Angeline Quinto very happy ngayong isa na siyang ganap na nanay at inspired dahil sa kaniyang son na si Sylvio. Ngunit may mga pagkakataon na naiiyak daw siya kahit hindi niya alam ang dahilan.
Ang maaari mong mabasa sa artikulo na ito ay ang mga sumusunod:
- Karanasan bilang ina, ibinihagi ni Angeline Quinto
- Angeline Quinto nagpasalamat sa mga tumutulong sa kaniya
Karanasan bilang ina, ibinihagi ni Angeline Quinto
Sa panayam kay Angeline Quinto sa Star Magic Inside News, naitanong sa singer kung ano ang kaniyang mga pinagdadaanan ngayong bilang ina.
Saad ni Angeline, hindi pa siya sigurado kung postpartum depression ang kaniyang nararamdaman. Ngunit may mga pagkakataon na nagiging emosyonal siya at minsan ay nagagalit pa sa kaniyang partner na si Nonrev Daquina, ang tatay ng kaniyang son.
“So may mga pagkakataon po na bigla akong iiyak, di ko alam kung anong dahilan. Tapos minsan, yung papa nung baby ko, galit ako sa kaniya. Hindi ko rin alam ang dahilan.”
“Pero minsan, may time na in love na in love ako. Ang weird ‘no? May time na tuwang-tuwa ako sa kaniya.”
Doon na-open up ng kaniyang manager ang tungkol sa postpartum depression. Ngunit ayon kay Angeline Quinto, hindi niya batid kung 'yon nga ang kaniyang pinagdadaanan matapos niyang isilang ang kaniyang son.
Kwento pa niya, matapos naman daw niyang magalit at umiyak ay move-on na siya ulit.
“Iniisip ko, ano naman kaya bukas ang emosyon ko?”
Minsan daw ay naiisip niyang hindi madali ngunit kapag nakikita na niya ang kaniyang anak, nalilimutan na niya ang lahat ng hirap at pagod. Saad pa ni Angeline ay marami pa siyang gustong maintindihan at malaman sa pagiging mommy at lahat naman daw ng ito ay ready siyang matutunan.
“Minsan naiisip kong hindi madali, hindi madali. Pero kapag ka nakikita ko 'yong anak ko, parang lahat 'yon nakakalimutan ko. Nakakalimutan ko 'yong hirap, nakakalimutan ko 'yong pagod.”
“At 'yon nga, ang dami kong gusto pang maintindihan at malaman sa pagiging mommy. At lahat naman yan talagang ready ako na matutunan lahat for baby.”
BASAHIN:
Kinakagat ni baby ang nipples mo? Meryll Soriano shares breastfeeding tips
Coleen Garcia pina-breastfeed si Baby Amari kahit nasa dagat: "Strike anywhere"
Angeline nagpasalamat sa mga tumutulong sa kaniya
Ngayong nanay na si Angeline Quinto, halo-halong emosyon ang kaniyang nararamdaman sa tuwing nakikita niya si Baby Sylvio.
“Sobrang happy. 'Di ko ma-explain 'yong kasiyahan na nararamdaman ko ngayon. Kasi araw-araw na nangyayari sa buhay ko ngayon na nakikita ko yung anak ko. Parang iba eh. Minsan iniisip ko nga, sa akin ba talaga galing ‘to?”
Ibinahagi rin ni Angeline Quinto ang kaniyang karanasan bilang isang mommy sa kaniyang son na si Sylvio. Nabanggit ni Angeline na worth it ang lahat kahit pa medyo nahirapan siya sa kaniyang panganganak dahil siya ay na-emergency CS.
“Kahit na medyo nahirapan ako sa panganganak kasi na-emergency CS ako. Napaka-worth it lahat nung nakita ko 'yong baby ko. Lalo nung first time na narinig ko 'yong iyak nung baby ko, talagang ako din naiyak.”
Pagbabahagi pa ni Angeline Quinto na naisip niya na sana raw ay naabutan ng kaniyang mama na pumanaw na. Pero sigurado pa rin daw si Angeline na masayang masaya ang kaniyang mama at nandiyan lang naman na nakikita ang kaniyang apo kay Angeline.
Isa rin sa maituturing niyang pinaka-challenging para kay Angeline ay ang pagiging palaging puyat. Ika niya, minsan ay natataranta siya kapag biglang umiiyak ang baby lalo na kapag pinaliliguan niya ito.
Nabanggit din niya na napaka-thankful at napaka-blessed niya sa mga kaibigang mommy na malalapit sa kaniya dahil sa pagtulong ng mga ito.
“Pero napaka-thankful din at napaka-blessed ko sa mga nanay na nandiyan. 'Yong mga nanay na malapit sa akin, dami kong kaibigan na mga mommies na. So, kapag meron akong 'di naiintindihan sa pagiging nanay, talagang sila 'yong tumutulong sa akin.”
Sobra rin daw excited si Angeline sa mga nakikita niya sa kaniyang baby. Kuwento pa ni Angeline, sa ngayon ay nakikita niya nang ngumiti ang kaniyang anak. Sabi rin daw ng kaniyang doktor na ang hihintayin naman daw ni Angeline ay kung saan pipilitin o gagawin ng baby na iangat ang ulo niya.
“So ngayon, ang dami kong mga bagong pangarap. Ang daming mga bagong plano sa buhay ko na dati hindi naman. At syempre, bukod sa sarili ko talagang lahat ay ginagawa ko ngayon for Sylvio at sa binubuo po naming family."
Sa panayam din sinabi ni Angeline Quinto na excited na siyang umuwi mula sa trabaho dahil may naghihintay sa kaniyang baby. Marami rin daw hinanda si Angeline para sa kaniyang mga tagasuporta, gaya ng mga bagong songs na handog din niya para sa kaniyang anak.