STUDY: Mas kaunting laruan, mas nagiging creative si baby

STUDY: Mas kaunting laruan, mas nagiging creative si baby

Alamin kung bakit mas healthy ang konting laruan para sa iyong anak.

Paglalaro gamit ang ilang pirasong laruan mas nagbo-boost ng creativity ni baby.

Paglalaro ng konting laruan, mas nagiging creative si baby

Image from Freepix

Paano mas magiging creative ang iyong anak sa paglalaro

Laruan ang madalas na inireregalo sa mga bata kapag may okasyon gaya ng kanilang birthdays. Dahil maliban sa entertainment na maari nitong ibigay sa mga bata ay isang magandang paraan rin ito para sa development ng kanilang brain, ayon sa mga pag-aaral.

Ngunit ang mga laruan ng iyong anak ay dapat daw hindi masyadong madami, dahil maari rin itong maging distraction sa kaniyang development at paglaki.

Iyan ang lumabas sa pag-aaral na ginawa ng University of Toledo researchers matapos hayaang maglaro ang 36 na toddlers sa isang playroom.

Sa loob ng 30 minutes ay hinayaang maglaro ang mga bata sa loob ng playroom na may dalawang kondisyon. Ang unang kondisyon ay ang paglalaro gamit ang apat na piraso lang ng laruan. Ang pangalawang kondisyon naman ay ang paglalaro gamit ang labing-anim na piraso ng laruan.

Ang mga bata ay hindi binigyan ng kahit anong instructions sa kung anong dapat nilang gawin sa mga laruan.

Mula nga sa dalawang kondisyon ay nakita ng mga researchers na mas maraming oras at mas lumalabas ang creativity ng isang bata kapag kaunti lang ang kaniyang laruan.

Kumpara sa maraming laruan na hindi na alam ng bata kung ano ang kaniyang uunahin at lalaruin.

Ayon nga sa ginawang pag-aaral na nailathala sa journal of Infant Behavior and Development, ang isang bata ay mas nakakapag-focus at nai-istretch ang imagination kapag kaunti lang ang laruan na nasa paligid nila.

Samantala, mas nadi-distract daw ang isang bata at nawawala ang focus nito kapag maraming laruan siyang pagpipilian.

Kaya ang konklusyon at payo ng mga nagsagawa ng pag-aaral ay ang limitahan ang bilang ng mga laruan na ibinibigay ng mga magulang at schools sa mga bata.

Ito ay para ma-encourage ang mga bata na mas maging creative at mai-improve ang kanilang attention spans.

paano gagawing kapaki-pakinabang ang paglalaro ng anak

Image from Freepix

Hindi ito ang unang pag-aaral na nagsabing ang pagkakaroon at paglalaro ng maraming laruan ng isang bata ay nakaka-distract para sa kaniya.

Sa isang pag-aaral na ginawa ng mga German researchers na sina Elke Schubert at Rainer Strick ay parehong findings din ang natuklasan nila. Ginawa nila ang kanilang experiment sa pamamagitan ng pag-alis ng mga toys o laruan sa isang Munich nursery sa loob ng tatlong buwan.

Matapos nga ng ilang linggo ay nakita nilang nakapag-adjust naman ang mga bata at mas naging creative at social ang paglalaro nila.

Sa libro naman na isinulat ni Joshua Becker na may title na ClutterFree ay sinabi nitong ang konting laruan ay mas maganda para sa mga bata. Maliban sa mas nagiging creative sila at nade-develop ang kanilang attention span ay natuto rin sila kung paano pangalagaan ang mga bagay na mayroon sila.

Mas nagiging resourceful rin ang mga bata na may kaunting laruan pagdating sa problem solving.

Dahil ginagamit at iniisipan nila ng ibang paraan kung paano gagamitin ang mga laruan o bagay na mayroon lang sila.

Mga maaring gawain para mapakinabangan ang mga laruan ng iyong anak

Bagamat sinabi ng mga pag-aaral na hindi magiging healthy para sa development ng iyong anak ang paglalaro ng maraming laruan, hindi naman ibig sabihin na kailangan mo ng itapon ang mga ito.

May mga paraan na puwede ka paring gawin para maging kapaki-pakinabang ang ibang mga laruan ng iyong anak na hindi niya na gagamitin. Ito ay ang sumusunod:

1. I-donate ito sa charity o sa ibang bata.

Piliin ang mga laruang pinakapaborito o maari paring laruin ng iyong anak.

Para naman sa mga hindi niya na gagamitin at mga laruang kinalakihan niya na ay maari mo na itong ipunin at ipamigay sa charity o sa ibang bata.

2. Gawin itong pang-display.

Para makaiwas rin sa sobrang kalat ay maaring gamitin ang mga laruan ng iyong anak bilang pang-display sa kaniyang kuwarto o playroom.

Sa ganitong paraan ay mase-save mo din ang kaniyang mga laruan na puwedeng kunin anytime kung kailan niya kakailanganin.

3. Magkaroon ng rotation schedule sa mga laruan ng iyong anak.

Kung ayaw mo namang i-let go ang mga laruan ng iyong anak ay maari kang gumawa ng rotation schedule sa kung kailan sila pwedeng laruin ng iyong anak. Puwede mong ipalaro sa kaniya ang kada set ng laruan kada dalawang linggo o kaya naman kada buwan.

4. Subukang makipag-toy swap.

Maari ding subukang makipag-swap ng laruan sa mga kakilala o ibang kaibigan ng iyong anak. Ito ay magandang paraan rin para makapaglaro ng ibang laruan ang iyong anak ng hindi na kailangang bumili.

 

Sources: Telegraph UK, RD, Science Direct, Very Well Family

Basahin: Too many toys can harm your child’s development, says research

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner