Baby muntik nang mamatay matapos mahawa ng bulutong

Baby muntik nang mamatay matapos mahawa ng bulutong

Isang sanggol ang nagkaroon ng nakamamatay na komplikasyon ng bulutong matapos mahawa mula sa kaniyang nakatatandang kapatid.

Normal na sa mga bata ang magkaroon ng tinatawag na bulutong o chickenpox. Marami nga ang nagsasabi na mas mabuting magkaroon nito habang bata pa, upang magkaroon ng immunity sa ganitong sakit. Ngunit hindi ito dapat balewalain ng mga magulang dahil ang komplikasyon ng bulutong ay posibleng maging nakamamatay sa mga bata.

Komplikasyon ng bulutong, muntik nang ikamatay ng baby

Nangyari ang insidente sa UK, kung saan nagkahawaan ng bulutong ang magkapatid na si Alfie at Edward Foxall. Ayon sa mga magulang ng bata na si Laura at Kieran, akala nilang normal lang na bulutong ang kondisyon ng magkapatid. Ngunit nang lumala ang kondisyon ng sanggol na si Edward, naisip nilang dalhin na ang bata sa ospital.

Pagkarating sa ospital, napag-alaman na mayroon nang necrotizing pneumonia ang bata na isang komplikasyon ng bulutong.

Inilagay siya agad sa ICU ng limang araw, at nag-aalala ang mga doktor na baka hindi niya kayanin ang sakit. Ngunit matapos ang matinding gamutan, at pag-inom ng antibiotics ng 5 linggo, gumaling na rin si Edward.

Ayon sa kaniyang mga magulang ay hindi nila inakalang matindi na pala ang sakit ng kanilang anak. Ito ay dahil mabilis naman raw gumaling ang bulutong ng kuya niya, kaya't inakala nilang mabilis ring gagaling si Edward.

Mabuti na lang at naisipan agad nilang dalhin sa ospital ang bata upang maagapan agad ang kaniyang naging karamdaman.

Paano makakaiwas sa bulutong?

Siguraduhin na may bakuna ang iyong anak. Kung magkaroon man, hindi ito magiging ganoon kalala at mas mabilis ang paggaling kung ikukumpara sa mga bata na walang bakuna.

Upang maiwasan ang pagkalat ng sakit sa bahay:

  • Panatalihing malinis ang katawan. Maghugas ng kamay bago kumain at pagkatapos gumamit ng banyo.
  • Ihiwalay ang batang may bulutong tubig.
  • Hikayatin ang mga nag-aalaga na gumamit ng face mask at maghugas ng kamay palagi.

Bagama’t ang bulutong tubig ay isang pangkaraniwan na sakit sa mga bata, may mga paraan upang maiwasan ito. Huwag kalimutan na kumonsulta sa doctor kung kinakailangan.

Source: Metro

Basahin: Hand, foot, and mouth disease, inakalang bulutong ng mga doktor

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner