#AskDok: Kailangan bang painumin ng vitamins ang mga newborn?

#AskDok: Kailangan bang painumin ng vitamins ang mga newborn?

Nag-iisip ka na bang painumin ng vitamins ng baby ang iyong anak, pero hindi pa makatiyak kung alin ang pipiliin? Halina at alamin muna natin mula kina dok kung ano ang mainam na vitamins ng baby at paano ito ibibigay sa kannila.

Natural na alalahanin ng mga magulang ang pagtitiyak na nabibigyan nila ng sapat na nutrisyon ang anak mula pa lamang nang nasa sinapupunan ito, nang maipanganak, magpahanggang sa paglaki nito. Kaya naman, bukod sa gatas na nagsisilbing pangunahing source ng pagkain at inumin ng mga baby, kaakibat ang pagsasaalang-alang ng vitamins ng baby na mainam sa kanilang maipainom. Ito ay upang sumuporta sa pangkalahatang paglaki nila nang masigla, malusog, at matalino.

Sa isa sa mga nakaraang talk na inilunsad ng theAsianparent-Philippines, isa sa mga naging tampok na usapin ang pagpapainom ng vitamins sa mga bata, lalo na sa mga sanggol pa lamang. Kalahok sa talk na ito sina Dr. Gellina Maalala, na isang pediatrician, at Dr. Kristen Cruz-Canlas, isa namang obstetrician gynecologist.

Mga dapat malaman sa pagpapainom ng vitamins ng baby

Ayon kay Dr. Gellina Maalala, hindi basta-basta ang proseso ng paghahatol ng vitamins sa mga bata, lalo na sa mga kasisilang pa lamang na sanggol.

Pangunahin sa kaniyang mga tagubilin sa pagpapainom ng vitamins sa anak ang pagkonsulta muna sa pediatrician ng inyong anak. Kailangan muna kasing masuri ang pangkalahatang lagay ng kalusugan ng bata, at matukoy ang kasalukuyang mga source ng vitamins ng baby bago mahatulan ng nararapat na supplement ayon sa pangangailangan ng katawan nito.

Ang ilan pa sa  kaniyang mahahalagang paalala bago painumin ng vitamins ang anak ay ang sumusunod sa ibaba.

  • Pinapayuhan ang mga magulang na at least two weeks old na ang baby na sisimulang painumin ng multivitamins.
  • Bukod sa edad, ibinabatay ng pedia ang uri at proseso ng pagpapainom ng vitamins sa timbang—bigat o gaan—ng baby.
  • Nakabatay rin sa uri ng gatas na iniinom ng sanggol ang vitamins na inihahatol dito. Kailangang malaman muna ng pedia kung ang sanggol ay breastfed o formula-fed, para maisaalang-alang ang kasalukuyang content ng nutrients na nakukuha ng sanggol batay sa gatas na dinedede.
  • Pagtuntong ng anim na buwan ng baby, nadaragdagan ang listahan ng mga posibleng pagkuhanan ng sustansiya ng kanilang katawan dahil sinisimulan nang ipakilala sa kanila ang solid food. Panibagong pagsusuri ito at pag-alam ng pedia ng mainam na maipainom na uri ng vitamins ng baby.
Paano kapag breastfed si baby?

Kinikilala natin ang kahalagahan ng pagpapadede ng direktang pagpapadede ng ina sa kaniyang anak, lalo na sa mga unang araw, linggo, o buwan pa ng buhay nito. Ayon kay Dr. Maalala, ito rin ang dahilan kumbakit makalipas pa ang dalawang linggong buhay ng bata bago nila hinahatulan ng vitamins upang mapuno muna ng nutrients mula sa breastmilk ang sistema ng sanggol.

Pagbabahagi ni Dr. Maalala, maraming immunoglobulins, bitamina, fat, protina, at carbohydrates ang gatas ng ina. Sapat din ang tubig nito na 80% ng kabuoang content ng gatas. Kaya kailangan lamang talagang pagpursigihan ng mga nanay na makapagpadede sa kanilang anak. Lalo na sa mga inay na hindi madali at mabilis ang paglabas ng output (supply ng gatas), kailangan talagang tiyagaing maipahakab sa baby. Sapagkat dito rin nakasalalay ang pagdami at pag-stabilize ng suplay ng gatas para sa baby kalaunan.

Bagaman, isang uri ng bitamin ang hindi sapat na makukuha lamang sa breastmilk—ang vitamin D. Kaya pinapayuhan talaga ng mga pedia ang mga magulang na sa pinakamurang edad pa lamang ng sanggol, ugaliin nang paarawan ang baby dahil isa sa mga pangunahing source ng vitamin D ang sikat ng araw sa umagang-umaga. Hinihikayat ding gawin ito maging hanggang sa paglaki ng mga bata.

Kaya sa mga breastfed baby, bukod sa pagpapaaraw, vitamin D ang karaniwang ihinahatol ng pedia. At mahalagang sundin ang rekomendasyon ng pediatrician ng  inyong anak pagdating sa bagay na ito.

Sa mga baby na nagkakaroon ng gastrointestinal problems, nariyan ang pag-alam na sinasagawa ng mga gastroenterologist sa mga vitamins na tinataglay ng katawan ng baby. Pahayag ni Dr. Maalala, kino-compute nila ang lahat ng multivitamins na kailangan pa ng katawan ni baby batay sa timbang nito.

Sa isa pang banda, bukod sa pagiging ob-gyne, isang proud mom ng kambal at breastfed advocate din si Dr. Kristen Cruz-Canlas. Sa usapang pagpapadede ng gatas ng ina sa mga anak, nagbahagi siya ng personal niyang karanasan kung paano patuloy na masusustentuhan ng sariling gatas ang kaniyang kambal sa kabila ng busy niyang daily schedule.

“Talagang breastmilk is the best. Kahit may pambili tayo ng formula, iba pa rin ‘yung breastmilk. Kasi ‘yung immunization is limited lang for the first few days, months of life. So, lahat ng naipapasa nating mommies ay ‘yung protection kay baby. Kaya talagang the breast is best,” ayon kay Dr. Cruz-Canlas.

Samantala, para naman sa mga espesyal na kaso ng pagpapainom ng mga supplement at vitamins ng baby sa anak, tulad na lamang kung may nararanasang komplikasyon ang bata, kondisyon, o malaking kakulangan sa ilang tiyak na uri ng sustansiyang mahalaga sa kanilang growth and development, mahalagang ikonsulta ito sa inyong pedia. Tiyaking masusunod ang kanilang mga rekomendasyon, lalo na kung nangangailangan ito ng mga karagdagang pagsusuri ng iba pang espesyalista.

Basahin: Alamin ang pinakamagandang oras para uminom ng vitamins

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner