Mahalaga para sa mga magulang na panatilhin ang kaligtasan ng kanilang mga anak. Kaya nga ang ibang magulang ay napakamapili sa mga produktong ginagamit ng kanilang mga anak upang makaiwas sa aksidenteng pagkalason ng bata.
Ngunit sino ba ang mag-aakala na ang simpleng baby oil ay lubha palang mapanganib para sa mga sanggol? Ito ang nalaman ng isang pamilya matapos aksidenteng makainom ng baby oil ang kanilang 19-buwang gulang na anak.
Baby oil naging dahilan ng aksidenteng pagkalason ng bata
Masayahing bata ang 19 na buwang gulang na si Graysen Ingraham. Mahilig daw itong maglaro, at palaging malikot at nakangiti. Kaya’t takang-taka ang kaniyang mga magulang nang matagpuan nilang nanghihina at parang nawawalan ng malay ang sanggol. Lingid sa kanilang kaalaman, nasa panganib na pala ang buhay ng bata.
Nagsimula ang lahat nang naligo ang ama ni Graysen na si Casey. Hindi napansin ni Casey na sinundan pala siya ni Graysen sa banyo kung saan mayroong bote ng baby oil.
Kwento ng ina ni Graysen na si JennaJoy, narinig na lang daw ni Casey na umubo ang anak na si Graysen. Pagsilip niya, nakita niya ang bata na ibinalik ang baby oil sa pinagkalagyan nito, at parang nandiri sa kaniyang natikman.
Parang gasolina raw ang naging epekto nito kay Graysen
Image from Freepik
Hinayaan lang ng mga magulang ni Graysen ang nangyari, at iniisip nilang tinikman lang ng bata ang kaunting baby oil. Ngunit nang makita nilang matamlay ang bata at nakaupo lang sa kanilang sofa, doon na sila naghinalang may masamang nangyari.
Ayon kay JennaJoy, sinubukan daw niyang kausapin ang anak, ngunit hindi ito sumasagot. Nahulog raw ang bata sa sahig, at nang tingnan niya ang mga mata ni Graysen, papikit-pikit ito at parang nawalan na ng malay.
Dali-daling tumawag sa poison control si JennaJoy, at sinabihan siya na dalhin agad ang anak sa ER dahil posibleng malubha ang lagay ng bata.
Hindi daw lubos akalain ng mga magulang ni Graysen na mapanganib ang baby oil. Madalas daw nila itong ginagamit sa kanilang mga anak, kaya akala nila ay ligtas ito sa mga bata.
Nalaman na lang nila na ang pag-inom daw ng baby oil sa sanggol ay katumbas ng pag-inom ng gasolina para sa mga matatanda. Nagsagawa rin ng x-ray ang ospital upang makita kung naapektuhan nito ang lungs ni Graysen, ngunit sa kabutihang palad, wala namang nakitang pinsala.
Mas mapanganib raw kasi ang baby oil kapag nalanghap at napunta sa lungs ng bata, kaysa kung nainom niya ito.
Image from Freepik
Inobserbahan ng mga doktor si Graysen, at nang malaman nilang walang dapat ikabahala, pinauwi na nila ang bata. Ngunit sinabihan nila ang magulang ni Graysen na obserbahan ang bata kung sakaling may kakaibang sintomas itong maramdaman.
Ngunit sa awa ng Diyos, wala naman nang naging sintomas si Graysen.
Anong gagawin kung nakainom ng alcohol si baby
Bagama’t maraming produkto ang “safe” gamitin sa mga bata, hindi nito ibig sabihin na ligtas ito kapag kanilang nainom o nakain. Kaya’t mahalaga pa rin sa mga magulang ang mag-ingat, at ilayo ang mga gamot, lason, at iba pang kemikal sa kanilang mga anak.
Heto ang ilang tips:
- Ilayo ang mga produkto tulad ng baby oil, sabon, shampoo, etc sa iyong anak. Ilagay ito sa matataas na lugar, o kaya sa loob ng cabinet na hindi nila mabubuksan.
- I-lock ang mga lalagyan ng mga household chemicals tulad ng bleach, muriatic acid, at drain cleaner. Siguraduhing hindi ito abot, o mabubuksan ng iyong anak.
Image from Freepik
- Isara lagi ng mabuti ang takip ng mga gamot at iba pang kemikal. Ito ay upang hindi ito aksidenteng mabuksan ng mga bata.
- Hangga’t maaari, palaging bantayan ang iyong anak upang mailayo sila sa panganib.
- Alamin ang mga ingredients ng mga produktong iyong binibili. Kung maaari, bumili ng mga produktong safe at organic upang siguradong walang masasamang kemikal na nakahalo.
Source: People
Basahin: Nakaka-cancer nga ba ang baby powder?
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
