Kagat ng ipis at daga: Panganib, lunas at pag-iwas

Kagat ng ipis at daga: Panganib, lunas at pag-iwas

Isa sa mga pangunahing peste sa mga kabahayan ang mga ipis at daga. Gumagapang ang mga ito sa mga pagkain, kagamitan at maging sa mga naninirahan sa mga bahay. Ang masama pa ay nangangagat ang mga ito na maaaring magdulot ng impeksiyon at sakit. Alamin natin ang mga maaaring idulot na panganib, mga maaaring lunas at mga paraan ng pag-iwas mula sa mga kagat ng ipis at daga.

Kagat ng ipis

Ang mag-inang sila Rochelle at Frank ay magkatabing natutulog sa isang manipis na kutson na nasa lapag. Dahil dito, madalas silang nagagapangan ng mga ipis sa kanilang pagtulog. Sa kwento ni Rochelle, may isang gabi na siya ay nakaramdam na tila may gumagapang sa kanilang kama. Sa kanyang paggising, naramdaman niyang may kagat na siya ng ipis sa kanyang siko. Maya-maya pa ay biglang umiyak ang kanyang anak na si Frank dahil napasok na pala ng ipis ang kanyang pajama. Mula dito ay nakakuha ang bata ng dalawang kagat sa kanyang hita.

Panganib

Posibleng mauwi sa matinding komplikasyon ang mapabayaang kagat ng ipis. Ayon kay Dr. Fresco Yapindon, isang specialist sa infetious disease, maraming taglay na mikobyo ang mga ipis. Ang mga mikrobyong ito ay nakukuha nila mula sa mga pinamamahayang tambak ng basura at mag kanal. Sa pagkagat sa tao, naililipat ang mga mikrobyo sa balat ng tao. Dahil dito, maaaring kumalat sa dugo ang kagat ng ipis at maging sanhi ng impeksiyon sa dugo na tinatawag na sepsis.

Ang sepsis ay maaaring maging sanhi ng pinsala sa ilang mga organs. Kung mapabayaan at humantong sa septic shock, maaaring bumagsak ang blood pressure at magdulot ng kamatayan.

Pangunang lunas

Upang maka-iwas sa komplikasyon, hugasan agad ang kagat at sabuning maigi. Kung may pamamaga, maaaring pahiran ng yelo upang humupa ito. Iwasan ang pagkutkot sa maaaring mabuo na langib upang maiwasan magkaroon ng lalong impeksiyon. Mangyari ring uminom ng antibiotic nang pitong araw upang mapatay ang ano mang bacteria na pumasok sa katawan.

Kagat ng daga

Isa rin sa mga pangunahing peste sa mga kabahayan at lansangan ang mga daga. Lalo na ngayong tag-ulan, maraming mga daga ang naglalabasan mula sa mga kanal dahil tumataas ang mga tubig dito.

Sa kwento ni Miriam Silva, may mga dagang nagpupunta sa bahay nila para kainin ang mga pagkain ng manok na nahuhulog sa mga sahig. Ngunit, may isang beses na tila hindi ito nakuntento at nakagat pa si Lola Miriam.

Panganib

Wala mang kaso ng rabies sa daga ang nalaman sa Pilipinas, kailangan paring mag-ingat mula dito. Ang kagat ng daga ay nagdudulot ng sugat dahil sa matatalim nitong mga ngipin. Ayon pa kay Dr. Yapindon, mas mapanganib ang mga kagat nito dahil sa kanilang mga laway. Ang laway ng daga ay may clostridium tetani, ang bacteria na nagdudulot ng tetano. Sa pagpasok ng bacteriang ito sa katawan ng tao dahil sa kagat ng daga, maari itong magdulot ng tetanus sa tao tatlong araw matapos makagat. Maaaring makaramdam ang nakagat ng paninigas ng panga o kaya naman ng buong katawan sa mga kritikal na kundisyon.

Pangunang lunas

Kapag nakagat ng daga, ang pangunahing gagawin ay kontrolin ang pagdurugo at linisan ang sugat gamit ang tubig at sabon. Maaari itong pahiran ng Agua Oxinada bago takpan ng malinis at tuyong tela. Hangga't maaari, magpatingin parin sa duktor upang makapagpatingin at maresetahan ng karagdagang gamot na kailangan.

Pag-iwas mula sa mga kagat ng ipis at daga

May mga pangunahing maaaring gawin upang maiwasan na magkaroon ng mga ipis at daga sa mga kabahayan:

  • Panatilihing malinis ang mga kapaligiran. Huwag hayaang nakatiwangwang ang mga basura upang hindi pamahayan ng mga ipis at daga.
  • Maaaring gumamit ng mga insect spray upang makasiguradong patay ang mga ipis.
  • Iwasang apakan ang mga ipis para patayin dahil maaari nitong lalong mapakalat ang mga mikrobyong dala ng ipis.
  • Maaaring gumamit ng mousetrap na may pandikit upang mahuli ang mga bubwit na maaaring makita sa mga kabahayan.

 

Source: GMA News

Photo: Flickr

Basahin: Bata, nagdugo ang tainga dahil sa kagat ng ipis

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner