Sintomas ng dengue sa mga baby: Mga kailangang bantayan

lead image

Narito ang mga sintomas ng dengue sa baby na dapat bantayan ng mga magulang.

Sintomas ng dengue sa baby, anu-ano nga ba ang mga dapat bantayan ng mga magulang sa kanilang little one?

Dito sa theAsianparent Philippines ay mahalaga sa amin ang makapagbigay ng impormasyon na wasto, makabuluhan, at napapanahon, ngunit, hindi ito dapat gawing pamalit sa payo ng doktor, o kaya sa medical treatment. Walang pinanghahawakang responsibilidad ang theAsianparent Philippines sa mga nagnanais na uminom ng gamot base sa impormasyon sa aming website. Kung mayroong agam-agam, ay nirerekomenda naming magpakonsulta sa doktor upang makakuha ng mas malinaw na impormasyon.

Sintomas ng dengue sa baby

Dahil sa hindi pa kayang magsalita, mahirap para sa mga magulang na matukoy kung may hindi magandang nararamdaman si baby. Lalo na ngayon na uso ang sakit na dengue, mas doble ang pangamba at pag-aalala. Dahil baka si baby pala ay iniinda na ang sakit na hindi alam ni Mama at Papa.

Pero ano nga ba ang sintomas ng dengue sa baby na dapat bantayan ng mga magulang.

Ayon kay Dr. Nikki James C. Francisco, isang pediatrician, ang mga sintomas ng dengue sa baby at sa matatanda ay walang pinagkaiba.

Magpapakita rin sila ng pangunahing sintomas tulad ng biglaang pagkakaroon ng mataas na lagnat na hindi bababa sa 38° Celsius o 101.4° Fahrenheit.

Ngunit, hindi rin dapat magpakampante kung mababa ang temperature ng katawan ni baby. Dahil ang temperature sa katawan na mas mababa sa 36° Celsius o 96.8° Fahrenheit ay sintomas rin ng dengue sa baby. Ayon ito sa Center for Disease Control and Prevention o CDC.

Base parin sa isang paalala mula sa CDC, ang pagbabago ng temperature sa katawan ay sasabayan ng iba pang sintomas ng dengue sa baby. Ito ay ang sumusunod:

  • Pagiging irritable, fussy, o antukin
  • Pagkakaroon ng rashes sa katawan
  • Unusual bleeding sa kaniyang gums o ilong
  • Unusual bruise o pasa sa katawan
  • Pagsusuka ng tatlo o higit pa sa isang araw
  • Kawalan ng gana sumuso o dumede
  • Hindi humuhupa ang kaniyang lagnat kahit pinainum na ng gamot
  • Pananakit ng katawan o kasu-kasuan

Ayon naman kay Dr. Neha Joshi, isang pediatrician sa Sitaram Bhartia Hospitalsa New Delhi, India, hindi lahat ng kaso ng dengue ay may lumalabas na rashes sa katawan. Kaya hindi raw ito ang dapat na gawing basehan kung may dengue ba o wala ang isang bata. Tanging ang blood test lang umano ang makakapagtukoy kung positibo ba sa dengue o hindi si baby.

Kaya naman mahalaga na kung sakaling makitaan si baby ng mga nasabing sintomas ay agad na dalhin siya sa doktor. Upang agad na matukoy ang kalagayan niya at mabigay ang karapatang lunas na kailangan niya.

Pero sa pagkakataong hindi pa agad na madadala sa doktor si baby ay may ilang bagay na maaring gawin para kahit papaano ay maibsan ang sintomas ng dengue na nararanasan ni baby.

sintomas ng dengue sa baby

Image from Freepik

Mga maaring gawin para maibsan ang sintomas ng dengue sa baby

Ayon parin kay Dr. Joshi, maliban sa pagbibigay ng paracetamol o acetaminophen ang pagmamasahe ng dahan-dahan sa mga kamay at binti ni baby ay makakapagpatahan at makakapagbigay sa kaniya ng relief.

Paalala niya ay dapat iwasan ang ibuprofen-based medicines sa mga baby dahil ito daw ay may kaakibat na side effects sa kanila.

Ayon sa isang pag-aaral na nailathala sa journal na PLosOne, ilan sa mga safety concerns ng pag-inom ng ibuprofen para sa mga baby na 6 months pababa ay ang sumusunod:

  • Adverse gastrointestinal (GI) effects
  • Risk ng renal failure
  • Increased risk ng necrotizing fasciitis
  • Risk ng pagkakaroon ng Reye’s Syndrome

Dapat din daw ay siguraduhing properly hydrated si baby habang hindi pa siya nadadala sa doktor o hindi pa lumalabas ang resulta o diagnosis sa kaniya. Ito ang karagdagang payo ni Dr.Joshi.

Ayon naman sa Center for Disease Control and Prevention o CDC, ang mga palatandaan ng dehydration na dapat bantayan sa mga baby ay ang sumusunod:

  • Malambot o lubog na bunbunan ni baby sa ulo
  • Tuyong bibig, dila o labi
  • Nanlalalim na mata
  • Kakaunti o walang luha kapag umiiyak
  • Mas kokonting basang diapers kumpara sa normal

Dagdag pa ni Dr. Joshi dapat din daw ay panatilihing cool at comfortable ang environment ni baby. Makakatulong rin ang pagpupunas sa kaniya ng basang bimpo para mabawasan ang init ng katawan niya.

Dahil mabilis bumagsak ang katawan ng isang baby kapag may sakit, dapat daw ay bantayan ang mga hunger cues niya. At pasusuin o padedehin siya hangga’t maari sa mga oras na willing siya.

Pero paalala ni Dr. Neha ang critical phase ng dengue ay nagsisimula kapag bumaba na ang lagnat at tumatagal ng 24-28 hours. Kaya naman mahalagang dalhin siya agad sa doktor para maibigay sa kaniya ang lunas na kailangan niya.

“Even if your child’s fever abates, you should still visit your pediatrician to be on the safe side,” mariing paalala ni Dr. Neha.

Paano maiiwasan ang dengue sa mga baby

Samantala, ayon parin sa CDC ang numero unong paraan para maiiwas sa dengue si baby ay iiwas siyang makagat ng lamok.

Magagawa ito sa pamamagitan ng paglalagay ng kulambo o mosquito net sa kaniyang higaan. At pagpapasuot sa kaniya ng mga damit na matatakpan ang kaniyang katawan tulad ng jacket at pajama.

Ang paggamit ng insect repellent ay ipinapayo rin para makaiwas sa dengue ang mga baby.

Para sa mga baby na 2 months pataas, dapat gumamit ng insect repellent na may sumusunod na active ingredient:

  • Up to 30% ng DEET o IR3535

Hindi dapat deretsong i-apply ang insect repellent sa balat ni baby. Dapat ay ilagay muna ito sa kamay ng isang adult saka ilalagay o ihahaplos ng dahan-dahan sa kaniyang balat.

Dapat ding iwasan ang mga produktong nagtataglay ng mga oil of lemon eucalyptus para sa mga batang tatlong taon pababa.

Kailangan ring panatilihing malinis ang kapaligiran at tanggalin ang mga lumang gulong o gamit na maaring maimbakan ng tubig at pamahayan ng mga lamok.

 

Source: Sitaram Bhartia Hospital, NCBI, CDC

Basahin: 7 paraan para makaiwas sa dengue

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner