Ang hindi pagbibigay ng sustento sa anak ay isang porma ng economic abuse, ayon kay Atty. Noel Del Prado sa programang Usapang de Campanilla ng DZMM. Sa ilalim ng batas, ito ay itinuturing na isang kasong kriminal.
Kung ikaw ay isang magulang na hindi nakatatanggap ng sapat na suporta mula sa kabilang panig. Mahalagang malaman ang iyong mga karapatan at ang mga hakbang na maaari mong gawin upang maprotektahan ang kapakanan ng iyong anak.
Ano ang batas para sa sustento ng ama sa anak?
Ang batas na tumutukoy sa obligasyon ng isang ama na magbigay ng suporta sa kanyang anak ay matatagpuan sa Section 5 ng Republic Act 9262 o ang Anti-Violence Against Women and Children Act.
Bago naisabatas ang RA 9262, ang hindi pagbibigay ng sustento ay isang kasong sibil lamang. Nangangahulugan ito na ang isang ina ay kailangang maghain ng petisyon sa korte upang obligahin ang ama na magbigay ng suporta.
Ngunit sa ilalim ng RA 9262, ginawang kasong kriminal ang hindi pagbibigay ng sustento. Ayon sa batas, ito ay isang anyo ng economic abuse, dahil nilalabag nito ang karapatan ng isang bata na makatanggap ng sapat na suporta mula sa kanyang magulang. Sakop ng batas na ito ang lahat ng biological fathers, kahit sila man ay kasal o hindi sa ina ng bata.
Batas para sa sustento ng ama sa anak | Image from Shutterstock
Sino ang may karapatang tumanggap ng sustento?
Nilinaw din sa batas kung sino ang may legal na karapatan na makatanggap ng sustento:
- Kung kasal ang magulang – May karapatan sa suporta ang parehong ina at anak.
- Kung hindi kasal ang magulang – Ang bata lamang ang may karapatan sa sustento mula sa ama.
Ibig sabihin, kung live-in partners o magkasintahan lamang ang mga magulang. Ang ina ay walang karapatan na humingi ng suporta para sa sarili, ngunit ang anak ay may legal na karapatan na makatanggap ng sustento.
Ano ang batayan sa pagtatakda ng sustento?
Walang nakatakdang tiyak na halaga ang sustento sa ilalim ng batas. Sa halip, ginagamit ang dalawang pangunahing pamantayan upang matukoy ito:
-
Kakayahan ng ama na magbigay ng suporta
- Hindi kailangang ibigay ng ama ang buong kita niya bilang sustento.
- Dapat may matira sa kanya upang matugunan din ang sariling pangangailangan.
-
Pangangailangan ng anak
- Dapat sapat ang ibibigay na sustento upang matustusan ang pagkain, edukasyon, tirahan, at iba pang pangunahing pangangailangan ng bata.
Kung hindi sapat ang ibinibigay na suporta o tuluyang hindi nagbibigay ng sustento ang ama. Maaaring magsampa ng reklamo ang ina upang ipatupad ang karapatan ng bata.
Ano ang parusa sa hindi pagbibigay ng sustento?
Ang mga tatay na hindi nagbibigay ng sustento sa kanilang anak ay maaaring:
- Makulong ng anim na buwan hanggang anim na taon
- Pagmultahin ng P100,000 hanggang P300,000
Mahalagang tandaan na ito ay isang kasong kriminal, kaya’t maaaring arestuhin at kasuhan ang sinumang ama na hindi nagbibigay ng sapat na suporta sa kanyang anak.
Batas para sa sustento ng ama sa anak | Image from Freepik
Hindi lang para sa babae ang RA 9262
Bagama’t ang RA 9262 ay kilala bilang Anti-Violence Against Women and Children Act, nililinaw ng batas na hindi ito laging pumapabor lamang sa kababaihan.
Mayroon ding mga kaso kung saan ang lalaki mismo ang nagreklamo laban sa babaeng ina ng kanilang anak. May mga pagkakataon na ang lalaki ang dumudulog sa korte upang protektahan ang kanilang anak mula sa pang-aabuso ng ina.
Bukod sa mga mag-asawa, sakop din ng batas na ito ang mga magkasintahan, dating magkasama, o may relasyong sekswal, kaya’t ang sinumang ama—kasal man o hindi—ay may obligasyong suportahan ang kanyang anak.
Panghuli
Ang hindi pagbibigay ng sustento ay hindi simpleng isyu lamang sa pagitan ng magulang. Ito ay isang krimen na maaaring pagbayaran ng pagkakakulong at multa. Mahalaga para sa bawat magulang na malaman ang kanilang mga karapatan at obligasyon sa ilalim ng batas upang maprotektahan ang kapakanan ng kanilang mga anak.
Kung ikaw ay nakararanas ng ganitong sitwasyon, huwag matakot na humingi ng tulong. Mayroong mga legal na hakbang na maaaring gawin upang matiyak na ang isang bata ay hindi mawawalan ng suporta mula sa kanyang ama.
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
