Isang estudyante sa Ilocos Sur National High School ang nag-viral dahil sa kanyang pagmamahal sa bayan. Makikita sa nasabing larawan ang bata na nagbibigay galang sa pambansang awit kahit pa nauulanan.
Grade 7 student binansagang “Makabayan Girl”
Ang nagpost ng kanyang larawan ay ang kanyang guro na si Rouenne Marie Ablog. Ayon sa kanyang post, ang estudyanteng nag-viral ay ang Grade 7 na si Chelsea Angel Rapisura. Naglalakad daw ito nang nagsimulang tumunog ang pambansang awit. Imbes na sumilong muna, huminto si Chelsea kahit pa nauulanan at nagbigay galang. Tinapos ni Chelsea ang kanta kahit pa nauulanan kahit pa tinatawag siya para sumilong.
Ayon sa caption sa post ng guro, “This young girl stopped walking and stood still under the rain during the singing of the Philippine National Anthem. Nice one, ading!”
Marami ang natuwa sa pinakitang pag-ibig sa bayan ng bata. Dahil dito, nabansagan si Chelsea ng mga netizens na ‘Makabayan girl.’
Larawan mula sa Facebook ni Rouanne Marie R. Ablog
Paano maipapakita ang pagmamahal sa bayan
Maraming paraan para maipakita ang pagmamahal sa bayan. Bukod sa ipinakita ng nasabing Grade 7 student, marami pa tayong pwedeng gawin para maipakita natin ang ating pagmamahal sa bansang sinilangan.
Narito ang ilang paraan para maipakita ang nasyonalismo:
Larawan kuha ni Krisia mula sa Pexels: www.pexels.com/photo/philippine-flag-902288/
- Huwag kalilimutan ang pinanggalingan saan man mapunta. Ipakita sa lahat ang iyong pagiging Pilipino.
- Maging aktibong mamamayan. Makiisa sa mga programang makabubuti sa mga mamamayan ng bansa.
- Pag-aralan at isapuso ang kasaysayan ng bayan. Mahalagang alamin ang mga aral ng kasaysayan. Kung paano ipinakita ng mga tao sa nakaraan ang kanilang pagmamahal sa bansa.
- Pagtuunan din ng pansin ang mga current events o maging aware sa mga nangyayari sa bansa.
- Bilang magulang, maaaring magbasa ng mga kwento, alamat, o patriotic legends sa iyong anak. Sa pamamagitan nito, maibabahagi mo sa kaniya ang iyong pagmamahal sa bansa.
- Maging mabuti sa kapwa mamamayan. Dahil ang pagmamahal sa bayan ay nangangahulugan din na pagmamahal sa kapwa mamamayan.
Basahin: Grade 1 student, nagpakita ng pagmamahal sa bayan sa simpleng paraan