Gamot sa sipon para sa buntis na safe sa dinadalang baby

lead image

Mahina ang immune system mo, dahil sa pagbubuntis. Kaya naman hindi dapat basta-basta ang pag-inom ng gamot laban sa mga nararamdamang sakit.

Mahina ang immune system mo dahil sa pagbubuntis—kaya naman madaling dapuan ng sipon. Ano nga ba ang safe na gamot sa sipon para sa buntis?

epekto ng ubo at sipon sa buntis

Maraming mga nakakaranas ng pabalik-balik na sipon sa buong taon, at hindi nakakaligtas ang mga nagbubuntis dito. Ang sipon ay sanhi ng mga virus, at walang iisang gamot para dito.

May mga over-the-counter (OTC) na gamot ang may multi-symptom formulas, o ginawa para gamutin ang iba-ibang sintomas tulad ng sakit ng katawan, ubo, baradong ilong, sakit ng ulo, pagbahing at lagnat.

Pero hindi lahat ng may sipon ay nakakaramdam ng lahat ng sintomas na ito. Ang mga nagbubuntis, lalo na, ay dapat na umiwas sa pag-inom ng mga gamot na ganito.

Ano ang sipon?

Natural lang ang mahawa ng sipon kapag panahon ng taglamig at tag-ulan. Viral ang sanhi ng sipon kaya malalanghap sa hangin ito at paniguradong dadapo sa iyo kapag hindi nag-ingat. Sanhi ito ng mild viral infection ng ilong, lalamunan, at sinuses.

Sadyang nakakainis—at masakit din—para sa isang mommy-to-be kapag nagsimulang bumahing, tumulo ang sipon at kumati ang lalamunan maya’t maya.

Ang mabuting balita ay kusa din itong nawawala kapag nakaya na ng katawan na labanan ang impeksiyon.

Kapag hindi buntis, madaling mag-desisyon sa pag-inom ng gamot. Pero ibang usapan na kapag may dinadalang bata sa sinapupunan—nag-iisip na si mommy kung ang gamot sa sipon para sa buntis ay ligtas ba kay baby. Hindi na kasi priority ang sarili kundi iniisip na kung ang gamot ay makakasama o makakaapekto sa inaarugang sanggol.

May mga gamot para sa sipon na pwedeng inumin kapag buntis, ayon kay Dr. Jerry Villarante, MD, pathologist mula sa University of Santo Tomas College of Medicine, at doktor sa Pasig City General Hospital at Marikina Doctors Hospital. Pero ang mga medisinang ito ay hindi puwedeng inumin ng matagal na panahon.

Makakabuti ang mga natural na paraan para maibsan ang sakit at discomfort na nararamdaman kapag may sipon ang isang pregnant mommy.

Subukan muna ang mga natural at “no-meds” na pamamaraan

  • Magpahinga. Kapag masama na ang pakiramdam, humiga, umidlip, matulog ng tuluy-tuloy sa gabi at mag-relax sa maghapon. Minsan, lubos na pahinga lang ang kailangan ng katawan para makabawi at gumaling kaagad. Pero iwasan din ang puro higa lang. Hindi makakasama ang paglalakad at kaunting pag-eehersisyo para gumanda ang pakiramdam.
  • Uminom ng maraming fluids. Ayon kay Dr. Villarante, tubig, juice, at sabaw ang sikreto sa maaliwalas na pakiramdam lalo kapag ubo at sipon ang dumapo. Mahalaga ito para magkaron ng sapat na fluids ang katawan.
  • Kumain ng masustansiyang pagkain, sa tamang oras. Kahit paunti-unti, pero madalas, kumain nang maayos. Huwag magpapalipas ng gutom at uhaw. Kumain ng mga pagkaing may vitamin C para lumakas ang immune system. Nariyan ang mga citrus fruits tulad ng orange, tangerine, at grapefruit, at iba pang prutas at gulay tulad ng strawberries, melon, kiwi, mango, tomatoes, bell peppers, papaya, broccoli, red cabbage at spinach. Magtanong sa OB GYN ng rekumendadong prenatal vitamins na may vitamin C and zinc para sa immune system.
  • Bawang. Ito ay isang antioxidant at may taglay na antibacterial, antiviral at antibiotic properties. Ang hilaw na bawang, hindi man masarap ang lasa, ay makakatulong sa sipon o baradong ilong. Dikdikin o tadtarin ng maliliit at ihalo sa honey, saka kainin. Gawin ito 2 hanggang 3 beses sa isang araw.
  • Gumamit ng humidifier sa kuwarto. Ito ay para mabawasan ang congestion o pagbabara ng ilong dahil sa sipon, at para din mapaginhawa ang lalamunan.
  • Subukan ang paggamit ng steam therapy, o paggamit ng salt water nasal spray.
  • Siguraduhing elevated ang ulo kapag humihiga, para hindi mahirapan huminga.

Ugaliing maghugas ng kamay at lumayo muna sa mga may sipon. Pwede rin namang magsuot ng mask para hindi mahawa sa iba.

Mga gamot sa sipon para sa buntis

Ang mga minor conditions kasi tulad ng pananakit ng katawan at sipon ay hindi nangangailangan ng gamot, dahil kusa din itong nawawala.

Para sa mga unang araw ng sakit, at para lang maibsan ang mga sintomas, may mga over-the-counter na gamot sa sipon para sa buntis pero dapat pa ring may “caution” o pag-iingat, tulad ng hindi dapat malaki ang dosage at hindi tatagal ng ilang araw ang pag-inom nito nang hindi kumukunsulta sa doktor.

Paracetamol

Paracetamol ang pinakaligtas na inumin ng mga nagbubuntis para sa mga pananakit ng katawan, ubo at sipon, lalo na sa baradong ilong, ayon kay Dr. Villarante. Ito ang ligtas na gamot para sa mga mild pain, lagnat, at sipon, pero ito ay kailangang nasa pinakamababang dose at sa pinakamaikling panahon (hihigit pa sa isa o dalawang araw).

Ibuprofen

Ang Ibuprofen ay isang non-steroidal anti-inflammatory medicine (NSAID). Hindi ito basta-basta iniinom ng nagbubuntis kung walang payo ng doktor, pero hindi ito dapat inumin sa huling trimester ng pagbubuntis, ayon sa librong Mayo Clinic Guide to a Healthy Pregnancy, tulad ng iba pang NSAID. Maaari itong maging sanhi ng bleeding, delayed labour at panganganak, at problema sa puso at kidney ng sanggol.

Flu Vaccine

Ang bakuna para sa flu ay mabisang proteksiyon para sa inang nagbubuntis at sa kaniyang sanggol. Ligtas ito sa kahit anong buwan ng pagbubuntis, hanggang sa manganak at maski sa mga breastfeeding moms.

Kapag nagkaro'n ng trangkaso o flu kapag nagbubuntis, may panganib na maipanganak ang bata ng wala sa oras, o kaya ay mababa ang timbang ng sanggol pagkapanganak.

May posibilidad din ng stillbirth o pagkamatay sa loob ng isang linggo pagkapanganak sanhi ng mga komplikasyon.

Nasa bingit ng panganib ang isang nagbubuntis dahil mababa ang resistensiya niya kaya’t malaki ang posibilidad ng mga komplikasyon kapag nagkaron ng flu o anumang sakit.

Isang komplikasyon ay ang bronchitis, isang chest infection na maaaring maging pulmoniya. Nariyan din ang middle ear infection (otitis media), impeksiyon sa dugo, sa utak at spinal cord (meningitis), encephalitis, at endocarditis.

Umiwas sa antibiotics

Hindi una sa reseta ng mga doktor ang antibiotics lalo kapag nagbubuntis.

May mga nagpapareseta kaagad nito lalo na kung matagal na ang sipon at di pa gumagaling. May mga pagkakataon na makakabuti ang antibiotics, ayon kay Dr. Villarante, tulad kung may sinus infections sanhi ng  bacteria.

Pero hindi kailangan ng antibiotics kung simpleng sipon lang. Kumunsulta sa doktor para malaman ang epekto nito sa katawan, at kung ano ang tamang paraan ng pag-inom nito.

 

SOURCES: Jerry Villarante, MD, Department of Health, Mayo Clinic, WebMD

Basahin: Mga ligtas na gamot sa ubo at sipon ng buntis

May katanungan tungkol sa pagpapalaki ng anak? Basahin ang mga artikulo o magtanong sa kapwa magulang sa aming app. I-download ang theAsianparent Community sa iOS o Android!

app info
get app banner