Magkasintahang frontliners nagpakasal sa hospital sa Bacolod City.
Image from Adventist Medical Center Bacolod
Magkasintahang frontliners nagpakasal sa hospital
Hindi napigilan ng kumakalat na sakit na COVID-19 ang pagpapakasal ng magkasintahang sina Jim Gerona, 36 at Jehracel Torrentira, 30. Ang dalawa ay kapwa frontliners na nagtratrabaho sa Bacolod Adventist Medical Center o BAMC. Ang ospital na kung saan isinagawa rin ang seremonyas ng kanilang kasal.
Ayon sa pahayag ng Bacolod Adventist Medical Center sa kanilang Facebook account, si Jim ay nagtratrabaho umano sa diagnostics department ng ospital. Habang si Jerahcel naman ay nakatalaga sa records section.
Una na sanang nakatakdang isagawa ang kasal ng dalawa sa Cebu. Ngunit dahil sa ipinatutupad na Enhanced Community Quarantine o ECQ ay nagdesisyon silang hindi na gawin pa ang kasal roon. Ngunit hindi nila naisip na ipagpaliban ito lalo pa’t siyam na taon silang nagtiis sa long distance relationship. Kaya naman anuman ang mangyari ay itinuloy nila ang kasal nitong Abril 8. At ito ay isinagawa sa conference room ng Bacolod Adventist Medical Center.
Kasal sumunod sa precautionary measures at safety protocols
Pero dagdag na pahayag ng ospital, sila ay sumunod sa lahat ng precautionary measures at safety protocols na ipinatutupad ng Department of Health. Gaya nalang ng social distancing na makikita sa mga litrato ng ginanap na kasal. Limitado lang ang dumalo sa seremonyas ng kasal. Tanging apat na principal sponsors lang ang imbitado. Habang tanging ang pastor na nanguna sa kasal at ang photographer na kumuha ng larawan ng pag-iisang dibdib nila ang laman ng conference room maliban sa magkasintahan. Lahat rin sa kanila ay nakasuot ng face masks na ipinapayong gawin ng bawat isa kung sakaling makikihalubilo sa iba. Ang face mask ng magsintahan ay tinanggal lang ng saglit sa parteng kailangan na nilang selyuhan ang kanilang pag-iisang dibdib ng isang halik.
Pagkatapos ng seremonyas ng kasal ay saka naman sila nagikot-ikot sa ospital para sa kanilang post-nuptial photoshoot. At para narin maibahagi ang mahalagang yugto na iyon ng kanilang buhay sa mga katrabaho at kaibigan nila.
Kasalan sa panahon ng COVID
Una ng nakiusap si Inter-agency Task Force o IATF at Cabinet Secretary Karlo Nograles sa mga magpapakasal ngayon sa gitna ng COVID-19 pandemic na kung maari ay ipagpaliban muna ng kanilang plano. Lalo na kung ang kanilang gaganaping kasal ay engrande at dadaluhan ng maraming tao. Dahil ito ay lalabag sa ipinatutupad na enhanced community quarantine na nagbabawal ng mass gathering.
“Prohibited po. Arms length ang sinasabi namin lagi. Arms length ang distancing ng bawat isa. Sa wedding, paano magki-kiss ang couple? Paano ‘yung distansiya nung couple? Ang daming adjustments na kailangang gawin,” pahayag ni Nograles sa isang panayam.
Dagdag pa niya timeless naman daw ang pag-ibig at hindi naman magiging malaking kawalan ang isang buwang pagpopostpone ng kasal.
“Alam natin na timeless and boundless naman ang pag-ibig. What is a one-month postponement for love?” dagdag pa niya.
Iba naman ang paniniwala ni Department of Trade and Industry Secretary Ramon Lopez tungkol sa usapin.
Puwede basta susunod lang sa social distancing
Para sa kaniya, hindi mapipigilan ang pag-ibig. Kaya naman mas mabuting mag-adjust nalang ang mga magpapakasal sa batas na kasalukuyang ipinatutupad sa bansa.
” Ako ang tingin ko ang kasal, hindi po mapipigilan ang pag-ibig. Bawasan na lang nila ‘yung guests, makakatipid pa sila. Yung social distancing kailangang ma-observe. Bawal ang mass gathering.”
Ito ang pahayag ni Lopez sa isang panayam.
Dagdag pang pahayag ni Lopez, makakasunod parin naman sa social distancing ang bagong kasal kahit na pagdating sa parte na kailangan ng halikan ng groom ang bride. Imbis na lips to lips, puwede naman daw muna ang flying kiss.
Refund para sa mga na-cancel na kasal
Para naman sa mga magkasintahang nag-desisyon ng ipagpaliban muna ang kanilang kasal ay may siniguro naman si Sec. Lopez sa kanila. Ayon sa kaniya, kung nakapagbook na ng hotel, restaurant at iba pa, maari silang mag-request ng refund sa mga naibayad na nila.
“Dapat ho may refund kasi force majeure po yun so wag silang matakot na ‘naku paano ‘to nagdown na kami tapos ayaw irefund?”
Ito ang pahayag ni Lopez. Hindi rin daw dapat matakot ang mga magpapakasal na gawin ito. Dahil kung sakaling hindi sila pinagbigyan ng refund ng kanilang nakausap ng supplier o contractor ay maari silang magsumbong sa DTI upang ito ay agad na maaksyunan.
“Wag silang matakot kung ayaw i-refund. Puwede silang mag-file ng complaint sa DTI Consumer Complaint 1384 hotline. Papanigan po sila ng DTI para magrefund yung establishment”, sabi pa ni Lopez.
Source: CNN, ABS-CBN News
Basahin: Hanggang kailan valid ang kasal kung walang record sa Civil Registry?
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
