#AskDok: Mabisa ba ang sebo de macho pantanggal ng peklat?

#AskDok: Mabisa ba ang sebo de macho pantanggal ng peklat?

Madaming nagpapatunay sa bisa ng sebo de macho. Ano ang masasabi ng mga dermatologist tungkol sa bisa nito pagdating sa mga peklat?

Madaming nagpapatunay sa bisa ng sebo de macho. Ano ang masasabi ng mga dermatologist tungkol sa bisa nito?

Matibay ang katawan natin, kung titingnan ang dami ng sakit o karamdaman na nalalabanan nito sa araw-araw. Bagama’t minsan ay hindi lubusang gumagaling, at nag-iiwan pa ng bakas—tulad ng peklat sa balat. Walang may gusto na mabahiran ang balat, lalo na kung di kaaya-aya ang peklat. Ang pangit nga namang tingan. Madalas na tanong ng lahat: ano ba ang mabisang pantanggal ng mga peklat sa balat?

Sa mga Pilipino, ang sebo de macho ang pinaka-kilalang pantanggal ng peklat. Marami ang nagpapatunay na epektibo ito, bagama’t matagal na panahon nga lang ang dapat na paggamit.

Aprubado ba ng DOH at ng mga dermatologists ang sebo de macho?

Ayon kay Dr. Rowena “Owen “Aguilar-Joven, M.D., dermatologist, hindi nirerekumenda ng mga dermatologist ang sebo de macho na pantanggal ng peklat. Tinuturing lang itong herbal o natural medicine, na hindi naman nakakasama, pero walang ‘therapeutic claims,” paliwanag ni Dr. Joven.

Wala naman ito sa listahan ng mga hindi aprubado at delikadong produkto ng DOH. Pero hindi rin ito “gamot”.

Ang peklat ay permanente. May mga mistulang nabubura nang bahagya, pero ito ay nagiging “light” lang talaga, o nag-iiba ng “kulay”. Pero kapag ang peklat ay sanhi ng hiwa, sunog o kaya ay puncture wound, hindi mabubura ang peklat nito.

Ano nga ba ang sebo de macho?

Walang makikitang ingredient ng sebo de macho sa lata nito, pero ayon sa pagsasaliksik, iisa lang ang taglay nito: mutton’s tallow. Ano iyon?

Ang mutton’s tallow ay sheep fat na remedyo para sa anumang kondisyon ng balat, mula pa nuong sinaunang panahon. Ito ay isang natural na produkto na nakakatulong na mapalambot ang balat na may peklat, at ayusin ang scar tissue.

Marami man ang nagpapatunay na epektibo ito at nakapagpawala ng peklat nila, dapat tandaan na ang pag-alis ng peklat ay hindi kasing-dali ng pagpapahid lang ng anumang ointment, dagdag na paliwanag ni Dr. Joven. Iba-iba kasi ang peklat—may malubha, malalim at may mababaw lang din. Depende rin ito sa genetic make-up ng isang tao, tulad na lang ng mga keloidal o prone sa keloids at sa may mga skin conditions tulad ng eczema at psoriasis.

Mainam ang sebo de macho bilang skin moisturizer, at maaari ding makatulong sa pagpapagaling ng ilang skin conditions tulad ng kagat ng insekto. Ang taglay kasi nitong mutton’s tallow ay fatty acids na nakakatulong sa pagpapakinis ng balat dahil may “naturally-occurring skin-restoring sebum” ito. Sa madaling salita, makakatulong ang sebo de macho na “mabura” ng paunti-unti ang peklat, pero hindi siguradong mawawala ng tuluyan ang peklat. Kailangan din ay regular at matagalan ang gamit nito.

Prevention ang solusyon

Ang pinakamainam na solusyon sa peklat ay ang maiwasan ito. Kapag may sugat, linisin itong mabuti gamit ang tubig, sabon at antiseptic, para maiwasan ang impeksiyon. Impeksiyon kasi ang pangunahing sanhi ng peklat. Iwasan ang pagpapahid ng kung anu-anong cream kung sariwa pa ang sugat.

Huwag ding kukutkutin ang mga lungab ng natutuyong sugat, dahil ito din ang nagiging sanhi ng peklat.

Ilang natural na solusyon sa peklat

Kung hindi ka kampante sa sebo de macho, pwedeng subukan ang mga sumusunod na natural solutions.

  • Baking soda at tubig - Mabisa daw it kapag ginamit tuwing makalawang araw. Ipahid sa peklat at marahang kuskusin. 
  • Aloe vera - Gumamit ng sariwang dahon ng aloe vera, pigain ang gel nito at ipahid sa peklat.
  • Lemon juice o Apple Cider vinegar - Gamiting ito bilang “toner”. Subukan muna sa maliit na bahagi ng balat dahil baka masyadong sensitibo ang balat mo para sa lemon juice. Nakakatulong ang dalawang ito na matanggal ang pigmentation o discoloration. Ipahid lang sa peklat at iwan ng Ilang minuto saka hugasin. Gawin ito isang hanggang dalawang beses kada araw.
  • Langis ng niyog - Magpakulo ng langis ng niyog at haluan ng aloe vera gel, saka ipahid sa peklat. Hayaan hanggang 20 minuto, saka banlawan.
  • Gumamit ng  mga natural moisturizer tulad ng Bio-oil, cocoa butter, shea oil, Vitamin E oil, Coconut oil, Aloe Vera, at Rosehip Seed Oil.
  • Turmeric powder - Paghaluin ang turmeric powder, gatas at honey at ipahid sa peklat. Nakakatulong din ito na magkaron ng ‘glowing skin’.

Gawing regular ang paggamit o pagpahid, para makita ang bisa nito.

Tandaan lang na kapag gumamit ng mga ito, umiwas sa pagbibilad sa araw, payo naman ni Dr. Shubaghi Perkar, MD, dermatologist. Nakakasunog ng balat ang araw, at hindi ito aayon kung gumagamit ng mga pampaputi o pampaalis ng peklat. Kapag sunog ang balat, mas mahahalata ang peklat.

SOURCES: Dr. Rowena “Owen “Aguilar-Joven, M.D., dermatologist; Dr. Shubaghi Perkar, MD, dermatologist; WebMD

Basahin: #AskDok: May gamot ba para mawala ang peklat?

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner