Garapata na nakita sa tenga ng bata, paano nga ba maiiwasan?

Garapata na nakita sa tenga ng bata, paano nga ba maiiwasan?

Ang garapata sa bahay ng batang nabiktima ay galing raw sa alagang aso nito. Buti na lang naagapan agad bago pa ito nakapaminsala.

Ang mga aso ay tinatawag nga “man’s best friend;” at tama lang ito, dahil ang mga aso ay likas na malapit sa tao. Ngunit paano kung ang pinakamamahal mong aso ay magiging sanhi ng panganib para sa anak mo? Ganito na lang ang nangyari sa isang 4 na taong gulang na bata na muntik nang mabingi dahil sa garapata sa bahay.

At saan kamo nanggaling ang garapata? Ito raw ay galing sa kaniyang best friend na aso. Paano kaya ito nangyari, at nasa panganib ba ang mga anak mo kung may alaga kayong aso?

Garapata sa bahay, mapanganib ba ito?

garapata sa bahay

Garapata sa bahay at ng aso | Image from Flickr

Alam niyo ba na hindi insekto ang mga garapata? Ang mga garapata, o tick, ay kapamilya ng mga gagamba. Madalas silang nakikitang nakadikit sa balat ng mga hayop habang humihigop ng dugo. Ngunit paminsan, posible din silang dumikit sa mga tao, at higupin ang dugo natin!

Ito na lang ang nangyari sa 4 na taong gulang na si AJ, nang pumasok sa tenga niya ang isang garapata mula sa kanilang alagang si Yuki.

Akala ni AJ ay gagamba ang pumasok sa tenga niya

Nagulat na lang daw ang ama ni AJ nang sinabi sa kaniya na tanggalin daw ang “spider” sa tenga niya. Akala ng nanay ni AJ na nagbibiro lang ang bata. Ngunit pagsilip nila sa tenga, nagulat silang mayroong garapata sa tenga ng bata.

Ang garapata daw na napunta sa tenga ng bata ay galing sa alaga nilang aso na si Yuki. Sa tingin ng ina ni AJ, baka raw nakuha ng alaga sa ibang aso ang garapata dahil inilalabas daw nila ito sa bahay kapag dudumi o iihi.

Sa kabutihang palad, natanggal ng tatay ni AJ ang garapata sa tenga ng bata.

garapata-sa-bahay

Garapata sa bahay at ng aso

Ano ang epekto ng kagat ng garapata?

Kapag ang mga tao ay nakagat ng garapata, posible silang magkaroon ng pangangati, rashes, at minsan allergic reaction na posibleng maging nakamamatay.

Ang mga garapata ay nagiging sanhi rin ng lyme disease na sanhi ng mataas na lagnat, pananakit ng ulo, at matinding pagod. Bukod dito, sanhi rin ito ng babeosis, rocky mountain fever, at ehrlichiosis. Posible din magkaroon ng blood parasites kapag nakagat ng mga garapata.

Hinding-hindi din dapat pinipisa ang mga garapata dahil lalo lang kakalat ang mga itlog ng garapata. Mas mabuti raw na kapag nakuha na ang garapata ay ilagay ito sa fabric conditioner, bleach, o kaya gaas upang mapatay ang mga ito.

Mabuti ring bumili ng anti-tick soap at ng anti-tick medicine na ipinapahid sa balat ng aso. Ito ay upang matanggal ang mga garapata sa iyong alaga.

Importante ding panatilihing malinis ang paligid upang hindi kumalat ang mga garapata. Bukod dito, nakakatulong din na huwag masyadong ilabas ang iyong alagang aso upang hindi sila mahawa ng garapata mula sa ibang aso at hindi magkaroon ng garapata sa bahay niyo.

garapata-sa-bahay

Garapata sa bahay at ng aso | Image from Unsplash

Mga sakit na maaaring makuha sa garapata ng aso

1.  Lyme disease

Ito ang pinakakilalang sakit na maaari mong makuha sa kagat ng garapata ng aso. Ang sintomas nito ay mga rashes, lagnat, headache at fatigue. Kung hindi ito maaagapan agad maaari itong magdulot ng serious complication sa nervous system ng isang tao.

2. Ehrlichiosis

Ito ay sanhi rin ng garapata sa bahay at ng aso. Ang mga sintomas nito ay pananakit ng katawan hanggang sa magkaroon ng malalang lagnat.

3. Rocky Mountain spotted fever

Ang garapata sa bahay at ng aso ay maaaring maghatid ng sakit na ito. Nagsisimula ito sa lagnat at pananakit ng ulo hanggang sa magkakaroon na ng rashes. Madali itong makikita dahil sa malilit na spot na pagdurugo sa bukong-bukong.

4. Tularemia

Ang simpleng garapata sa bahay ay maaaring magdulot sa katawan ng tao ng isang seryosong sakit katulad ng Tularemia. Isa itong rare disease na dala ng garapata ng aso. Inaatake nito ang balat, mata, baga at lymph nodes ng isang tao.

Paano maiiwasan ang garapata?

Kung may alagang aso, panatilihin lamang ang kalinisan sa kanya. Paliguan araw araw at makabubuti kung gagamit ng sabon na pang-iwas sa mga garapata. Iwasan rin ang pagtambay ng mga aso sa malupa at maduming lugar. Dito kasi nakatira ang mga garapatang maaaring dumikit sa balahibo ng aso. Kung patatagalin at hindi paliliguan ang mga ito, maaaring dumami agad ito at mag sanhi ng galis sa aso.

 

Source: GMA News

Basahin: Desiccant pack sumabog at ikinabulag ng isang bata

Dito sa theAsianparent Philippines ay mahalaga sa amin ang makapagbigay ng impormasyon na wasto, makabuluhan at napapanahon ngunit hindi ito dapat gawing pamalit sa payo ng doktor, o kaya sa medical treatment. Walang pinanghahawakang responsibilidad ang theAsianparent Philippines sa mga nagnanais na uminom ng gamot base sa impormasyon sa aming website. Kung mayroong agam-agam, ay nirerecomenda naming magpakonsulta sa doktor upang makakuha ng mas malinaw na impormasyon.

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

Article Stories
app info
get app banner