6-buwan gulang na sanggol, patay matapos matapakan ang ulo

Sa isang kontrobersyal na insidente, kinasuhan ang isang 10 taong gulang na batang babae ng intentional homicide. Ito ay matapos niyang tapakan sa ulo ang isang sanggol sa daycare.

Paano nangyari ang kalunos-lunos na pangyayaring ito? At bakit kinasuhan ang isang 10 taong gulang na bata?

Sanggol sa daycare patay matapos matapakan ang ulo

Ayon sa mga ulat, nakatira daw ang 10 taong gulang na batang babae sa isang daycare center sa Wisconsin, USA. Ang daycare center daw ay isa ring foster home.

Hawak-hawak daw ng batang babae ang 6 na buwang gulang na sanggol, nang askidente niya itong mahulog. Tumama daw sa isang stool ang ulo ng bata, at iyak daw ito ng iyak. Dahil sa panic, at takot na baka siya ay mapagalitan, tinapakan daw niya ang ulo ng sanggol.

Matapos ang insidente, tumawag sa emergency services ang daycare center. Natagpuan daw ang bata na duguan at wala nang malay. Dinala ang sanggol sa ospital, ngunit sa kasamaang palad, namatay siya matapos ang 2 araw.

Kinasuhan ng homicide ang batang babae

Inimbestigahan daw ng mga pulis ang nangyari, at natunton nila ang 10 taong gulang na batang babae bilang suspek. Bukod dito, natagpuan din ng doktor na gumawa ng autopsy na sinadya at hindi aksidente ang nangyaring pagtapak sa ulo ng sanggol.

Dahil dito, kinasuhan ng first-degree intentional homicide ang batang babae. Dinala sa adult court ang kaso ng batang babae dahil sa Wisconsin, sa adult court dinadala ang mga kaso ng first-degree homicide kapag ang suspek ay 10 taong gulang pataas.

Nakaposas daw ang batang babae nang dinala sa korte, at kinailangang magbayad ng $50,000 (mahigit 2.5 million pesos) para sa kaniyang bond.

Nakatira daw ang batang babae sa foster home dahil kinuha daw siya sa bahay ng kaniyang pamilya at inilagay sa foster care noong Setyembre. Hindi pa rin alam ang dahilan kung bakit dinala sa foster home ang batang babae.

Paano masisigurado ang kaligtasan ng iyong sanggol?

Kailangang siguraduhin na palaging ligtas ang iyong sanggol. | Source: PXHere

Heto ang ilang tips upang masiguradong ligtas palagi ang iyong sanggol:

• Kapag bibili ng crib ni baby, siguraduhing akma ito para sa edad ng iyong anak.
• Ilayo ang mga electric cord, kurtina, at kung anu-ano pa sa iyong anak.
• Lagyan ng padding ang mga sulok ng mga lamesa at cabinet upang hindi mabunggo ng iyong anak.
• Sa kusina, huwag hayaang nakatiwangwang ang mga kaldero at kawali.
• Ilayo ang mga gamot at mga lason sa iyong anak. Ilagay ito sa isang lugar na hindi nila maaabot.
• Huwag pabayaan ang iyong sanggol sa banyo ng mag-isa kapag naliligo.
• Kung may hagdan kayo sa bahay, lagyan ito ng mga gate upang hindi mahulog ng aksidente ang iyong anak.
• Ilayo din ang mga lamesa at upuan mula sa mga bintana upang hindi ito akyatin ng iyong anak.
• Kapag iiwanan mo ang iyong sanggol sa daycare, siguraduhing mapagkakatiwalaan mo ang daycare at ang mga bantay.
• Iwasang ipaalaga sa maliliit na bata ang iyong sanggol.

Source: 9News

Basahin: Bata, patay matapos aksidenteng ma-trap sa loob ng condo unit!