Ang masamang epekto sa kalusugan kapag inuulit gamitin ang plastic water bottle
Alam na natin ang epekto sa kalikasan, ngayon naman ay ating alamin ang epekto ng plastik sa kalusugan. Ano ang mga laman nito na hindi maganda sa katawan?
Marami sa atin ang nagre-refill ng mga plastik na bote ng tubig. Sa ating pag-iisip, wala itong masamang nadudulot at nakakatulong pa sa pagbawas ng basura.
Ngunit, ang gawain na ito para sa hydration ay nakakasama sa kalusugan. Ano nga ba ang mga epekto ng plastik sa kalusugan? Alamin natin ang mga nilalaman ng plastik na bote at ang epekto nito sa kalusugan.
BPA
Ang sangkap na Bisphenol A (BPA) ng mga plastik na bote ay nagdudulot ng hindi magandang epekto ng plastik sa kalusugan. Ang kemikal na ito ang nagiging dahilan ng pagtubo ng mga nakakasamang bacteria sa mga cracks ng bote. Ito rin ay makikita sa mga plastik na straw at maaaring magdulot ng mga malalang problema sa kalusugan.
Ayon sa CEO ng PuriBloc technology na si Kent Atherton, marami ang nakakagawa ng pagkakamali na ito. Ang pagaakala ng mga tao ay sila ay nakakatipid. Lingid sa kaalaman ng karamihan, mas mabigat ang maaaring maging mga gastusin para sa pagpapagamot.
Estrogenic chemicals
Mayroon din namang mga lumalabas na BPA free na mga produkto. Subalit, maging ang mga ito ay hindi ligtas na gamitin.
Ang mga manufacturers ay nagpapalit ng ilang estrogenic chemicals. Hindi ito kasing kilala ng BPA ngunit maaari ring magdulot ng mga parehong epekto sa kalusugan. Ito ay nagdudulot ng hindi magandang epekto sa hormones ng mga tao.
Microplastic contamination
Isang pag-aaral ang isinagawa sa State University of New York sa Fredonia. Dito, sinuri ng mga scientists ang 259 na mga bote. Kanilang nakita na ang nasa 93% ng mga bote na sinuri ay nagkaroon ng microplastic contamination.
Natutunan din dito na ang mga single-use na plastik na bote ay karaniwang gawa sa polyethylene terephthalate (PET). Ang mga plastik na bote na gumamit ng kemikal na ito ay nasasabing ligtas gamitin nang isang beses lamang. Ngunit, kung muling gamitin, maaari itong makapag-kontamina ng tubig kapag na initan o nagasgasan.
Bacteria at germs
Ayon sa propesor na si Stephanie Liberatore, ang mga plastic na bote ay pinamamahayan ng mga bacteria at germs. Ang mga ito ay karaniwang napapasa sa bote mula sa mga kamay at bibig. Nangyayari rin ito sa kahit anong maaaring inuman ngunit dahil maliit ang opening ng plastik na bote, mahirap itong linisin. Dahil sa mamasa-masang kapaligiran, ito ay tinutubuan ng mga bacteria at germs na makakapagdulot ng masamang epekto sa kalusugan.
Dapat iwasan ang muling paggamit ng mga plastik na bote. Dapat ay itapon na sa tamang basurahan ang mga ito matapos inuman at hindi na muling gamitin pa.
Kung nais ng inuman na muling magagamit, kumuha ng mga BPA free na bote o kaya ay ang mga gawa sa stainless steel o salamin. Hindi lamang ito makakabuti sa kalusugan, makakatulong din ito sa kalikasan.
Source: Reader's Digest
Photo by Adam Navarro on Unsplash
