Ano ang kahalagahan ng pagkain ng gulay at prutas sa mga bata? Ayon sa pag-aaral nakakatulong ito para makaiwas sila sa mga health problems.
Mababasa sa artikulong ito:
- Ano ang kahalagahan ng pagkain ng gulay at prutas sa mental well-being ng mga bata.
- Iba pang benepisyo sa katawan ng pagkain ng prutas at gulay ng isang bata.
Ano ang kahalagahan ng pagkain ng gulay at prutas sa mga bata? Ito ang sagot ng isang pag-aaral
Food photo created by jcomp - www.freepik.com
Alam nating ang sagot dito ay para mapalakas ang katawan nila. Nakakatulong din ito sa maraming aspeto ng kanilang growth at development.
Pero ayon sa isang pag-aaral, hindi lang basta pampalakas ng katawan ang mga prutas at gulay. Ang pagkain ng mga ito ay nakakaapekto rin umano sa pagkakaroon ng maayos na mental well-being ng isang bata.
Kinalaunan ang pagkain rin ng mga ito ay nakakatulong para makaiwas sila sa mental health problems sa oras na sila ay maging adult o magka-edad na.
Ang mga ito ay natuklasan ng isang pag-aaral na ginawa ng mga researchers mula sa University of East Anglia sa United Kingdom.
Ito umano ang kauna-unahang pag-aaral na nag-iimbestiga ng kaugnayan ng pagkain ng prutas at gulay sa mental well-being ng isang bata. Ganoon rin sa kung ano ang pinipinili nilang pagkain sa kanilang agahan at tanghalian.
Nakuha ng mga researcher ang kanilang findings sa Potamogeton ng pag-aanalyze ng data ng halos 9,000 na bata mula sa 50 na paaralan sa Norfolk, East Anglia, England.
Ang kanilang datos ay nakuha sa pamamagitan ng survey questionnaires. Doon ay nakalagay ang mga dietary choices nila. Sila rin ay sumailalim sa mental well-being test na kung saan sinukat ang kanilang cheerfulness, relaxation at pagkakaroon ng good interpersonal relationships.
Findings ng pag-aaral
Nang ma-analyze ang nakalap na data ng mga researcher ay ito ang mga natuklasan nila:
- Ang pagkain ng prutas at gulay ay may kaugnayan sa pagkakaroon ng mas maayos na mental well-being sa mga bata.
- May kaugnayan sa maayos na mental well-being ng bata ang mga pagkaing kinakain niya sa agahan at tanghalian. Ang mga batang kumakain ng traditional breakfast ay may mas maayos na mental well-being kumpara sa mga umiinom lang ng energy drinks. Natuklasan rin ng mga researchers na ang well-being score ng mga batang umiinom ng energy drinks sa agahan ay mas mababa kumpara sa mga batang hindi nakakain ng almusal.
- Ang hindi pagkain ng tanghalian ay nakakaapekto sa physical growth at development ng isang bata. Ganoon rin sa academic performance niya sa school.
- Mas malaki ang impact ng good nutrition sa mental well-being ng isang bata kumpara sa mga nakikita niyang violence o pagtatalo sa loob ng kanilang bahay.
Photo by Alex Green from Pexels
BASAHIN:
9 na masusustansyang gulay na dapat kinakain ni baby mula 6-12 months
Mga prutas at gulay na maaaring makatulong makaiwas sa COVID-19
Paano mapakain ng gulay ang batang pihikan sa pagkain?
Rekumendasyon ng pag-aaral
Kaya naman dahil sa resulta ng ginawang pag-aaral, rekumendasyon ng mga researchers ay dapat magkaroon ng mga school policies na magsisiguro na mabibigyan ng good nutrition ang mga bata.
Ito ay dapat kanilang natatamasa bago pumasok at habang nasa eskuwelahan. Ito ay para mapangalagaan ang mental health nila at ma-achieve ng mga bata ang kanilang goals sa buhay.
"Public health strategies and school policies should be developed to ensure that good quality nutrition is available to all children both before and during school in order to optimise mental wellbeing and empower children to fulfil their full potential."
Ito ang pahayag Prof. Ailsa Welch, ang lead researcher ng ginawang pag-aaral at mula sa UEA's Norwich Medical School.
Paano mahihikayat ang isang bata na kumain ng gulay at prutas?
Food photo created by our-team - www.freepik.com
May mga batang pahirapan talaga kung minsan na pakainin ng prutas at gulay. Pero may mga hakbang ka na maaring gawin para ma-enganyo sila. Ang mga ito ay ang mga sumusunod:
- Maging creative at hiwain ang mga prutas at gulay sa nakakatuwang mga hugis. Mainam na ito ay pagmukhaing masarap sa kaniyang paningin para ma-enganyo siyang kainin.
- Ihalo ang mga pagkaing hindi niya gusto sa mga pagkaing paborito niyang kinakain. O kaya naman ay lutuin ito ng kahalintulad ng favorite food niya. Tulad ng burger patty na imbis na gawa sa karne ay maaring gawing gawa sa gulay gaya ng puso ng saging.
- Hayaan ang iyong anak na mag-participate sa paghahanda o pagluluto ng pagkain. Ito ay para makita niya kung paano ito ginagawa at ma-encourage siya na kainin mismo ang pagkaing kaniyang hinanda.
- Kausapin ang iyong anak ng maayos at ipaliwanag sa kaniya ang kahalagahan ng pagkain ng prutas at gulay. Hindi dapat siya pilitin dahil imbis na ma-encourage siya ay baka lalo niya pa itong ayawan na kainin.
Source:
Science Daily, The Asianparent PH
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
