Bakit hindi pa ma-detect ng ultrasound ang heartbeat ni baby?

lead image

Bakit walang heartbeat ang baby? Mga posibleng rason kung bakit hindi ma-detect ng transvaginal ultrasound ang pagtibok ng puso ni baby.

Matapos ang positibong pregnancy test, ang heartbeat ng baby ang sunod na pinakaaabangan ng mga magulang. Mula 8 weeks ng pagbubuntis, maaari nang makita ang pagtibok ng maliit nitong puso sa loob ng tiyan ni mommy gamit ang transvaginal ultrasound. Ngunit paano kung walang heartbeat na makita sa baby? Ano ang ibig sabihin nito?

Posibleng dahilan kung bakit walang heartbeat na nakikita

Huwag kaagad mag-panic o mabahala kung sa pre-natal check-up ay walang heartbeat na makita o marinig sa tiyan ni Mommy. May mga kadahilanan kung bakit nangyayari ito. Hindi agad ibig sabihin na nalaglag na ang bata o may problema sa pagbubuntis.

Siguraduhing tama ang pagbilang sa pagbubuntis.

Importante na alam ni mommy kung kailan ang unang araw ng kaniyang huling regla. Sa petsang ito kasi magbabase ang duktor upang ma-calculate kung gaano na kalaki si baby at kung kailan ang estimated na panganganak ni mommy. Kahit ilang araw lang ang mali, ay malaki ang pwedeng maging pagkakaiba ng resulta ng ultrasound.

Maaaring masyado pang maaga para makita o marinig ang heartbeat.

Kung wala pang 7 na linggo ang pagbubuntis, maaaring wala pang makita na fetal heartbeat. Ikalawang ultrasound ang karaniwang rekomendasyon ng mga duktor kung walang ibang sintomas ng pagkalaglag. Mas accurate daw ang transvaginal ultrasound—kung saan may ipinapasok na ultrasound wand sa puwerta—lalo kung bago pa mag ika-8 na linggo ang pagbubuntis. Pero mas mabuti kung hihintayin ang ika-12 linggo bago magpa-ultrasound.

Kapag unang trimester pa lang, hindi 100% na maaasahan ang Doppler para marinig ang heartbeat.

Kapag routine pre-natal check-up ni Mommy, naipaparinig ng OB GYN ang fetal heartbeat sa unang pagkakataon. Karaniwang gamit ang fetal Doppler sa unang trimester ng pagbubuntis. Ang fetal Doppler ay parang mic na itinatapat sa tiyan para marinig sa speaker ang heartbeat ni baby. Kung wala pang marinig dito, kadalasan ay papayuhan ng doktor ang pasyente na bumalik sa susunod na linggo para makakuha ng mas malinaw na resulta.

Minsan ay nakakaapekto ang posisyon ng baby.

Kuwento ni Mommy Carrie, normal lang na walang heartbeat na marinig kahit 16 weeks na. “Minsan kasi mahirap marinig dahil na din sa posisyon ng bata, katulad ng nangyari sa akin at sa baby ko. Minsan akala mo ay sa baby, pero mas malakas pala ang tibok ng puso mo (ng mommy).”

Sinabi daw ng doktor niya na walang dapat ikabahala. Bumalik siya sa ika-17 linggo at gumamit ng makabagong ultrasound machine, at doon pa lang nila narinig ang heartbeat ni baby. May printout pa ng unang picture ni baby!

Sabi naman ni Mommy Rachel, wala ring heartbeat na marinig noong nagpa-check up siya gamit ang doppler, kahit 17 linggo na. Pero ayon sa doktor niya, walang dapat ikabahala. “Mayron daw akong malalim na pelvis kaya siguro nakapuwesto ng komportable ang baby ko, at ayaw pang magpakita,” kuwento niya. Pinabalik daw siya matapos ang 2 linggo at ayun, nagpakita at nagparinig din ang kaniyang supling.

May pagkakataon din na wala naman pala talagang embryo.

Ang empty pregnancy sac ay tinatawag na blighted ovum. Makikita ito sa pamamagitan ng ultrasound.

Mga senyales ng pagkalaglag ng bata o hindi nito pagkabuo

  • May iba’t ibang criteria ang mga medical institutions para maging batayan kung ang resulta ng ultrasound ay nangangahulugan ng miscarriage. Makikita daw ito sa sukat ng gestational sac, at kapag walang yolk sac o embryo, at kapag ang embryo ay mas malaki sa 5mm at walang heartbeat, ayon sa Society of Obstetrics and Gynecology of Canada.
  • Ayon naman sa American College of Obstetrics and Gynecology, ang siguradong hudyat ng pagkalaglag ay kapag walang embryonic cardiac activity at kapag ang gestational sac ay walang laman sa initial scan pa lamang, at walang yolk sac o embryo sa inulit na scan.
  • Kapag mayrong heartbeat at pagkatapos ng ilang linggo ay tumigil ito, kadalasan ito ay senyales ng pagkalaglag. May tinatawag na “missed miscarriage” o “silent miscarriage," kung saan pumanaw o hindi nagtuloy sa pag-develop ang fetus, pero sarado pa rin cervix. Walang pagdurugo at nasa loob pa rin ang fetus. Maaaring magkaron ng spotting pagkatapos pa ng ilang linggo, saka lang makikita ng duktor na wala nang heartbeat at may miscarriage na.
  • Kapag hindi na nararamdamang gumagalaw ang sanggol sa sinapupunan.

Paano kung nalaglag nga ang baby?

Kapag naririnig ang kuwento ng ilang kakilala, o di kaya ay napapanuod sa news sa TV, parang karaniwang na ang mga kuwentong miscarriage. Pero kapag nangyari na sa iyo, dun pa lang mararamdaman ang realidad ng sitwasyon na ito.

Kung may miscarriage bago pa makumpleto ang 12 linggo ng gestation, may mga maaaring rekomendasyon ang doktor. May mga kusa nang nalalaglag, may mga binibigyan ng medikasyon para sa induced labor, at mayron ding nangangailangan ng D&C o dilation and curettage (raspa sa Tagalog), kung pagkatapos ng first-trimester ang miscarriage. Dilation ang tawag sa pagbukas ng cervix, at curettage ang pagtanggal ng laman ng uterus (vacuum aspiration).

Huwag mag-atubiling kumuha ng second opinion mula sa ibang doktor o espesyalista. Hindi lang dahil sa mahirap tanggapin ang pagkawala ng iyong inalagaang sanggols sa sinapupunan, kundi dahil gusto mong makasiguro na miscarriage na nga ang diagnosis. Isa itong paraan ng pag-aalaga sa sarili. Magtanong at huwag mahiyang suriin at makuha ang lahat ng sagot.

 

Basahin dito ang mga early signs ng pagkalaglag na dapat malamang ng mga buntis.

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!