2 Rason kung bakit nagiging mahiyain ang bata
Alamin ang sinasabi ng mga eksperto at mga pag-aaral kung bakit may mahiyain na bata at may mga outgoing na bata. Ano ang mga maaaring gawin ng magulang?
Iba-iba ang bawat bata at may sari-sarili silang personalidad. Mayroong mga bata na walang takot sa mga tao at handang lumapit, makipag-kilala at makipag-laro sa kahit sino. Ngunit, mayroon din namang mga mahiyain na bata. Alamin natin ang mga rason kung bakit nagiging mahiyain ang isang bata. Alamin din natin ang maaaring gawin ng magulang para mabago ang ugali na ito.
Likas na ugali ba ang pagiging mahiyain na bata?
Ayon sa ilang mga pag-aaral, ang pag-uugali ng tao ay maaari nang makita kahit apat na buwang gulang pa lamang. Masusuri ito sa kung paano ang reaksyon nila sa mga pagbabago. Isa sa mga maaaring gamitin ay ang mga makukukay na laruan. Kung ang bata ay positibo o walang reaksyon dito, malamang na siya ay maging pala-kaibigan pagpasok sa paaralan. Subalit, kung siya ay tila overwhelmed o natakot dito, siya ay malamang na maging mahiyain na bata.
Ang likas na ugaling ito ay kanilang nadadala sa kanilang paglaki. Sila ay tila takot makihalubilo sa tao na maaaring maging hadlang sa development ng kanilang social circles.
Sa kabutihang palad, maaari pang mabago ang ugali. May ilan din na ayon sa mga eksperto ay kailangan lamang ng tamang panahon bago mabawasan ang pagiging mahiyain. Subalit, may ilan din na sobra sobra ang pagiging mahiyain. Ayon sa mga pag-aaral, pumapatak ito sa nasa 10%-15% ng mga bata. Sa mga ganitong kaso, tinatayang nasa 40% ng bilang nila ay maka-develop ng social anxiety sa kanilang paglaki. Upang maiwasan ito, may ilang interventions at therapy na maaaring gawin para matulungan mabawasan ang sobrang pagiging mahiyain.
Parenting style
Kung ang bata ay likas na mahiyain, may maaaring maitulong ang magulang para mabawasan ito o para hindi ito lumala. Ayon sa mga pag-aaral, ang paraan ng pagdidisiplina ay dapat magdepende sa kaugalian ng bata. Kung mali ang maging paraan na gawin, maaaring hindi maging epektibo ang pagdidisiplina. Maaari rin na lumala ang social anxiety ng bata kapag ito ay mahiyain.
Ayon sa mga eksperto, magkaiba dapat ang paraaan ng pagdidisiplina sa mga outgoing na bata at mga mahiyain na bata. Kapag ang isang bata ay outgoing at adventurous, hindi sila madaling mapapasunod sa mga pagdidisiplina na gentle. Kailangan silang bigyan ng masmaraming atensyon kapag may nagawang mali. Ito ay dahil hindi sila madaling makaramdam ng anxiety.
Sa mga mahiyaing bata naman, dapat ay mas gentle ang maging pagdidisiplina. Kapag may nagawa silang mali, mas madali silang makaramdam ng anxiety at takot sa mga maaaring mangyari. Dahil dito, dapat iwasan na bigyan sila ng masmabigat na parusa sa kanilang mga kasalanan. Kapag mangyari ito, maaaring lumala ang kanilang social anxiety na maaaring dalhin hanggang sa kanilang paglaki.
Makikita man na nasa biology ng bata ang pagiging mahiyain, maaari parin na magkaroon ng mga anak na iba-iba ang ugali. Ang mga bata nga naman ay may sariling personalidad at sariling pagkatao. Maaaring sila ay mahiyain habang ang kanilang kapatid ay hindi. Mahalaga na umayon ang paraan ng pagdisiplina ng magulang upang ang mga bata ay lumaki sa pinakamagandang version ng kanilang pagkatao.
Basahin din: STUDY: Kapag mas matanda raw ang nanay, ay mas disiplinado ang anak
Source: Psychology Today
