Lady Pills Paano Inumin, Benepisyo At Side Effects
Narito ang mga impormasyong dapat mong malaman tungkol sa paggamit at pag-inom ng Lady pills.
Lady pills paano inumin at anu-ano ang benepisyo at side effects na mararamdaman sa pag-inom nito.
Image from Freepik
Dito sa theAsianparent Philippines ay mahalaga sa amin ang makapagbigay ng impormasyon na wasto, makabuluhan, at napapanahon, ngunit, hindi ito dapat gawing pamalit sa payo ng doktor, o kaya sa medical treatment. Walang pinanghahawakang responsibilidad ang theAsianparent Philippines sa mga nagnanais na uminom ng gamot base sa impormasyon sa aming website. Kung mayroong agam-agam, ay nirerekomenda naming magpakonsulta sa doktor upang makakuha ng mas malinaw na impormasyon.
Lady Pills paano inumin, benepisyo at side effects
Ang Lady pills ay isa sa mga contraceptive pills na ginagamit ng karamihang Pilipinong babae. Dahil maliban sa mura ito sa halagang P50.50 kada pakete ay marami ang babaeng nagsasabing hiyang sila sa paggamit nito. Dagdag pa na mabibili ito sa mga drugstores o botika sa buong bansa.
Kung titingnan at kung babasehan ang presyo ay maihahalintulad ang Lady pills sa Trust pills. Una, dahil pareho ang manufacturer ng dalawang pills. Pangalawa, tulad ng Trust pills ito ay isang combined oral contraceptive na mayroong 28 piraso ng pill sa isang pakete. Ito ay may 21 active beige tablet pills na may taglay na levonorgestrel 150 mcg at ethinyl estradiol, 30 mcg. Habang ang 7 white tablet pills naman nito ay nagtataglay ng 40 mg na lactose.
Pareho rin ang active ingredient na taglay ng Trust at Lady pills. Sila ay may taglay ng dalawang active ingredient. Ang isa ay ang ethinyl estradiol, isang synthetic version ng estrogen at levonorgestrel na artificial form naman ng hormone na progestin.
May dalawang bagay lang na pinagkaiba ang dalawang pills. Una ang dosage ng hormone na levonorgestrel sa Lady pills ay mas mataas ng 25 microgram sa Trust pills. May taglay ring iron ang Trust pills habang lactose naman ang taglay ng Lady pills.
Image from MIMS
Benepisyo ng pag-inom ng Lady pills
Tulad ng ibang pills ang Lady pills ay ginagamit upang mapigilan ang pagbubuntis. Umeepekto ito sa pamamagitan ng pagpigil sa ovary ng babae na mag-release ng egg cell. Pinapakapal din ito ang vaginal fluid ng babae na hinaharangan at pinipigilan rin ang sperm cell ng lalaki na marating at ma-meet ang egg ng cell babae. Binabago rin nito ang lining ng uterus ng babae dahilan upang hindi kumapit dito ang fertilized egg at pagsimulan ng pagbuo ng sanggol.
Maliban sa mga ito ay ginagawa rin nitong regular ang monthly period ng isang babae. Iniibsan din nito ang sakit na dulot ng regla o dysmenorrhea. At binabawasan ang tiyansa ng isang babae na magkaroon ng ovarian cysts at nilulunasan ang acne.
Dagdag pa ng users ng Lady pills napansin nilang mas kuminis ang balat nila habang ginagamit ito. At mas lumaki ang kanilang suso.
Ilan naman sa side effects na maaring maidulot ng Lady Pills sa babaeng gumagamit nito ay ang mataas na tiyansa ng pagkakaroon ng blood clots, stroke o heart attack. Mataas din ang tiyansa niyang magkaroon ng mataas na blood pressure, diabetes, high cholesterol at maging overweight. Napansin naman ng ilang users nito na sila ay nakaranas ng pagsakit ng ulo, pagsakit ng puson, pagsakit ng suso, nawalan ng gana kumain at makipagtalik matapos uminom nito.
Kaya naman napakahalaga na magpakonsulta muna sa doktor bago gumamit ng kahit anong contraceptive pill. At agad ding ipaalam sa kanila sa oras na makaramdam ka ng kakaiba o pagbabago sa katawan simula ng uminom nito.
Tandaan din na ang paggamit ng contraceptive na ito ay hindi nagbibigay ng garantiya na maproprotektahan ang isang babae sa pagkakaroon ng sexually transmitted disease.
Image from Freepik
Tamang pag-inom ng Lady pills
Samantala ang tamang pag-inom ng Lady pills ay dapat simulan sa unang araw ng regla o menstruation ng isang babae. Saka tuloy-tuloy na inumin ito araw-araw at hanggat maari sa parehong oras. Ang regla ay maaring dumating dalawang araw matapos inumin ang kulay beige na tablet pills. At kailangang magsimula ng panibagong pakete sa oras na maubos na ang huling puting tablet pill.
Kung sakali namang malimutang uminom ng isang pill sa oras ay agad na inumin ang missed pill kapag ito ay iyong naalala. Dapat ito ay hindi lalagpas ng 12 oras mula sa scheduled time ng iyong pag-inom. Saka inumin ang sumunod na pill sa parehong oras, Nangangahulugan ito na maaring uminom ng dalawang pill sa isang araw. Siguraduhin lang na ang mga susunod na pill ay iinumin sa parehong oras na araw-araw.
Sa oras naman na makalimutan mong uminom ng dalawang active pills sa una o pangalawang linggo ng pag-inom ng Lady pills ay uminom ng tig-dalawang pills sa isang araw sa loob ng dalawang araw na magkasunod. Saka ipagpapatuloy ang pag-inom ng mga natirang pills ng isa kada araw sa parehong oras. Mas makakabuti ring gumamit ng back-up birth control method tulad ng condom sa mga susunod na pitong araw para makasigurado.
Kung nakalimot namang uminom ng 3 active beige pills ay agad na komunsulta sa iyong doktor ng dapat gawin. Dahil maaring ipagpatuloy mo ang pag-inom ng pills sa mga susunod na araw. O kaya naman ay kailangan mo ng itapon ang tirang pills at magsimula ng panibagong pakete. Ito ay nakadepende sa araw na sinimulan mo ang paggamit ng Lady pills. Sa ganitong pagkakataon, mas mabuting umiwas munang makipagtalik o gumamit ng back-up contraceptive method tulad ng condom.
Dapat tandaan
Ang Lady pills ay maari ring gamitin bilang emergency contraceptive. Ngunit para mas magabayan tungkol dito mas mabuting magtanong muna sa iyong doktor. Dahil ang pills na ito ay hindi maaring basta inumin ng isang babae. Lalo na ang mga nagpapasusong ina, may varicose veins at blood clot history sa pamilya. Pati na ang may mga sakit tulad ng diabetes, hypertension, liver disease, breast at cervical cancer.
Kaya bago gumamit ng contraceptive na ito ay makipag-usap muna sa iyong doktor. Dahil siya lang ay may sapat na kaalaman sa tamang paggamit nito na angkop sa katawan at kalusugan mo.
Source: WebMD, Watsons Ph, Drugs.com. WebMD, MIMS Ph
