Sa isang pambihirang pangyayari, tinanggal ng mga doktor ang 11 na bulate sa mata ng isang 5 buwang gulang na sanggol. Saan kaya nanggaling ang mga bulateng ito, at paano ito nagamot ng mga doktor?
Paano siya nagkaroon ng bulate sa mata?
Nakatira daw sa China ang 5-buwang gulang na sanggol na nagngangalang Dong Dong. Dinala raw siya ng kaniyang ina sa ospital matapos nitong mapansin na parang may problema ang sanggol sa kaniyang mata.
Habang iniinspeksyon ng mga doktor ang mata ni Dong Dong, nakita nila na mayroon itong mga bulate! May mga nakatago pa raw na bulate sa ilalim ng talukap ng kaniyang mata.
Inabot raw ng 21 na minuto ang pagtatanggal ng mga bulate, at 11 na bulate ang natagpuan ng mga doktor.
Ang mga bulateng nakita sa mata ni Dong Dong ay nasa species na Thelazia callipaeda, na karaniwang nakikita sa mata ng mga aso, pusa, at ng mga tao.
Sabi ng nanay ni Dong Dong na wala raw silang alagang hayop, pero posible daw na nanggaling ito sa alaga ng kanilang mga kapitbahay.
Sa ngayon, wala nang bulate si Dong Dong sa mata, pero umiinom pa rin siya ng gamot upang makaiwas sa impeksyon.
Panoorin dito kung paano tinanggal ang mga bulate sa mata ng bata:
Dapat ba itong ipag-alala ng mga magulang?
Bagama’t maraming mga parasites ang puwedeng maging sanhi ng impeksyon sa mga tao, lalo na sa bata, hindi naman ito dapat ikabahala ng mga magulang.
Ito ay dahil madali namang pangalagaan ang iyong anak laban sa mga parasites at bulate. Kailangan lamang sundin ang mga tips na ito:
- Dapat panatilihing malinis ng mga magulang ang kanilang tahanan, at huwag ilapit sa maduduming lugar ang kanilang mga anak.
- Mabuti rin na huwag munang hayaang makipaglaro sa mga alagang aso o pusa ang kanilang mga sanggol, lalo na kung hindi sila sigurado kung may bulate o parasites ang mga ito.
- Mahalaga rin na turuang maghugas ng kamay ang kanilang mga anak, lalong-lalo na kung naglalaro sila sa labas, at bago kumain. Ang simpleng paghuhugas ng kamay ay makakatulong upang makaiwas sa napakaraming sakit.
- Lutuing mabuti ang pagkain, lalo na ang baboy, dahil minsan mayroon itong mga parasites na posibleng maging sanhi ng bulate sa tiyan. Ang pagluluto ng mabuti sa karne ay pumapatay sa mga parasites na ito.
Source: Daily Mail
Basahin: Baby nagkaroon ng bulate sa mata dahil hindi nahuhugasan ng kamay
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
