Undas 2020, magiging kakaiba ngayong taon. Dahil ayon sa MMDA, napagkasunduan na ng mga mayor sa NCR na isara ang mga sementeryo sa darating na araw ng mga patay. Kaya naman narito ang mga paraan kung paano maipagdiriwang ang araw ng mga namayapang minamahal sa buhay kahit nasa bahay lang.
Undas 2020
Ayon sa MMDA, nagkasundo na ang mga mayors sa NCR sa kanilang desisyon sa darating na selebrasyon ng Undas ngayong taon. Hindi tulad nang nakaugalian nating mga Pilipino sa mismong araw ng mga patay ay isasara na muna ang mga sementeryo sa ka-Maynilaan. Ito ay isang hakbang upang mapigilan ang mass gathering at ang pagkalat ng sakit na COVID-19 na hanggang ngayon ay patuloy na dumadami pa ang kaso sa ating bansa.
Sa ngayon ay wala pang pinal na alituntunin tungkol sa darating na pagsasara ng mga sementeryo sa Maynila ngayong Undas 2020. Kaya naman payo ng awtoridad, mabuting bumisita na sa mga yumaong minamahal ng mas maaga. Ito’y upang malinisan na ang kanilang puntod at alalahanin ang kanilang pagkawala. Pero hindi pa rin dapat mag-sabaysabay o mainam na magkaroon ng scheduling ng pagbisita sa inyong pamilya.
“Ako po mismo, ang aking rekomendasyon, gawin na lang natin na All Saints’ Day kung hindi siguro mag-allot tayo ng apat o limang araw depende sa family name ng namatay kung sino ang pupuwedeng pumunta sa sementeryo nang ‘di po lahat magdagsaan sa iisang araw lamang.”
Ito ang personal na rekomendasyon ni presidential spokesperson Atty. Harry Roque.
Paano magbigay respeto sa mga nasawing minamahal kahit nasa bahay lang ngayong Undas 2020
Hindi naman porket magsasara ang mga sementeryo ngayong Undas ay hindi mo na maipagdiriwang ang araw ng mga nasawing minamahal. Marami pa ring mga paraang maaaring gawin upang maipagdiwang ang Undas at magbigay respeto sa mga nasawi kahit nasa bahay lamang. Ang ilan sa mga paraan na ito ay ang mga sumusunod:
1. Mag-novena o mag-dasal
Sa mismong araw ng mga patay ay yayain ang iyong pamilya na maupo sa harap ng inyong altar at magdasal. Ito’y upang maipagdasal ang kaluluwa ng yumaong minamahal, ganoon din ang kaligtasan ng inyong pamilya laban sa kumakalat na sakit. Mabuting paraan din ito upang muling magsama-sama bilang isang pamilya sa panahon ng COVID-19 pandemic.
2. Magluto o maghanda na paboritong pagkain ng yumaong minamahal
Alalahin din ang pagkawala ng taong minamahal sa pamamagitan ng pagluluto ng paborito niyang pagkain. Saka ito ihanda o iaalay para sa kaniya. Mainam din na sa magsama-sama o kumain ng sabay-sabay ang inyong pamilya. Habang inaalala ang mga oras na noon ay kasama ninyo pa siya. Paniniwala ng mga matatanda natutuwa ang nasawi sa kabilang buhay sa oras na inihahanda ang pagkaing paborito niya.
3. Mag-tirik ng kandila
Kasabay ng pag-aalay ng paboritong pagkain ng iyong minamahal sa altar ay pagtirikan din siya ng kandila. Gawin ang pagtitirik sa labas ng inyong bahay. Madalas tulad ng nakaugalian ito ay ginagawa sa tuwing sumasapit na ang alas-6:00 ng gabi. Dahil paniniwala ng mga matatanda, ang itinitirik na kandila sa araw ng mga patay ay nagsisilbing gabay nila sa tuwing bibisita sa mga lugar na paborito nilang puntahan noong sila ay nabubuhay pa. Ito rin ay magsisilbing gabay o ilaw nila sa kanilang paglalakbay sa kabilang buhay. Kaya naman dapat ang bawat pamilyang may nasawing mahal na sa buhay, ayon pa rin sa paniniwala ay tirikan ng tig-iisang kandila.
4. Alayan ng bulaklak ang iyong minamahal
Ang pag-aalay ng bulaklak sa yumaong minamahal ay hindi naman kailangang gawin lang sa kaniyang puntod. Katabi ang kaniyang larawan ay maaari rin itong gawin sa altar sa inyong bahay. O kaya naman sa paborito niyang spot sa inyong bahay na kung saan lagi siyang umuupo o pumepuwesto noong siya ay nabubuhay pa.
5. Pagsasama-sama ng pamilya
Wala ng mas sasaya pa para sa taong nasawi ang makita na ang kaniyang mga minamahal ay masaya at nagsasama-sama. Kaya naman sa araw ng mga patay ay maglaan ng oras upang maka-bonding ang inyong pamilya sa loob ng bahay. Kahit ito ay sa pamamagitan ng panonood ng mga nakakatakot na palabas. O ang paglalaro ng isang game na inyong ginagawa noong nabubuhay pa ang inyong minamahal.
6. Alalahanin ang oras na kasama pa ang yumaong minamahal
Bagama’t malungkot o masakit kung aalalahanin, mababawasan nito ang pananabik o pagka-miss sa taong minamahal.
Kasama ang inyong pamilya ay alalahanin ang mga event o tagpo sa inyong buhay na hindi makakalimutan kasama ang yumaong minamahal. Maaaring ito ay sa pamamagitan ng kuwentuhan. O kaya naman ay gumawa ng compilation ng mga larawan o video ng taong minamahal na maaari ninyong tingnan o panoorin ng sama-sama.
Ang araw ng mga patay ay hindi lang araw ng mga yumao o nasawi nating minamahal. Ito ay isang okasyon din na kung saan maaari tayong magsama-sama ng ating pamilya. Kaya naman, hindi tulad ng nakaugaliaan ay kailangan na munang pansamantalang ipagpaliban ang pagbisita sa mga sementeryo sa mismong araw ng Undas. At sa halip ay gamiting pagkakataon ang araw na ito upang mas lalong mapalapit sa ating mga mahal sa buhay.
Source:
Inquirer News, GMA News
BASAHIN:
UNDAS: Mga tradisyon na maaaring ibahagi sa mga bata
May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!
