4 na paraan upang mapigilan ang sarili na sigawan ang bata

Maraming mga magulang ang maaaring isipin na kailangan nilang sigawan ang kanilang anak para sumunod. Ito ay madalas nangyayari kapag ang bata ay hindi sumusunod at sumosobra ang kulit. Ganonpaman, marami ang napatunayang nakakasamang epekto ng pagsigaw sa bata. Dahil dito, hinihikayat ni Jeffrey Bernstein Ph.D., ang sumulat ng librong 'Liking the Child You Love', ang pag-iwas na sigawan ang bata.

Epekto ng pagsigaw sa bata

Aminin man o hindi, hindi mabisang paraan ang pagsigaw para maiparating ang mensahe sa mga bata. Kabaligtaran ito sa nais makuha kung bakit sumigaw. Subalit, dahil napapababa ng pagsigaw ang receptivity ng bata, lalo silang hindi makikinig at hihirap ang pagdidisiplina sa kanila. Napag-alaman nga ng mga pag-aaral na lalong nagiging agresibo ang mga batang sinisigawan.

Dahil din ang pagsigaw ay dahil sa galit, natatakot nito ang mga bata. Dahil dito, bumababa ang kanilang kumpiyansa sa sarili. Dagdag pa nito ang mga masasakit na salitang maaaring magamit sa pagsigaw, maaari na itong kilalanin bilang emotional abuse. Napag-alaman din na bukod sa mababang kumpiyansa sa sarili at pagiging agresibo ay nagiging sanhi ito ng anxiety.

Kadalasan, sumisigaw ang mga magulang dahil sila ay humihingi ng respeto. Ngunit, mali ang nabibigay nitong pag-intindi sa bata pagdating sa healthy boundaries at respeto sa sarili.

Paraan para mapigilan ang pagsigaw

Kung nais na matigil ang pagsigaw sa bata, maaaring gamitin ang apat na paraan na itinuturo ni Bernstein:

Ang pinaka-epektibong pagdidisiplina ay ang pagpapakita ng disiplina sa sarili

Sabi nga nila, maging mabuting halimbawa sa mga anak. Mula dito, masasabing makakabuti na ipakita sa bata na ikaw ay may disiplina sa iyong emosyon at ugali. Kapag mapansin ng bata na ikaw ay may disiplina sa iyong mga emosyon, gagayahin niya ito.

Huwag sayangin ang lakas sa walang kwentang pagtatalo

Ang hindi pagsunod ng iyong anak ay hindi nila ginagawa bilang paglaban sa iyong awtoridad sa kanila. Tignan ang mga ito bilang pagkakataon para maturuan sila at lalong mapalapit sa kanila. Ang nais mo ay hindi ang madali silang mapasunod kundi ang magkaroon ng constructive na pag-uusap para masolusyonan ang mga problema.

Intindihin ang iyong anak

Dahil mas nakakatanda, makakabuting intindihin ang nararamdaman ng iyong anak. Bawasan ang pagsesermon sa iyong anak at kilalanin ang kanyang mga nararamdaman. Pakinggan kung ano ang kanyang mga hinaing at mula dito, mas makikinig ang iyong anak.

Makiramay at ituro kung ano ang kanyang nararamdaman

Kapag alam ng bata ang mga salita para ipahiwatig ang kanyang nararamdaman, maspipiliin niyang pag-usapan ito imbes na magwala. Dahil dito, makakabuti na kilalanin ang nararamdaman ng bata at ituro sa kanya ang mga salita para ipaliwanag ito. Ipa-alam sa kanya na siya ay galit, naiinis, frustrated, o kung ano pa. Iwasan ang basta lamang siyang sabihan na huwag mainis. Sabihin muna na "Alam kong naiinis ka..."

Maaaring hindi agad sumunod ang iyong anak sa hindi mo pagsigaw ngunit masmabuti ang mga magiging epekto nito sa pagtagal. Ang maskaunting pagsigaw sa bata ay magdudulot ng masmabilis na pagsunod nila.

Basahin din: Ano nga ba ang epekto ng pagsigaw sa bata?

Sources: Psychology Today, Healthline