Nurse, huli sa CCTV na ibinalibag ang newborn sa crib

Nabagok ang ulo ng baby sa isang ospital na kung saan siya dapat nabigyan ng tamang pangangalaga. Noong una ay naging palaisipan pa ang naging dahilan nito sa mga doktor. Ngunit ng tingnan ang CCTV sa nursery na pinaglagyan ng sanggol, doon nakita ang naging dahilan kung bakit at paano ito nangyari.

Nabagok ang ulo ng baby

Image from AsiaOne

Ayon sa Korean media reports, gabi ng October 20, sa isang pribadong ospital sa Busan, ay nagpakita ng palatandaan ang isang 5-day-old baby girl na hirap itong huminga.

Ang sanggol ay pinangalanang si A-young na dali-daling inilipat sa mas malaking ospital upang siya ay mas masuri at matingnan. Doon natuklasan ang tunay na kondisyon ng sanggol. Lumabas sa pagsusuri na nabagok ang ulo ng baby at mayroon itong severe brain damage.

Hindi maipaliwanag ng mga doktor kung bakit at paano ito nangyari. Hanggang sa nagsagawa ng imbestigasyon at tingnan ang CCTV sa nursery ng pinanggalingan nitong ospital.

Doon nakita kung ano ang naging dahilan ng pagkabagok ng ulo ng sanggol. At ito ay gawa ng nurse na dapat sana ay nagbigay ng mas maingat na pangangalaga sa kaniya.

Base sa CCTV video na kuha noong October 20, makikitang sa leeg hinahawakan ng nurse ang sanggol na si A-young ng ito ay kaniyang kargahin. Kitang-kita rin na imbis na dahan-dahan ay pabagsak na ibinalibag nito ang sanggol sa kaniyang crib. Kuha rin sa video na hinampas pa nito ng towel ang sanggol sa mukha.

Ayon sa awtoridad, maliban noong October 20 ay nakatanggap rin ng parehong pang-aabuso ang sanggol noong October 18 at 19. Ito ay kanilang natuklasan base parin sa kuha ng CCTV.

Ngunit, kahit na may ebidensya, itinanggi parin ng nurse na nasa video ang kaniyang ginawa sa sanggol. At ipinilit pati ng ospital na pinagtratrabauhan nito na nabagok ang ulo ng baby ng ilipat ito ng ospital.

Sa ngayon ay nahaharap sa kaso ng child abuse ang nurse. Ngunit ayon sa korte ay kulang daw ang ebidensyang magpapatunay rito. Dagdag pa ang pagbibigay konsiderasyon sa kondisyon ng nurse na nagdadalang-tao.

Pangangalaga sa bagong silang na sanggol

Ang mga bagong silang na sanggol ay nangangailangan ng maingat na pangangalaga. Ito ay dahil mahina pa ang kanilang katawan. Isa nga sa dapat binibigyan ng dobleng pag-iingat sa isang newborn ay ang kaniyang ulo. Dahil hindi tulad ng isang bata o matanda ay malambot pa ito. Mas madali itong masusugatan o kaya naman ay mababagok kung mauuntog ng malakas sa isang sulok o bagay.

Hindi rin dapat inaalog o ishine-shake ang sanggol ng malakas. Dahil ito ay maaring magdulot ng pagdurugo sa kaniyang utak na maari niyang ikamatay.

Sa pagkarga sa sanggol ay dapat laging sinusuportahan ang ulo at leeg nito. Ito ay dahil hindi pa kaya ng kaniyang katawan ang bigat ng kaniyang ulo. At kung mapapabayaan ito ay maaring magdulot ng pagkabali ng kaniyang leeg.

Bunbunan ng sanggol

Malamang ay narinig mo na ang tungkol sa malambot na bunbunan ng sanggol. Ito ay dapat mong pagkaingatan. Dahil ito ang parte ng ulo ng sanggol na kung saan ang kaniyang bungo ay hindi pa ganap na sarado.

Kaya naman makakabuti kung lagi mo itong i-checheck. Dahil sa pamamagitan rin nito ay masasabi mo kung mayroong hindi magandang nararamdaman ang isang sanggol. Tulad nalang kung ito ay malalim o lubog na palatandaan ng dehydration sa sanggol. Kung ito naman ay tila nakabukol at matigas, palatandaan ito ng sakit na dapat na agad matingnan ng isang doktor.

Laging tandaan na ang katawan ng isang sanggol ay mahina at malambot pa. Kaya naman dapat sa pangangalaga sa kanila ay kailangan laging maingat. At hangga’t maari ay laging maging dahan-dahan.

Source: AsiaOne, Kids Health, Very Well Family

Basahin: 8 facts tungkol sa iyong newborn na dapat mong malaman