Masaya si Ogie Diaz na matapos ng dalawang taon ay healthy ang kaniyang premiee baby na isang milagro ang pagkakasurvive.
Ogie Diaz baby Meerah Khel
Kailan lang ay nagcelebrate ng kaniyang 2nd birthday ang pang-limang anak ni Ogie Diaz na si Meerah Khel. Mula sa kaniyang pangalan ay miracle nga talaga ang pagkakasurvive ng anak ni Ogie na kaniyang ibinahagi sa mga netizens sa isa niyang Facebook post.
Ayon nga sa post ni Ogie Diaz ay hindi siya makapaniwala na dalawang taon na ang lumipas matapos ang hindi niya makakalimutang tagpo ng isilang ang kaniyang anak na si Meerah Khel.
Naiiling na lang ako. Kasi, di ako makapaniwala. Parang kelan lang. Dalawang taon na pala ‘yon? Ambilis ng panahon, grabe.
Biglang nagbalik sa alaala ko ‘yung mga panahong pinipigilan pa namin siyang lumabas dahil wala pang 6 months.
Kahit hirap na hirap na ang mama niya sa kanya, nilabanan pa rin ng mama niya ang hapdi, kirot, sakit ng katawan para i-extend lang ang stay niya sa sinapupunan kasi nga, pumutok na ang panubigan eh.
Ang baby Meerah Khel ni Ogie ay ipinanganak na premature na hindi man lang umabot sa 6 months na pagbubuntis. Kaya naman naipanganak ito na may bigat ng 625 grams lang. Ito daw ay dahil sa maagang pagputok ng panubigan ng kaniyang asawa na naging hudyat sa maaga ring paglabas ng kaniyang baby.
Juice ko, malinaw pa sa alaala ko, parang basketball ang nangyari. Paglabas ng bata, ipinasa ni Doc Perez sa pediatrician at sa Neonatal doctor ang bata. Ginawa ang lahat bago “mai-shoot” sa incubator.
Halong tuwa at awa ang naging emosyon ko. Kasi kita ko, parang kuting sa liit ang bata. Minsang kinarga ko, nagkasya lang siya sa palad ko.
Image screenshot from Ogie Diaz Facebook account
Ipinagdasal daw talaga ni Ogie Diaz ang kaniyang anak na si Meerah Khel hindi pa man naiisilang ito. Kung sakali man nga daw na may mangyari ay tanggap niya ito at ng kaniyang asawa na ginawa naman ang lahat ng kanilang makakaya para maisalba ang buhay ng anak.
Alam n’yo, hindi pa inilalabas ang batang ito, hiningi ko na siya kay Mama Mary sa Simala Church sa Sibonga, Cebu.
Abot-abot ang dasal ko.
Sabi ko, “Lord, Kayo po ang mas nakakaalam kung para po sa amin ang anak ko o kukunin N’yo po siya. Anuman po ang desisyon n’yo, maluwag ko pong tatanggapin. Pero hangga’t kaya namin ng mama niya, hindi namin siya isusuko. Mawala man siya, at least, alam ng anak ko na ginawa namin ang lahat para maisalba siya.” Kaya naman balik kami nang balik doon.
Hindi nga binigo ni Lord si Ogie, dahil lumaking maayos at healthy ang kaniyang baby Meerah Khel na ngayon ay 2 years old na at ang “little big boss” ng kanilang pamilya.
Ogie Diaz baby Meerah Khel
Ngayon, sa tuwing tinitingnan ko siya, kinakarga… hindi pa rin ako makapaniwala na ito na pala ‘yung batang ipinaglaban ng mama niya para lang umabot siya kahit 6 months bago ilabas.
Ang tapang na bata. Hindi bumigay. Lumaban. Siya din ang nagbigay sa amin ng lakas para lumaban, para ipaglaban ang buhay niya.
Masayahing bata. ‘Yung ngiting nakakatanggal ng pagod at stress. ‘Yan ang aking anak — si Meerah Khel.
Happy 2nd birthday, Meerah! Ikaw ang aming “little big boss.” Ikaw ang patuloy na nagbibigay ng lakas sa amin ng mama mo at mga kapatid mo.
Mahal na mahal ka namin, anak!
Mahal na mahal ka ng daddy!😍😍😍😍
Ogie Diaz bilang ama
Si baby Meerah Khel ay ang pang-limang anak ni Ogie Diaz sa kaniyang partner na si Georgette del Rosario. Ito ay ipinanganak noong February 9, 2017 na isang dangkal lang ang laki, ayon kay Ogie.
Image screenshot from Ogie Diaz Facebook account
Apat na buwan daw itong naconfine sa ospital na may nakakabit na mga aparato sa katawan para mabuhay. Sa isang Facebook post pa ni Ogie ay pabiro niyang sinabi na ang mga aparatong nakakabit sa kaniyang anak ang nagsilbi nitong jumping rope sa loob ng incubator.
Sa isang interview ni Ogie Diaz sa ABS-CBN ay sinabi niyang umabot sa P2.5 million ang naging gastos niya mailigtas lang ang buhay ng anak.
Image screenshot from Ogie Diaz Facebook account
Si Ogie Diaz ay kilalang comedian at talent manager. Siya ngayon ang manager ni Liza Soberano at dati ring naging manager ni Vice Ganda. Si Ogie ay openly gay at proud na proud sa limang magaganda niyang anak.
Sources: ABS-CBN News, Inquirer, ABS-CBN News
Basahin: Dear TAP: Premature at masakitin na baby noon, healthy baby na ngayon dahil sa breast milk
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
