Ogie Diaz proud sa graduation ng second daughter niyang si Godhie sa high school. Kilalang showbiz reporter at content creator may payo sa mga magulang sa pagpapalaki ng teenager na anak sa panahon ngayon.
Mababasa dito ang mga sumusunod:
- Reaksyon ni Ogie Diaz sa graduation ng 2nd daughter niyang si Godhie
- Paano pinalalaki ni Ogie Diaz ang mga anak niya
Reaksyon ni Ogie Diaz sa graduation ng 2nd daughter niyang si Godhie
Pinakamagandang Father’s day gift, ganito kung isalarawan ng mga netizens ang ipinost ni Ogie Diaz tungkol sa graduation ng pangalawa niyang anak na si Godhie. Si Godhie naka-graduate na ng high school sa University of Santo Tomas. Bonus pa dito ayon kay Ogie ang naka-graduate with honors ang anak na labis umano nilang ikinatuwa ng kaniyang misis.
“Umakyat pa kami ng mama niya sa stage dahil “with honors” pa siya. Ako ang nagsabit ng medal sa kanya, naaliw ako. Hahaha! Sobrang proud daddy and mama lang yarn.”
Ito ang sabi ni Ogie sa kaniyang Facebook post tungkol sa graduation ng anak na si Godhie.
Pagdating sa kursong kukunin sa kolehiyo ay may choice na daw ang anak ni Ogie na si Godhie. Ang gusto daw nito ay mag-doktor na suportado naman ng kilalang talent manager at kaniyang misis.
"Sabi ni Godhie, ”Gusto kong magdoktor, daddy!”
“Kahit ano, anak. Basta kung saang kurso ka masaya, support lang kami ng mama mo.”
Ito ang sabi pa ni Ogie.
Para makapagdoktor ay kursong Med Tech daw ang kukuning premed ng kaniyang anak na si Godhie. Ngayon palang ay kine-claim na ni Ogie na magkakaroon siya ng anak na doktor.
Bagamat bukas parin sila ng kaniyang misis sa posibilidad na magbago pa ang isip nito. Kung magkaganoon man ay susuportahan parin ni Ogie ang kaniyang anak. Dahil higit sa lahat mas mahalaga daw ang nararamdaman nito lalo na sa panahon ngayon.
“Ganyan ako sa mga anak ko. Ang luma na kasi ng ‘yung magulang ang nasusunod kung ano ang kursong dapat kunin ng anak. At pwede nilang diktahan.”
“Noon yon. Kasi di pa naman uso nung mga panahong yon ang social media at mental health issue.”
“Pero ngayon, iba na. Dapat, nakikiramdam din ang magulang kung ano ang behaviour ng mga kabataan ngayon sa nakagisnan natin noon, nung mga bata pa tayo.”
Dahil sa ngayon, pagpupunto ni Ogie Diaz ay usong-uso na sa mga kabataang ang depression na malaking papel ang ginagampanan ng magulang upang masolusyonan. Nagbigay pa nga ng halimbawa si Ogie sa kung ano ang pagkakaiba ng pagiging magulang noon sa ngayon.
BASAHIN:
Ogie Diaz sa mga magulang: “‘Wag ipamulat sa anak na kailangan “kumita” ‘pag Pasko.”
Paano pinalalaki ni Ogie ang mga anak niya
“Kung noong bata ka, nagmumukmok ka sa isang sulok, sisitahin ka ng nanay mo at sasabihing, “Anong minumukmok-mukmok mo diyan? Tumayo ka diyan, ang daming hugasin! Wag mo kong aartehan ng ganyan. Lumulusot ka lang sa gawaing bahay, eh!”
“Pero ngayon, pag nakita mo ang anak mo na nagmumukmok sa isang sulok o kaya umiiyak, napapraning ka na, eh.”
“Anak, ano’ng problema? Bakit ka malungkot? Bakit ka umiiyak? Meron ka bang nakaalitan? Binully ka ba? Nade-depress ka ba? Me anxiety ka ba, anak? Halika, anak, andito ang daddy mo, ang mama mo, handang makinig sa yo.”
Ganito daw kung paano pinalalaki ni Ogie ang mga anak niya. Para sa kaniya, mahalaga ang feelings at opinyon nila. Tulad nalang ng mag-desisyon ang panganay niyang anak na si Erin na huminto sa pag-aaral noong 2018.
Imbis na pigilan ay si Ogie pa daw ang nagpunta sa eskwelahan ng anak para ipaalam ito. Saka niya hinayaan ang anak na gawin muna ang bagay ng gusto niya at sa kaniya ay makapagpapasaya.
“Importante naman sa akin ang pag-aaral, eh. Pangarap nating makapagtapos ang mga anak natin. Kaya nga tayo kayod-marino eh.“
“Pero mas importante sa akin ang mental health ng mga anak ko.”
Ngayon ang anak niyang si Erin ay isa ng vlogger at may sarili niya ng channel. At nitong 2020 ay nag-desisyon narin itong bumalik sa pag-aaral na hindi daw ipinilit ni Ogie sa kaniyang anak.
“Natuwa ako. Kasi hindi ko siya pinilit, eh. Pero may kondisyon na yon, sabi ko. 'Pag huminto siya uli ng pag-aaral, lahat ng naibayad ko sa school niya, ibabalik niya sa akin. Kukunin kong lahat sa savings niya. Pero pag nagtuloy-tuloy siya, eh 'di congratulations!”
Ito ang paraan ni Ogie sa pag-encourage sa mga anak niya. Hindi rin daw mahalaga para sa kaniya kung may palakol sa grades ang anak o kung magtapos ito ng walang honor. Dahil ito ang paniniwala niya.
“But seriously, ang mga anak ko, alam nilang high school grad lang ang daddy nila. Pero lagi kong sinasabi sa kanila, “Ang tunay na laban ng buhay ay wala sa loob ng eskwelahan. Nasa labas”, sabi pa ni Ogie Diaz.