Kitty Duterte nagkaroon ng dengue, Pangulong Duterte nag-aalala.
Kitty Duterte nagkaroon ng dengue
Isa si Kitty Duterte sa nabigyan ng kontrobersyal na anti-dengue vaccine na Dengvaxia. Ngunit, magkaganoon man ay hindi parin nakaligtas ang first daughter mula sa virus.
Ito ang opisyal na ibinalita ni Senador Bong Go ng sila ay makabalik mula sa Russia kasama ang Presidente.
Ayon parin sa pahayag ni Sen. Go ay labis na nag-aalala ang Pangulo sa kalagayan ng anak. Agad umano itong nagtungo sa ospital matapos ang kaniyang arrival speech at press conference pagdating dito sa Pilipinas mula sa opisyal niyang byahe sa Russia.
“Nakikita ko habang nasa eroplano kami, nag-aalala siya. Parati niyang iniisip at ‘di nga raw siya po makatulog sa haba ng flight. For 11 hours ay ‘di siya mapalagay dahil iniisip niya ang youngest daughter.”
“Nasa russia kami nung nangyari ito kaya nung pagdating namin dumiretso agad kami sa ospital at bisitahin yung kaniyang youngest daughter.”
Ito ang mga pahayag ni Senator Bong Go sa isang interview.
Nabakunahan ng dengvaxia
Dagdag pa ni Sen. Go ay ito ang unang beses na nagkaroon ng dengue si Kitty Duterte. At isa ito sa nabigyan ng bakunang Dengvaxia sa kanilang pamilya.
Matatandaang ang Dengvaxia ay ang bakuna laban sa dengue na nahaharap ngayon sa kontrobesya. Dahil ito ang itinuturong dahilan ng pagkamatay ng ilang batang nabigyan ng bakuna dito sa bansa.
Mula sa first family maliban kay Kitty ay nagbigyan rin ng bakuna ang anak ni Congressman Paolo Duterte na si Sabina.
Sa ngayon ay maayos na daw ang lagay ni Kitty at on the way to recovery na.
“Okay naman po siya (Kitty). Dengue fever po ito at on her way to recovery na po siya. Sa awa ng Diyos maayos naman po bumabalik na yung…umaakyat na yung kaniyang platelet and hopefully ay gagaling na siya.”
Ito ang dagdag pang pahayag ni Senator Bong Go.
Si Veronica “Kitty” Duterte ay ang anak ni Pangulong Rodrigo Duterte sa common law wife niyang si Honeylet Avanceña.
Paano makakaiwas sa dengue
Base sa record ng DOH o Department of Health ay mayroon ng naitalang 322,693 dengue cases sa bansa. Habang 1,272 sa mga pasyenteng ito ang nasawi dahil sa sakit. Ang mga talang ito ay mula noong January 1 hanggang September 26 taong kasalukuyan.
Kaya naman para mabawasan ang mataas na bilang ng dengue cases at deaths sa bansa, hinihikayat ng DOH ang publiko na gawin ang 5’S strategy kontra dengue. Ito ay ang sumusunod:
1S – Search and destroy mosquito breeding places o hanapin at puksain ang mga lugar na maaring pamahayan ng dengue. Tulad ng mga imbakan ng tubig gaya ng lumang gulong atbp.
2S – Seek early consultation o agad na magpunta sa doktor kung makaramdam ng sintomas ng dengue. Ito ay ang sumusunod:
- Biglaang mataas na lagnat
- Sobrang sakit ng ulo
- Pananakit ng mata
- Matinding pananakit ng kasu-kasuhan
- Fatigue
- Pagsusuka o pagduduwal
- Skin rash na lumalabas dalawa hanggang limang araw matapos lagnatin
- Mild bleeding sa ilong o sa gums
3S – Self-protection method o ang pagpuprotekta sa sarili laban sa sakit sa pamamagitan ng pagsusuot ng mahabang damit tulad ng long sleeves at pants lalo na kapag nasa labas ng bahay. Paggamit ng insect repellant at kulambo para sa dagdag na proteksyon. O paglalagay ng screens sa bintana at pintuan ng bahay para hindi makapasok ang lamok.
4S – Support fogging and spraying o ang pagsuporta sa mga pagpapausok na ginagawa ng pamahalaan para mapuksa ang mga lamok.
5S – Sustain hydration o pagsisigurong properly hydrated lalo na ang mga kinakitaan ng sintomas ng dengue. Makakatulong rin ang pag-inom ng oresol o paglalagay ng IV fluid o suero. Ito ay para makaiwas sa mga komplikasyon dulot ng dehydration.
Source: ABS-CBN News, GMA News, PIA
Photo: Presidential File Photo from ABS-CBN News
Basahin: Sintomas ng dengue sa mga baby: Mga kailangang bantayan
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
