Angeline Quinto nagbahagi ng mga pagbabago sa buhay niya bilang ina at umamin ring mukhang mai-spoil niya ang anak na si Sylvio.
Mababasa dito ang mga sumusunod:
- Mga pagbabago sa buhay ni Angeline Quinto ng siya ay maging isang ina na.
- Angeline Quinto bilang ina kay baby Sylvio.
Mga pagbabago sa buhay ni Angeline Quinto ng siya ay maging isang ina na
Halos magtatatlong buwan na ang panganay at baby ni Angeline Quinto na si Sylvio. Sa pagdaan nga daw ng buwan matapos makapanganak ay aminado si Angeline na mahirap at nakakapagod pala talaga ang maging isang ina.
Sa kaniya ngang pinakabagong vlog ay ibinahagi ng singer na naging malaki ang pagbabago sa buhay niya ng dumating si Sylvio. Partikular na sa kaniyang routine sa araw-araw kung saan tinututukan niya ang pag-aalaga sa anak.
“Ngayon na nanay na ako sobrang nag-iba 'yong routine ko everyday. Kung noon, nagigising siguro ako ng mga 9 am to 10 am ng umaga. Ngayon wala pang araw mga ka-twinkle nagigising na ako for Baby Sylvio. Kasi nga bigla siyang iiyak so kailangan i-check ko kung papalitan ba ng diapers o nagugutom na siya.”
Ito ang pagbabahagi Angeline.
Sa ngayon daw ay nag-aadjust parin si Angeline sa mga pagbabago sa buhay niya bilang isang ina. Partikular na ang paggising ng maaga. Mabuti na nga lang daw at nandiyan ang boyfriend niyang si Nonrev na nagiging kapalitan niya sa pag-aalaga sa anak.
“Kami ni Nonrev nagpapalitan kami. Kung halimbawa ako 'yong antok na antok, siya 'yong nagbabantay kay Sylvio hanggang madaling-araw. Para kapag umaga ako naman yung gising o minsan baligtad,” kuwento pa ni Angeline.
Nakakapagod man daw at mahirap, sabi ni Angeline masaya siya sa pagiging isang ina. Ngayon daw ay naiintindihan niya na at napatunayan niyang totoo na kahit ano mang pagod maaring mawala kapag nakikita ng ina ang kaniyang anak.
“'Yong feeling ko ngayon nanay na nanay na. 'Yong ikaw lahat ng kikilos pero nakakapagod din. Pero alam mo 'yan sa araw-araw na nangyayari ngayon, nakakapagod pero kapag nakikita ko si Sylvio nawawala.”
“Ganoon pala talaga. Naiintindihan ko na 'yong mga nanay na kapag nakikita na yung anak lahat ng hirap sa panganganak nakakalimutan. Totoo pala 'yon mga mommies naranasan ko na yun.”
Ayon pa rin kay Angeline dahil sa pagbabagong binigay sa buhay niya ni Sylvio ay aminado siyang baka ma-spoil niya ito. Lalo pa’t sa kanilang dalawa ni Nonrev siya ang mas hindi strikto. Ngayon palang daw pinag-uusapan na nila ito ni Nonrev partikular na sa kung paano sasabihin kay Sylvio ang mga bagay o gusto niya na hindi puwede.
“Pinag-uusapan namin 'yan ngayon na baby pa Sylvio. kung paano yung mga gagawin naming pagbabawal sa mga gusto ni Syvio na hindi puwede. Si Non cool din naman siyang tatay talaga kaso parang siya 'yong magiging strikto kasi ako feeling ko baka ma-spoil ko 'yong bata.”
“Pero sabi din ng ibang mga nanay 'yong pagiging spoiled ng bata hindi rin maganda kapag naiibibigay mo lahat kasi baka masanay sila.”
Excited na nga rin daw si Angeline na magsimulang kumain ng solid foods si Sylvio. Gusto niya ng malaman ang favorite food nito para daw mapag-aralan niya ito at siya mismo ang magluto.
Relasyon ni Nonrev Daquina at Angeline Quinto
Mula ng mabuntis sa anak na si Baby Sylvio ay nagsama na sa iisang bubong si Angeline at boyfriend niyang si Nonrev. Minsan niya naring nilinaw sa pamamagitan parin ng kaniyang vlog ang sabi-sabing pineperahan lang siya ng kasintahan.
Sabi pa nga ni Angeline siya pa minsan ang nangungutang kay Nonrev at napaka-laki ang tulong na nagagawa nito sa pag-aalaga sa kanilang anak. Maliban nga daw sa kapalitan niya ito sa pag-aalaga kay Baby Sylvio, maasahan rin daw ito sa mga gawaing-bahay.
“Mga damit ko siya nagtutupi, mga damit ni Sylvio after labhan siya nagtutupi. Minsan ako nalang naghuhugas ng bote ng anak namin.”
Ito ang sabi pa ni Angeline.
Pagdating din daw sa kanilang relasyon, ito ang mas nagdadala. Si Nonrev umano ang una at agad na umaayos sa gusot o tampuhan sa pagitan nilang dalawa.
“Ako kapag nagtatampuhan kami parang mataas talaga yung pride ko. Pero minsan may time naman na kapag alam ko ako yung may mali, magso-sorry rin ako. Pero siya mas madalas siya talaga nauunang magso-sorry sa amin dalawa.”
Ito ang pagbabahagi pa ni Angeline Quinto sa buhay niya ngayon bilang ina. Pati narin sa relasyon nila ng boyfriend na si Nonrev Daquina.