Malungkot na pangyayari ang sinapit ng mag-asawa sa Zamboanga del Norte. Namatayan na ng anak ay na aksidente pa sa sinasakyang motorsiklo na siya ring ikinasawi ng mga ito.
Aksidente sa motorsiklo: Mag-asawa pumanaw nang sumalpok sa truck
Trahedya ang nangyari sa mag-asawang sakay ng motorsiklo sa Zamboanga del Norte. Ayon sa report ng GMA News, aksidente sa motorsiklo ang ikinasawi ng mag-asawa. Sumalpok daw kasi ang sinasakyang motorsiklo ng mga ito sa pick-up truck habang binabaybay ang Leon B. Postigo.
Ang nakakalungkot pa sa istorya ng mag-asawa, ay dala-dala pala ng mga ito sa kanilang byahe ang bangkay ng kanilang anak na sanggol.
Ayon sa ulat, nasawi ang baby matapos na mabilaukan at bumyahe ang mag-asawa kasama ang labi ng anak pauwi sana sa kanilang bahay sa Sindangan.
Ang trahedya ng pamilya
Sa ulat ng awtoridad, may dalawa pang kasama ang mag-asawa na sakay naman ng kasunod na motorsiklo.
Kwento ng mga ito, nasagi ng motor na minamaneho ng mister ang kasunod pang motorsiklo, kaya nawalan umano ito ng kontrol. Dahilan para mapunta sa kabilang lane ang mga ito at napasalpok sa kasalubong na pick-up truck. Malala ang injury ng dalawa dahil sa nangyari.
Ngunit, tumalsik man mula sa pagkakabangga ay nanatili namang yakap-yakap ng ina ang walang buhay na katawan ng kaniyang anak.
Ligtas man sa nasabing aksidente sa motorsiklo ang dalawa pa nilang kasama, sa kasamaang palad ay nasawi ang mag-asawa.
Nagawa pa umanong itakbo sa ospital ang mga ito pero idineklara na ring dead on arrival.
Minabuti ng pamilya ng mga nasawi na huwag nang magsampa ng kaso. Ang tanging hiling na lamang ng mga ito ay matulungan sana sila sa mga gastusin sa burol at sa pagpapalibing sa mag-anak na kanilang kapamilya.
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
