#AskDok: Ano ang gamot para sa baradong ilong dahil sa sipon?

#AskDok: Ano ang gamot para sa baradong ilong dahil sa sipon?

Abala na nga ang sipon at ubo, ano pa kaya kung magbabara pa ang ilong? Sa ating pananaliksik at panayam kay dok, inalam natin ang iba’t ibang gamot sa baradong ilong at mga pamamaraang maaaring gawin upang maibsan ang indikasyong nararanasan.

Tulad ng sipon at ubo, sanhi ng daan-daang virus ang paghantong sa baradong ilong ng isang pasyente. Nakukuha ito sa pamamagitan ng mga airbone droplet na nagtataglay ng virus, o maaaring direkta sa mga bagay na nakakapitan ng impeksyon tulad ng sipon o plema. Kapag may pagbabara ang ilong, nagdudulot ito ng discomfort sa pasyente dahil bukod sa nahihirapang makapagsalita nang maayos, lalo ring hirap huminga at matulog. Ano-ano nga ba ang gamot sa baradong ilong na maaaring gamitin ng mga nakararanas nito?

Dito sa theAsianparent Philippines ay mahalaga sa amin ang makapagbigay ng impormasyon na wasto, makabuluhan, at napapanahon, ngunit, hindi ito dapat gawing pamalit sa payo ng doktor, o kaya sa medical treatment. Walang pinanghahawakang responsibilidad ang theAsianparent Philippines sa mga nagnanais na uminom ng gamot base sa impormasyon sa aming website. Kung mayroong agam-agam, ay nirerekomenda naming magpakonsulta sa doktor upang makakuha ng mas malinaw na impormasyon.

Baradong ilong: Mga sintomas at sanhi

Bago natin alamin ang mga maaaring gamot sa baradong ilong, atin munang tukuyin ang mga sintomas at sanhi ng karamdamang ito.

Ayon sa internist na si Dr. Ann Meredith Garcia Trinidad, hindi maaaring ihiwalay ang kaso ng sipon at ubo sa pagkakaroon ng baradong ilong. Dahil pangkaraniwang bahagi ang mga ito ng sintomas sa ilalim ng upper respiratory tract infection o URTI. Bagaman, ang pagbabara ng ilong ay maaaring kaugnay ng iba pang kondisyon tulad na lamang ng allergic rhinitis.

Hindi naiiba sa iba pang mga sakit, mayroon itong sintomas na maaaring mapuna ng pasyenteng nakararanas ng kakaiba sa kaniyang katawan.

  • sinisipon
  • kawalan ng pang-amoy
  • hirap huminga sa pamamagitan ng ilong
  • ubong mas malala kapag gabi
  • namamaga at paminsan-minsang pamimintig ng paligid ng mata, noo, at/o pisngi
  • masakit ang tainga, ngipin, at ulo
  • pangangati ng lalamunan
  • pagbaho ng hininga
  • pagkakaroon ng lagnat
  • kahirapang matulog sa gabi
  • mabilis mapagod

Maraming posibleng dahilan naman ang maaaring pagmulan ng pagbabara ng ilong. Sa pangunahin, sanhi ito ng pamamaga ng mga daluyan ng dugo sa sinus sa bahaging itaas ng ating ilong. Sa iba pang pagkakataon, ang pagbabara ay maaaring idulot ng iba’t ibang sanhi gaya ng mga nasa ibaba.

  • iba’t ibang uri ng virus
  • allergy
  • acute or chronic sinusitis
  • sipon
  • labis na paggamit ng decongestant
  • pag-abuso sa iba pang gamot
  • tuyong hangin sa paligid
  • usok ng sigarilyo
Gamot sa baradong ilong at iba pang maaaring gawin ng pasyente

Ayon kay Dr. Trinidad, oras na makapasok na sa katawan at sistema ng tao ang mga virus na may dalang sakit, inaasahan na ang mabilis na pagdudulot nito ng mga sintomas sa loob ng dalawa hanggang tatlong araw. Habang ang tuluyang paggaling naman, na inaasahang nasa loob lamang ng pito hanggang sampung araw, ay nakabatay sa pangkalahatang lagay ng kalusugan ng katawan ng pasyente.

Dagdag pa ni dok, makabubuting magsilbing gamot sa baradong ilong ang anumang mainit na inumin o sabaw para sa ikaluluwag ng paghinga. Maaari rin ang mga over-the-counter preparation tulad ng decongestants, antihistamines, at nasal sprays para sa sipon, na isa sa mga kadalasang sintomas at sanhi na rin ng baradong ilong.

Batay sa mga pananaliksik, nakapagpapaluwag ng mga namamagang ugat sa daluyan ng dugo at hingahan sa pababa at pataas na bahagi ng ilong. Ito ang nagtutulak upang gumaan-gaan ang paghinga ng pasyente, dahil na rin sa nakapagpapalabnaw ito ng sipon ng pasyente.

Ang ilan naman sa maaari pang gawin na makapagpapaluwag ng baradong ilong, hanggang sa tuluyang pag-alis sa sintomas at indikasyon nito ay ang sumusunod:

  • paggamit ng humidifier para makapag-alis ng alinsangan at mag-moisturize ng paligid para numipis ang sipon o iba pang likido sa ilong;
  • paliligo ng mainit na tubig para makabawas ng pamamaga ng mga ugat sa loob ng ilong;
  • ugaliin ang pag-inom ng maraming-maraming tubig at iba pang inuming masustansiya;
  • paggamit ng saline spray, na maaaring saline solution na nabibili sa botika o sariling gawa sa bahay na saltwater solution (tubig na hinaluan ng asin); at
  • warm compress sa noo, sa paligid ng ilong, at sa pagitan ng magkabilang mata.

Sa huli, mahalagang maisaalang-alang ang tagal nang panahong nag-iinda ang isang pasyente ng pagbabara ng ilong. Kung hindi sapat ang mga nabanggit na gamot sa baradong ilong na nararanasan, at nagpapabalik-balik lamang ito o talagang hindi nawawala, makabubuting ikonsulta ito sa doktor. Mahalagang matukoy ang tiyak na sanhing nagdudulot ng pagbabara ng ilong upang mabigyan ng karampatang lunas at mga paalala.

Sources:

Bulgar online; and were based on written communications with Ann Meredith Garcia Trinidad, MD, MCMMO, FPCP, FPSMO, who is an Internist and Medical Oncologist.

Dr. Trinidad is an advocate as well of cancer awareness through her Facebook page (please clik here for more info: https://www.facebook.com/DrMeredithGarcia) as the main platform.

Basahin: #AskDok: Ano ang mabisang gamot sa sipon at ubo?

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner