paint, mabuting tanggalin mo ito agad kapag tapos na ang trick or treat. Ito ay dahil nakakabara sa mga pores ang pintura, at posibleng magkaroon ng masamang epekto sa balat nila, kahit na wala itong masamang mga kemikal.
Gumamit ng malinis na tubig at mild na sabon, at dahan dahang tanggalin ang face paint ng iyong anak.
Iwasang gumamit ng make-up remover o alcohol, dahil baka masyado pa itong matapang para sa sensitive na balat ng mga bata.
Source: Daily Mail
Basahin: Dahil sa garapata, isang bata muntik nang mabingi!