Bilang isang magulang, natural lang na nais mong matiyak na ang iyong anak o sinumang mahal sa buhay na may kapansanan ay may sapat na suporta at benepisyo upang magkaroon ng mas maayos na buhay. Isa sa mga mahahalagang hakbang upang matulungan sila ay ang pagkuha ng Persons with Disability (PWD) ID. Sa pamamagitan nito, maaari silang makakuha ng diskwento sa gamot, libreng serbisyong medikal, bawas sa pamasahe, at iba pang tulong mula sa gobyerno. Pero paano kumuha ng pwd id?
Kung ikaw ay isang magulang o tagapag-alaga na gustong kumuha ng PWD ID para sa iyong anak o kapamilya, narito ang isang madaling gabay upang maunawaan ang proseso.
Sino ang maaaring kumuha ng PWD ID?
Ang PWD ID ay para sa mga may kapansanan na maaaring makaapekto sa kanilang pang-araw-araw na buhay. Kung ang iyong anak o miyembro ng pamilya ay may isa sa mga sumusunod na kondisyon, maaaring siya ay kwalipikado:
Larawan mula sa Canva
- Pisikal na kapansanan – Halimbawa nito ay ang mga may kapansanang naglilimita sa paggalaw, tulad ng may amputasyon, paralisis, o iba pang orthopedic impairment.
- Mental o psycho-social disability – Kabilang dito ang autism, Down syndrome, bipolar disorder, schizophrenia, at iba pang kondisyon sa pag-iisip.
- Problema sa paningin – Mga bulag o may matinding kapansanan sa paningin.
- Problema sa pandinig – Mga bingi o may malubhang pagkawala ng pandinig.
- Multiple disabilities – Dalawa o higit pang kombinasyon ng mga nabanggit na kapansanan.
Kung napapansin mong may espesyal na pangangailangan ang iyong anak o kapamilya, makakatulong ang PWD ID upang makuha ang mga serbisyong kinakailangan nila.
Mga requirements
Bago pumunta sa opisina ng lokal na pamahalaan, tiyaking ihanda ang mga sumusunod:
- Medical Certificate o Barangay Health Certificate – Isang dokumentong magpapatunay ng uri at kondisyon ng kapansanan mula sa doktor.
- Barangay Certificate – Bilang patunay na nakatira ang aplikante sa inyong lugar.
- Dalawang Piraso ng 1×1 o 2×2 ID Picture – Para sa PWD ID card.
- Valid ID o Birth Certificate – Upang matiyak ang pagkakakilanlan ng aplikante, lalo na kung menor de edad pa.
Sa ibang munisipalidad, maaaring may karagdagang requirements, kaya mainam na kumonsulta muna sa inyong City/Municipal Social Welfare and Development Office (CSWDO/MSWDO) bago mag-apply.
Larawan mula sa Canva
Paano kumuha ng PWD ID
Narito ang simpleng proseso na maaaring sundin:
- Magtungo sa inyong LGU – Bisitahin ang City/Municipal Social Welfare Office o health center kung saan ipoproseso ang PWD ID.
- Kunin at sagutan ang application form – Maaaring makuha ito sa opisina o i-download mula sa website ng Department of Health (DOH) o National Council on Disability Affairs (NCDA).
- Isumite ang mga kinakailangang dokumento – Ipakita ang mga ito sa nakatalagang opisyal upang beripikahin.
- Hintayin ang PWD ID – Ang pagpoproseso ay maaaring tumagal ng ilang araw o linggo, depende sa inyong LGU.
- Matapos maaprubahan, makukuha ang PWD ID at Purchase Booklet, na magagamit upang ma-avail ang mga diskwento at benepisyo.
Mga benepisyo ng PWD ID na makakatulong sa pamilya
Bilang magulang, tiyak na nais mong matiyak na makukuha ng iyong anak o kapamilya ang mga pribilehiyong nakalaan para sa kanila. Ilan sa mga mahahalagang benepisyo ay:
- 20% Discount at VAT Exemption – Makakakuha ng diskwento sa gamot, ospital, laboratory tests, at dental at medical services.
- 20% Discount sa Pamasahe – Para sa mga pampublikong sasakyan gaya ng jeep, bus, taxi, tren, barko, at eroplano.
- Educational Assistance – May scholarship o financial assistance para sa edukasyon ng mga PWD sa pampubliko at pribadong paaralan.
- Employment Assistance – May mga programang pangkabuhayan at prayoridad sa trabaho para sa mga PWD.
- Accessible Facilities – May karapatan sa priority lanes, ramps, at PWD parking spaces sa mga pampublikong lugar.
Dahil sa mga benepisyong ito, mas mapapadali ang buhay ng iyong anak o mahal sa buhay, pati na rin ang inyong pamilya.
Larawan mula sa Canva
Mga dapat tandaan ng mga magulang at tagapag-alaga
- Siguraduhin na tama at totoo ang mga dokumento – Ang pagsumite ng pekeng medical certificate ay may legal na kaparusahan.
- I-update ang impormasyon kapag kinakailangan – Kung may pagbabago sa address o kondisyon ng PWD, ipagbigay-alam ito sa issuing office.
- Gamitin ang PWD ID nang maayos – Hindi dapat ipagamit sa iba upang maiwasan ang pagkakansela nito.
- Alamin ang iba pang benepisyo mula sa gobyerno – Bukod sa PWD ID, may iba pang programa para sa PWD na maaaring makatulong sa inyong pamilya.
Para sa karagdagang impormasyon, maaaring bumisita sa opisyal na website ng Department of Health (DOH) o National Council on Disability Affairs (NCDA).
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
