Anu-ano ang sintomas ng postpartum depression at paano ito malalampasan?

Anu-ano ang sintomas ng postpartum depression at paano ito malalampasan?

Mahalagang matukoy at agad na maagapan ang postpartum depression na nararanasan ng isang babae. Ito ay upang hindi na ito lumala at hindi na siya makagawa ng mga bagay na maari niyang pagsisihan.

Narito ang sintomas ng postpartum depressionsa mga kababaihan na dapat bantayan at hindi dapat isawalang bahala.

Ano ang postpartum depression?

Marahil ay nakarinig ka na ng balita tungkol sa isang ina na sinaktan hanggang mapatay ang kaniyang anak. O kaya naman ay sinaktan ang kaniyang sarili at nagpakamatay. Nakakagulat man ang ganitong mga pangyayari, ngunit ayon sa mga eksperto, epekto ito ng isang kondisyon na madalas na nararanasan ng mga babae pagkatapos manganak. Ito ay ang tinatawag na postpartum depression o PPD na tumatama sa isa sa 9 na babae sa buong mundo.

sintomas ng postpartum depression

Image from Freepik

Ayon sa Mayo Clinic, normal na nakakaranas ng mood swings, crying spells, anxiety at hirap sa pagtulog ang mga babaeng bagong panganak. Madalas itong nangyayari sa unang araw at linggo matapos manganak sa kanilang sanggol. Tinatawag itong “baby blues” na isa sa epekto ng bagong responsibilidad na kailangan nilang gampanan sa kanilang bagong silang na sanggol. Bagamat ito ay normal, ang “baby blues” ay maaring tumagal at lumala. Hanggang sa ito ay mauwi sa postpartum depression na labis ng nakakabahala.

Dahilan kung bakit nakakaranas ng postpartum depression ang mga kababaihan

Ang postpartum depression ay kilala rin sa tawag na post-natal depression. Ito ang uri ng depresyon na nararanasan ng mga kababaihan ilang linggo o buwan pagtapos manganak. Sinasabing ang postpartum depression ay may kaugnayan sa chemical, social at psychological changes na nararanasan ng isang ina dahil sa pagkakaroon ng bagong sanggol na dapat niyang pag-ukulan ng pansin at alagaan. Habang ayon naman sa isang bagong pag-aaral, may limang dahilan kung bakit ito nararanasan ng mga babaeng bagong panganak. Ito ay ang sumusunod:

  • Dahil sa conflicting at contrasting emotions na nararanasan ng isang ina o ang sari-saring emosyon na dulot ng bagong responsibilidad na kailangan niyang gampanan.
  • Pag-aalala na dahil siya ay bagong panganak ay hindi niya na maibigay ang pangangailangan ng asawa.
  • Hindi paghingi ng tulong sa iba kahit siya ay nahihirapan o pagod na.
  • Pagiging insecure dahil sa mga peklat at bagong hugis ng kanilang katawan.
  • Pakiramdam na hindi na sila nabibigyan ng tamang pag-aalaga.

Sintomas ng postpartum depression

sintomas ng postpartum depression

Image from Freepik

Ang postpartum depression ay natutukoy base sa tagal o kung kailan pa ito gumugulo sa isang bagong silang ina. Kung ang isang babae ay nagpapakita parin ng sintomas ng baby blues kahit siya ay ilang linggo ng nakapanganak, palatandaan ito na siya ay nakakaranas na ng postpartum depression. Lalo na kung ang mga sintomas na kaniyang pinapakita sa pagdaan ng araw ay mas lumalala. Ilan nga sa sintomas ng postpartum depressionsa mga kababaihan na dapat bantayan ay ang sumusunod:

  • Matinding kalungkutan.
  • Madalas na pag-iyak.
  • Kawalan ng gana sa mga dating kinatutuwaang gawin.
  • Pagkapagod.
  • Hirap sa pagtulog o tulog ng tulog.
  • Kawalan ng gana kumain
  • Mas gustong mag-isa at ayaw makipag-bonding sa kaniyang sanggol o ibang miyembro ng pamilya.
  • Irritble at mabilis magalit.
  • Naiisip niyang siya ay hindi mabuting ina.
  • Pakiramdam na siya ay walang kuwenta, nahihiya o guilty sa lahat ng bagay.
  • Hirap mag-isip o makapag-concentrate.
  • Nagsasabi siya ng kakaiba at nakakabahalang pahayag.
  • Pagsasabi na gusto niyang saktan ang sarili o kaniyang sanggol.

Paano malulunasan ang postpartum depression?

Madalas hindi mapapansin ng isang ina na siya pala ay nakakaranas na ng postpartum depression. Kaya mahalaga ang papel na ginagampanan ng mga taong nasa paligid niya upang matukoy ito. Dahil dapat sa oras na makita sa kaniya ang mga nabanggit na sintomas ay agad na siyang magpatingin at kumonsulta sa doktor. Upang ito ay hindi na lumala pa at mauwi sa postpartum psychosis o ang stage ng depression na nagiging violent o marahas na ang isang babae.

Pagdating sa pagbibigay lunas sa postpartum depression, nakadepende ito sa lala o uri ng depression na nararanasan ng isang babae. Maaring siya ay bigyan lang ng anti-anxiety o antidepressant medication. O kaya naman ay sumailaim sa psychotherapy at support group discussion and education. Ito ay upang malaman niya na siya ay hindi nag-iisa. At may mga tao na dumadanas na parehong kondisyon sa kaniya na ito ay nalampasan at sa ngayon ay handa siyang tulungan.

Paano ito maiiwasan at malalampasan?

sintomas ng postpartum depression

Image from Freepik

May mga paraan ring maaring gawin ang isang babaeng bagong panganak upang maiwasan at malampasan ang postpartum depression. Ang mga ito ay ang sumusunod:

  • Huwag magdalawang-isip na humingi ng tulong sa iba.
  • Maging realistic sa mga dapat mong asahan tungkol sa sarili at sa iyong sanggol.
  • Gumawa ng mga light exercises tulad ng paglalakad-lakad.
  • Isipin na may mga araw talaga na mabuti at may mga araw naman na masama.
  • Kumain ng masusustansyang pagkain at iwasan ang alcohol na inumin at caffeine.
  • Patibayin ang relasyon sa iyong partner. Siguraduhing magkaroon kayo ng oras sa isa’t-isa.
  • Huwag i-isolate ang iyong sarili. Tumawag o makipagkita sa iyong mga kaibigan o kapamilya.
  • Magpahinga sa mga oras na natutulog ang iyong sanggol.

Mahalagang mapanatili ang maayos na kalusugan ng isang babaeng bagong panganak. Ito ay upang maibigay niya rin ng maayos ang pangangalaga na kailangan ng kaniyang sanggol.

 

Source:

Healthline, Women’s Health, Mayo Clinic, WebMD

Basahin:

Nakararanas ng postpartum depression dumadami dahil sa COVID-19?

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

Article Stories
app info
get app banner