Baby nakainom ng tubig habang pinapaliguan, muntik nang mamatay
Alamin kung paanong ang simpleng pag-inom ng tubig ay muntik nang ikamatay ng 11-buwang sanggol
Nagbahagi ng kalunos-lunos na kwento ang inang si Katie Gorter. Ito ay dahil hindi niya inakalang magiging biktima ng water intoxication ang kaniyang anak na si Emily.
Ito ay dahil muntik nang mamatay ang kaniyang anak matapos nitong makainom ng tubig habang naliligo. Ang ganitong kondisyon ay tinatawag na water intoxication, at hinding-hindi ito dapat balewalain ng mga magulang.
Ano ang water intoxication?
Kuwento ni Katie ay pinapaliguan raw niya ang anak na si Emily nang sinubukang inumin ng bata ang tubig habang naliligo. Noong una ay hindi ito pinansin ni Katie, dahil iniisip niya na tubig lang naman ito, at hindi makakasama sa kaniyang anak.
Ngunit nang mapansin niyang naging matamlay, nahihirapang huminga, at nagsuka ang kaniyang anak, dinala agad niya ito sa ER.
Dagdag ni Katie na kahit kaunti lang raw ang nainom na tubig ni Emily ay naiipit na dito ang kaniyang baga. Sa kabutihang palad ay dahil dinala agad ni Katie ang anak sa ER ay naagapan kaagad ang nangyari.
Dahil dito, nag-post si Katie sa social media upang magbigay ng babala sa ibang mga magulang. Aniya, dapat maging maingat ang mga magulang pagdating sa dami ng tubig na ibinibigay sa kanilang mga anak.
Hangga't maaari ay dapat gatas lang ang ipainom sa kanila hangang sila ay 6 na buwang gulang. Ito ay upang masiguradong hindi sila maging biktima ng pag-inom ng sobrang tubig.
Paano makakaiwas sa water intoxication?
Ang water intoxication ay nangyayari kapag maraming nainom na tubig ang isang tao sa mabilis lamang na panahon. Bagama't safe ang tubig sa mga bata, masama ito kung sumobra ang pag-inom.
Ito ay dahil kapag sumobra ang inom ng tubig, bumababa ang levels ng sodium sa katawan. Ang sodium ay mahalaga dahil ito ang nagkokontrol ng dami ng tubig na nahihigop ng mga cells ng katawan.
Kapag sumobrang baba ang levels ng sodium, sumosobra naman ang tubig na nakukuha ng mga cells, at posible itong magdulot ng pamamaga ng mga cell sa katawan, kasama na ang mga cells sa utak.
Sa kabutihang palad ay bihira ang ganitong klaseng pangyayari. Madalas ay nabubusog na ang mga bata bago pa man sila maging biktima ng water intoxication.
Ngunit mahalaga pa rin na maging maingat ang mga magulang pagdating sa tubig na iniinom ng kanilang mga anak. Dapat siguraduhing hindi sumosobra ang iniinom nilang tubig, at kailangan sapat lang ang naiinom nila para sa kanilang pangangailangan.
Bukod dito, iwasang painumin ng tubig ang mga sanggol na mas bata pa sa 6 na buwan. Kailangan ay gatas lang ang inumin ng mga sanggol na 6 na buwan pababa, dahil naibibigay na nito ang nutrisyon na kinakailangan ng mga sanggol.
Source: Mirror
Basahin: Baby dies after drinking breastmilk mixed with water
