Angelica Panganiban ibinahagi ang kaniyang postpartum experience na kung saan maraming ina ang siguradong sasang-ayon.
Mababasa dito ang sumusunod:
- Angelica Panganiban postpartum experience.
- Paano ba ang tamang pagtrato sa bagong panganak na babae?
Aktres na si Angelica Panganiban sa mga taong bumibisita sa kaniya pagkatapos manganak
Sa kaniyang Instagram stories ay may maikling video na ibinahagi si Angelica Panganiban tungkol sa postpartum experience ng maraming ina. Base sa video na ibinahagi ni Angelica ay sadyang nakakastress daw sa bagong silang na ina ang mga taong pumupunta para bisitahin siya. Lalo na kung hindi naman ito tutulong sa mga gawaing-bahay at basta lang kukunin ang newborn baby nito na hindi nagpapaalam sa bagong panganak na mommy.
Larawan mula sa Instagram account ni Angelica Panganiban
Si Angelica may maikling komento sa naturang video na tila parinig narin sa mga taong bumibisita sa kaniya ngayon. Hirit ng aktres, ngayon ay madalang na siyang kumustahin ng mga taong malalapit sa kaniya noon. Kung bisitahin man siya nila, tanging ang baby lang niya na si Amila ang gusto nilang makita. At hindi talaga para kumustahin si Angelica na hanggang ngayon ay umaming nakakaranas parin ng postpartum blues.
“Hmmm… until now hindi pa rin ako madalas kamustahin ng mga fersons. All they want is to see my baby. But not really “visiting” me. Not a single text on how’s my hip injury. If I still have postpartum blues. But nasanay naman na ako. Pero walang gulatan kung lumalayo loob ko ha?”
Ito ang sabi ni Angelica sa Instagram.
Sa post na ito ni Angelica ay maraming mommies ang nag-react. Sila ay naka-relate sa sinabi ng aktres at sinabing hindi lang ito ang nakakaranas ng naturang sitwasyon.
Paano ba ang tamang pagtrato sa bagong panganak na babae?
Ayon narin sa mga pag-aaral at pahayag ng mga eksperto, napakahalaga na mabigyan ng kaukulang pansin ang mga babaeng bagong panganak at kanilang sanggol. Dahil maliban sa pisikal nilang kalagayan, lalo na ang sanggol na mahina pa ang immune system laban sa mga sakit. Ang mga babaeng bagong panganak ay nakararanas ng postpartum blues na maaring mauwi sa postpartum depression kung hindi maagapan.
Ang postpartum blues ay dala ng biglang pagbabago o dagdag na responsibilidad niya na maalagaan ng tama ang kaniyang baby. Dagdag pa ang mga gawaing-bahay na kailangan niyang gawin. Pati na ang mga isyus sa kaniyang paligid, pamilya o sarili na kailangan niyang harapin.
Napakahalaga, pahayag ng mga eksperto na dapat mabigyan ng masusustansiyang pagkain ang bagong panganak na ina. Pati na ng tamang tulog at pahinga na maibibigay sa kaniya sa pamamagitan ng pag-aalalay ng isang kapamilya, kaibigan o tao na tutulong sa kaniya sa gawaing-bahay at pag-aalaga sa kaniyang newborn baby.
Sa kaso ni Angelica ay makikita naman sa kaniyang Instagram posts na talagang hands-on siya sa anak na si Amila. Buntis pa man dito ay siya narin naman ang gumagawa ng mga gawaing-bahay sa tinitirhan nila ng fiancé na si Gregg Homan sa Subic. Hanggang ngayon ay fulltime mom si Angelica sa cute niyang anak na si Amila. Ang aktres piniling isantabi muna ang propesyon para masulit ang oras sa anak. Pati na ang pagiging bata nito na alam niyang mabilis lang lilipas.
Larawan mula sa Instagram account ni Angelica Panganiban
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
