7 natural na lunas at gamot sa sore throat

lead image

Narito ang mga gamot sa sore throat na maari mong gawin para maibsan ang iritasyon na dulot nito.

May mga paraan at gamot sa sore throat na hindi kailangang bilhin at available sa loob lang ng ating bahay.

Ang sore throat ay tumutukoy sa pananakit, pangangati at iritasyon sa ating lalamunan. Ang pangunahing sintomas nito ay ang pananakit ng lalamunan na mas nadadagdagan sa tuwing lumulunok ng pagkain o inumin.

Ito ay maaring dahil sa isang viral o bacterial infection na kadalasang nagtatagal ng lima o pitong araw. Bagamat hindi nangangailangan ng seryosong medical treatment, ang sore throat ay nakakapagdulot ng sakit sa taong nakakaranas nito na maaring sabayan din ng isang lagnat.

gamot sa sore throat

Photo: Pexels

Para maibasan ang hirap at pasakit na dulot nito, ay mga paraan at gamot sa sore throat na maaring makita at gawin sa loob lang ng ating bahay. Ito ay ang mga sumusunod:

Gamot sa sore throat

1. Pahingain ang katawan at uminom ng maraming tubig.

Ang pagtulog o pagpapahinga ng maayos ay isang paraan para matulungan ang ating katawan na labanan ang kahit anong infection tulad ng sore throat. Kung maari ay dapat ding ipahinga ang ating lalamunan sa pamamagitan ng pagbabawas sa pagsasalita.

Ayon sa NHS o National Health Service ng UK, makakatulong rin ang madalas na pag-inom ng tubig o pagpapanatiling hydrated ng taong nakakaranas nito. Ngunit, dapat ding iwasan ang pag-inom ng mga maiinit na inumin samantalang ang pagsipsip ng ice cubes, ice lollies o hard sweets ay makakatulong sa pagpapahupa ng maga o inflammation sa lalamunan.

2. Pag-inom ng over-the-counter medications.

Maari ding maibsan ang discomfort na dulot ng sore throat sa pamamagitan ng pag-inom ng mga over-the-counter medications gaya ng paracetamol at ibuprofen na puwede din sa mga bata. Mayroon ding mga sore-throat lozenges katulad ng Difflam at anaesthetic sprays na maaring makatulong sa pagpapahupa ng maga sa lalamunan.

Ngunit, hindi dapat magbigay ng sore-throat lozenges sa mga batang apat na taong gulang pababa dahil maari silang mabulunan o ma-choke dito.

3. Pagmumumog ng maligamgam na tubig na may asin.

Ang pagmumumog ng maligamgam na tubig na may asin o saltwater ay nakakapagpapabawas rin ng maga sa lalamunan ngunit ito ay hingi nirerekomendang gawin sa mga bata. Para gawin ito ay magtunaw ng kalahating kutsaritang asin sa isang baso ng maligamgam na tubig at imumog sa iyong bunganga at lalamunan.

Isang magandang gamot ito sa sore throat at paraan upang mapanatiling malinis ang lalamunan. Para sa mas magandang resulta ay gawin ito ng kada tatlong oras hanggang mawala ang sintomas ng sore throat.

4. Huwag uminom ng antibiotics nang hindi nirerekomenda ng isang doktor.

Karamihan ng mga sore throats ay dulot ng isang virus at hindi kayang gamutin ng antibiotics. Para makasigurado ay mabuting magpatingin muna sa isang doktor para malaman kung ano ang naging sanhi ng iyong sore throat. Dahil kung ito ay dulot ng isang bacterial infection ay may kaukulang gamot ang dapat inumin para labanan ang mga bacteriang nagdudulot nito.

Ang viral sore throat ay kadalasang sinasabayan ng runny nose, ubo, red o watery eyes at pag-atsing. Samantalang, ang sore-throats naman na dulot ng bacterial infection ay may halos kahalintulad na sintomas ngunit minsan ay sinasabayan ng isang lagnat.

5. Iwasan ang mga irritants o mas magpapakati pa ng lalamunan.

Ang paninigarilyo ay isa sa mga irritants at nakakapagdulot ng sore throat sa isang tao. Kapag ang isang tao ay naexpose sa irritants gaya ng usok ng sigarilyo, ito ay uubo ng uubo dahilan upang mas maging maga ang lalamunan nito. Maliban dito ay pinapahina rin ng paninigarilyo ang immune system ng isang tao kaya naman mas madaling dapuan ng mga viral o bacterial infection katawan nito.

Ilan pang nagdudulot ng sore throat ay ang pollution o mga irritants sa hangin, allergies, dry air at ang pagbabago sa temperature gaya ng pagpasok sa malamig na kwarto mula sa mainit na lugar.

Para ma-elimitate naman ang dry air ay maaring gumamit ng cool-air humidifier o kaya naman ay maupo sa loob ng isang steamy bathroom ng ilang minuto.

6. Palakasin ang iyong katawan at immune system.

Para tulungang makaiwas ang iyong katawan sa mga infection gaya ng sore throat ay dapat kumain ng balanced diet o ng masusustansiyang pagkain. Makakatulong rin ang pag-inom ng mga supplements gaya ng Vitamin D na tumutulong sa pagboboost ng immunity.

7. Pag-inom ng mga alternative medicines o herbal remedies.

May mga alternative medicines o herbal na gamot sa sore throat. Isa na nga rito ay ang honey na isang natural antibiotic. Maaring gamitin ito sa pamamagitan ng paghalo nito sa isang tea.

Ngunit, dapat tandaan na ang honey ay hindi dapat pinapainum o pinapakain sa mga batang isang taong gulang pababa.

Ang pagsipsip rin ng garlic o bawang ay makakatulong sa pag-gamot ng sore throat dahil sa antibacterial properties nito. Kailangan lang ay mag-toothbrush pagkatapos gawin ito.

Isang paraan rin para makaiwas sa infection gaya ng sore throat ay ang pagpapanatiling malinis ang katawan gaya ng madalas na paghuhugas ng kamay para makaiwas sa mga germs at bacteria na nagdudulot nito.

 

Sources: HealthLine, Mayo Clinic, The Guardian

Basahin: Flesh-eating bacteria, nakuha ng 6 taong gulang na bata mula sa strep throat

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!