Matapos mag-viral ang ginawang pambubully ng isang mag-aaral ng Ateneo sa kaniyang mga kaklase, naging biktima naman ito ng batikos at cyberbullying mula sa mga netizens.
Bukod dito, nagsilabasan rin ang mga fake account na nakapangalan sa mag-aaral, upang lalong siraan ang bully at ang kaniyang mga pamilya.
Batang nam-bully, biktima ngayon ng cyberbullying
Usap-usapan pa rin hanggang ngayon ang viral na video kung saan ang isang mag-aaral ng Ateneo junior high ay nahuli sa aktong nambubugbog at nam-bubully ng kaniyang mga kaklase. Naging matindi ang reaksyon ng mga netizen sa nangyari, at kinundena nilang lahat ang mga aksyon ng bata.
Marami ring netizen ang nagsabi na sana ay maranasan ng bata ang pananakit na ginawa niya sa ibang mga kaklase. Ang ibang naman ay nagsabing gusto raw nilang saktan ang bata dahil sa kaniyang ginawa.
Ayon naman sa ibang netizen, dapat raw sisihin pati ang mga magulang ng bata, dahil ang kuya raw nito ay bully rin sa Ateneo.
Mayroon ding mga naglabas di umano ng address ng pamilya, at inuudyok ang mga tao na puntahan ang kanilang bahay upang saktan ang bata.
Ang iba naman ay naghamon ng away sa bata, at sinabi pang huwag raw magpakita ang bully sa lugar nila.
Nagkalat ang kaniyang mga fake accounts
Bukod sa paninira at pananakot na ginawa ng mga netizen, nagkalat rin ang mga fake accounts na nakapangalan sa bully.
Isa sa mga posts mula sa fake accounts na nagkalat sa social media. | Source: Facebook
Sa mga fake accounts na ito, sinisiraan ang bata pati na rin ang kaniyang pamilya. Kung anu-anong mga bagay ang pinagsasasabi sa mga accounts na ito, at mukhang karamihan sa mga ito ay wala namang katotohanan.
Ngunit kahit na fake ang mga account na ito, marami pa ring nanloloko at nagbabahagi ng mga posts sa pag-aakalang totoo ang mga account.
Naglabas na rin ng statement ang Philippine Taekwondo Association
Dahil miyembro ng Philippine Taekwondo Association (PTA) ang mag-aaral, naglabas na rin ng statement ang PTA tungkol dito.
Ayon sa kanila, kinukundena raw nila ang nangyaring insidente, at hindi raw para sa pananakit ang sport ng Taekwondo.
Bukod dito, rerespetuhin raw nila kung ano man ang gawing disciplinary action ng Ateneo sa kanilang mag-aaral.
Ateneo sisipain ang mag-aaral kapag natagpuang guilty
Mula naman sa isang statement na galing sa administration ng Ateneo, tahasan nilang sinabing hindi sila magdadalawang-isip na sipain sa paaralan ang bata kung matagpuan nila itong guilty sa mga nasabing insidente.
Ayon sa kanila, mahigpit raw sila sa mga insidente ng pananakit at bullying sa kanilang paaralan. Kinausap na rin nila ang mga mag-aaral na sangkot sa pangyayari.
Bukod dito, hindi raw nila binabalewala ang kaso. Simula nang mai-report daw ang insidente, nagsagawa na ng mga meeting ang kanilang Committee on Discipline of the Junior High School.
Hindi tama ang nangyayaring cyberbullying
Hindi maikakala na mali ang ginawa ng mag-aaral nang saktan niya ang kaniyang kaklase. Kahit kailan ay hindi tama ang mam-bully, magpahiya, at manakit ng iyong kapwa. Ngunit hindi rin naman tama ang ginagawa ng ilang mga netizens na pananakot, pambabastos, at cyberbullying.
Mayroong ngang kasabihan na “2 wrongs don’t make a right,” dahil wala rin namang maitutulong sa sitwasyon ang cyberbullying.
Bukod dito, hindi rin ito magandang ehemplo para sa ibang mga kabataan. Upang matigil ang bullying, kailangang iwasan ang pagkakaroon ng mindset na “might makes right.”
Mahalagang turuan ng mga magulang ang kanilang mga anak na umiwas sa gulo, at huwag manakit ng kanilang kapwa. Kasama na rito ang paghihiganti, o kaya ang pananakit sa mga bully o sa mga taong sinasaktan sila.
Dahil kung hindi mapigilan ang cycle of violence na ito, magpapatuloy lang ang bullying sa mga bata. Kailangan maaga pa lang ay ituro na ng mga magulang na mali ang ganitong pag-uugali, upang matuto ng kabutihan ang kanilang mga anak.
Basahin: Mag-aaral ng Ateneo high school nahuli sa video na binubugbog ang mga kaklase
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!